بۇرىننان اتىشۋلى مۇرات تەلەبەكوۆ تاعى دا اقپارات الاڭىنىڭ جۇلدىزى بولاتىن سياقتى. ول «نۇر» يسلام ۋنيۆەرسيتەتىنىڭ پرورەكتورى ءشامشادين كەرىم مەن جۋرناليست شىنار ساعىندىقتى جالا جاپتى دەپ سوتقا بەرىپ وتىر. بۇل تۋرالى «قامشى» پورتالى 365ينفو-عا سىلتەمە جاساپ حابارلايدى.

پرورەكتور مەن ءجۋرناليستىڭ ۇستىنەن تەليبەكوۆتىڭ ارىز بەرۋىنە بەس جىل بۇرىن جاريالانعان ۆيدەوسيۋجەت سەبەپ بولعان. سول كەزدە «الماتى» ارناسىندا كورسەتىلگەن بەينەسيۋجەتتە ەلدەگى تەرىس ۇستانىمداعى ءدىني اعىمداردىڭ قىزمەتى ءسوز بولادى.

ءشامشادين كەرىم

تەليبەكوۆ سول سيۋجەتتەگى جۋرناليست شىنار ساعىندىقتىڭ (ءقازىر "حابار" ارناسىندا قىزمەت ەتەدى - رەد.) وزىنە قاتىستى «احماديا سەكتاسىنىڭ وكىلى» دەگەن پىكىرى مەن ءشامشادين كەرىمنىڭ «تەليبەكوۆ «نۇر» ۋنيۆەرسيتەتىنىڭ ستۋدەنتتەرىن تۋرا جولدان تايدىرۋعا ارەكەتتەندى» دەگەن سوزدەرىن وزىنە جابىلعان جالا دەپ سانايدى.

بەس جىل بۇرىن تەلەارنادان كورسەتىلگەن سيۋجەت تۋرالى تەليبەكوۆ جاقىندا عانا بىلگەنىن ايتىپ وتىر.

«بۇل سيۋجەت تۋرالى ەشتەڭە بىلمەگەم. بىرنەشە اي بۇرىن ول الەۋمەتتىك جەلىلەردە بەلسەندى تۇردە تارالا باستادى»، - دەيدى م. تەليبەكوۆ.

سونداي-اق، م. تەليبەكوۆ ش. كەرىم مەن ش. ساعىندىقتىڭ ءتۇرلى سەبەپتەرمەن وسىمەن ءۇشىنشى رەت سوت وتىرىستارىنا كەلمەي جۇرگەنىن ايتادى. ول سونداي-اق، سۋديا ش. كەرىمگە قاماۋعا الۋ تۋرالى بۇلتارتپاۋ شاراسىن قولدانۋى مۇمكىندىگىن ەسكەرتەدى.

ەستەرىڭىزگە سالساق، بۇعان دەيىن مۇرات تەليبەكوۆ «ۇلتارالىق ارازدىق تۋدىردى» دەپ ايىپتالعان قوعامدىق بەلسەندىلەر س. مامبەتالين مەن ە. نارىمبايەۆ ىسىندە كۋاگەر بولعان ەدى.