ەرتەڭ قازاق ۇلتتىق ونەر ۋنيۆەرسيتەتى قازاقستان رەسپۋبليكاسى تاۋەلسىزدىگىنىڭ 25 جىلدىعىنا جانە الاش قارىسى ءاليحان بوكەيحاننىڭ 150 جىلدىق مەرەيتويىنا وراي «ۇلى دالانىڭ ۇلانىمىن» اتتى ستۋدەنتتەر ايتىسىن وتكىزگەلى وتىر، - دەپ حابارلايدى «قامشى» پورتالى قازاقپاراتقا سىلتەمە جاساپ.
ۋنيۆەرسيتەتتىڭ باسپا ءسوز قىزمەتى حابارلاعانداي، ايتىسقا وقۋ ورنىنىڭ «ءداستۇرلى ءان» كافەدراسىنداعى ايتىس ونەرىنە ماماندانىپ جۇرگەن ستۋدەنتتەر مەن استانا قالاسى جوعارى وقۋ ورىندارىنىڭ تاڭداۋلى ايتىسكەرلەرى قاتىسادى.
"قازاق ۇلتتىق ونەر ۋنيۆەرسيتەتىنىڭ رەكتورى، ق ر ەڭبەك ەرى، الەم ءارتىسى ايمان مۇساقوجايەۆانىڭ قولداۋىمەن 2014 جىلى اشىلعان «ايتىس» ماماندىعىندا قازىرگى تاڭدا 7 ستۋدەنت ءبىلىم الۋدا. سول جەتى جاس تالاپ اقىندار جىر دوداسىندا ءوز باقتارىن سىناپ كورمەك. سونىمەن قاتار، ارداكەرەي كاپ، داۋرەن پولاتبايەۆ، نارتاي تىلەۋقۇل سىندى جاس ايتىسكەرلەر قاتىسادى دەپ كۇتىلۋدە. ايتىستىڭ ماقساتى - وت اۋىزدى، وراق ءتىلدى اقىنداردىڭ جۇرەكجاردى جىرىمەن تاۋەلسىزدىكتىڭ ءقادىرىن ۇعىندىرۋ جانە ازاتتىق جولىندا التىن باستارىن بايگەگە تىككەن الاش ارداگەرلەرىن ەسكە الۋ، اتامۇرا ونەردى دارىپتەۋ"،-دەپ حابارلادى وقۋ ورنىنىڭ باسپا ءسوز قىزمەتى.
ءقازۇوۋ قابىرعاسىندا تۇڭعىش رەت وتكىزىلگەلى وتىرعان ستۋدەنت جاستار ايتىسىنا كورنەكتى مەملەكەت جانە قوعام قايراتكەرى، عالىم مىرزاتاي جولداسبەكوۆ، اكادەميك، عالىم سەيىت قاسقاباسوۆ، اقىن، ق ر ەڭبەك سىڭىرگەن قايراتكەرى ءجۇرسىن ەرمان، جىرشى، ءقازۇوۋ پروفەسسورى الماس الماتوۆ باستاعان امانجول ءالتاي، سەرىكزات دۇيسەنعازى، جىبەك بولتانوۆا، داۋلەتكەرەي كاپ ۇلى، بالعىنبەك يماش، اينۇر تۇرسىنبايەۆا، شىرىنبەك قويلىبايەۆ، قالقامان سارين، اسەم ەرەجە قىزى، ەركەبۇلان قاينازاروۆ، يران-عايىپ كۇزەمبايەۆ، سارا توقتامىس، جانداربەك بۇلعاقوۆ سىندى ەلگە تانىمال اقىندار قوناق رەتىندە كەلەدى.
ۇزدىك ونەرىمەن دارالانعان اقىنعا - قازاق ۇلتتىق ونەر ۋنيۆەرسيتەتىنىڭ رەكتورى، ق ر ەڭبەك ەرى، الەم ءارتىسى ايمان مۇساقوجايەۆانىڭ ارنايى جۇلدەسى تابىستالادى دەپ حابارلانىپ وتىر.
