قاراعاندى وبلىسىنداعى نۇرا-سارىسۋ باسسەينىنىڭ تومەنگى نارباق سۋ قويماسىندا بوگەن جارىلدى، - دەپ حابارلايدى «قامشى» پورتالى ازاتتىققا سىلتەمە جاساپ.
قاراعاندى وبلىستىق توتەنشە جاعدايلار دەپارتامەنتىنىڭ حابارلاۋىنشا، 4 ساۋىرگە قاراعان تۇنگى ساعات ۇشتەر شاماسىندا شەت اۋدانىندا نۇرا-سارىسۋ باسسەينىنىڭ تومەنگى نارباق سۋ قويماسىنداعى پلوتينا جارىلعان.
تجد ايماقتاعى ەلدى مەكەندەردى سۋ باسۋ ءقاۋپى جوق دەپ وتىر.
بوگەننىڭ بۇزىلۋىنان قىزىلوردا-پاۆلودار جولىنىڭ 796 شاقىرىمىندا جولدىڭ 5-6 مەتر تۇسىن سۋ باسقان. جولدا بارلىق كولىك ءتۇرىنىڭ قوزعالىسىنا شەكتەۋ قويىلىپ، ارنايى بەكەت ورنالاستىرىلعان.
سۋ ءقازىر جاڭاارقا اۋدانىنداعى سارىسۋ وزەنى اڭعارىندا ورنالاسقان بيدايىق سۋ قويماسىنا اعىپ جاتقان كورىنەدى. وبلىستىق توتەنشە جاعدايلار قىزمەتى ارتىق سۋدىڭ بۇدان ارى تابيعي جولمەن سارىسۋ وزەنىنىڭ اڭعارىنا كەتەتىنىن ايتقان.
بۇدان باسقا 3 ءساۋىر كۇنى وبلىستا 2 ءۇي جانە قاراعاندى قالاسىنداعى اۋلالاردڭ ءبىرازى سۋ استىندا قالعان.
سونداي-اق، بۇگىن تاڭعى ساعات 8 شاماسىندا شەت اۋدانى شوپا ەلدى مەكەنىندە شەرۋباي-نۇرا وزەنىنىنىڭ سۋ بەكەتىندە سۋ دەڭگەيى كوتەرىلگەنى بەلگىلى بولعان. سوعان قاراماستان، ماماندار ەلدى مەكەندەردى سۋ الۋ ءقاۋپى جوق دەپ وتىر.
