وليمپيادا چەمپيونى يليا يلين تالعات ەرمەگيايەۆتى قولداۋ ءۇشىن سوت وتىرىسىنا قاتىستى، - دەپ حابارلايدى «قامشى» پورتالى  kaz.tengrinews.kz – كە سىلتەمە جاساپ. قىلمىستىق ىستەر جونىندەگى اۋدانارالىق مامانداندىرىلعان سوتىندا "استانا ەكسپو-2017" ۇلتتىق كومپانياسىنان قاراجات جىمقىرۋ ءىسى بويىنشا باستى سوت وتىرىسى ءوتىپ جاتىر.

"شىنىمدى ايتسام، بۇل جايلى ءبىرىنشى رەت ەستىگەندە، كوڭىلىم ءتۇسىپ كەتتى. تالعات ەرمەگيايەۆتى جاقسى باسشى رەتىندە بىلەمىن. 2012 جىلى ءبىز بىرگە جاقسى جۇمىس ىستەگەن ەدىك، ەلىمىزگە وليمپيادانىڭ ەكى دۇركىن چەمپيونىن اكەلگەن ەدىك. ءىس بويىنشا ەشتەڭە ايتا المايمىن. ءبىراق ونى جاقسى ادام دەپ بىلەمىن، حابارلاستىق، دوس بولدىق دەۋگە دە بولادى. مۇنداي باسشىلار از"، - دەدى يلين وتىرىستىڭ ۇزىلىسىندە.

"(...) سوندىقتان كوڭىلىم ءتۇسىپ ءجۇر. ونىڭ تەك جاقسىلىعىن بىلەمىن. وعان لوندوندا تاپسىرىلعان ءىس كەرەمەت ورىندالدى. مۇنى بارلىعىمىز بىلەمىز. قازاقستان قۇراماسى 15 مەدال الدى. مىنە، وسىنى ايتا الامىن"، - دەدى يلين.  

ول وسى ءىس بويىنشا كۇدىكتى بولىپ وتىرعان سەرگەي يلين دەگەن ازاماتتىڭ تۋىسى ەمەس ەكەنىن دە ايتتى. 

"مەن تالعات ەرمەگيايەۆ جايلى ايتۋعا كەلدىم. جاقسى ادامدى قولداۋعا كەلدىم. جانىم قالاپ كەلدىم. ەندى نە بولارىن بىلمەيمىن. مۇنى سوت شەشەدى"، - دەدى ول.

18 ناۋرىزدا استانادا "استانا ەكسپو-2017" ۇلتتىق كومپانياسىنان قاراجات جىمقىرۋ ءىسى بويىنشا باستى سوت وتىرىسى باستالعان ەدى. بۇل ىستە 23 ادام كۇدىككە ءىلىنىپ وتىر. ولار ءىستىڭ 500 تومىمەن تانىسىپ شىعۋى كەرەك. 

ەسكە سالا كەتەيىك، 11 ماۋسىمدا ەرمەگيايەۆ "استانا ەكسپو-2017" ۇك" اق باسقارما ءتوراعاسى قىزمەتىنەن بوساتىلعان بولاتىن. سونىمەن قاتار، سوت بۇعان دەيىن "استانا ەكسپو-2017" ۇك اق قۇرىلىس دەپارتامەنتىنىڭ بۇرىنعى باسشىسى ۇسەنوۆتى قاماۋعا الۋ تۇرىندەگى بۇلتارتپاۋ شاراسىن سانكسيالادى. "استانانىڭ №2 الماتى اۋداندىق سوتى "استانا ەكسپو-2017" ۇك اق قۇرىلىس دەپارتامەنتىنىڭ بۇرىنعى باسشىسى ۇسەنوۆكە قاتىستى استانا پروكۋراتۋراسىمەن كەلىسىلگەن جانە سوتقا دەيىنگى تەرگەۋ ورگانىنىڭ تاڭداعان قاماۋعا الۋ تۇرىندەگى بۇلتارتپاۋ شاراسىن قابىلداعان بولاتىن. قازىرگى ۋاقىتتا ۇسەنوۆ "ەكسپو-2017" كەڭەسشىسى قىزمەتىندە. ۇسەنوۆكە بيۋدجەتتەن 214 000 000 تەڭگەنى جىمقىردى جانە اسا ءىرى كولەمدە ىسىراپ ەتتى دەگەن كۇدىك كەلدى"، - دەلىنگەن جوعارعى سوت باسپا ءسوز قىزمەتىنىڭ حابارلاماسىندا.