بىشكەك وقۋشىلارى 1916 جىلعى ورتاازيا كوتەرىلىسى جونىندە قويىلىم قويدى، - دەپ حابارلايدى «قامشى» پورتالى baq.kz – كە سىلتەمە جاساپ.

قىرعىزستان بيىل ون مىڭداعان جەرگىلىكتى تۇرعىن شەيىت بولعان ورتاازيا كوتەرىلىسىنىڭ ءجۇز جىلدىعىن اتاپ وتۋدە. پاتشالىق رەپرەسسيادان قۇربان بولعانداردىڭ ناقتى سانى ءالى كۇنگە دەيىن بەلگىسىز. ءبىراق، قىرعىزستاندىقتار مۇنى گەنوسيد دەپ تانۋدى تالاپ ەتەدى.

1916 جىلعى وقيعانى ەسكە الۋ شاراسى قىرعىزستاندا جىل بويىندا اتاپ وتىلەدى. تاياۋدا عانا بىشكەكتە اتالعان وقيعانى ەسكە الۋعا ارنالعان تەاتر فەستيۆالى ءوتتى. وندا تالاس مەكتەبىنىڭ وقۋشىلارى ورتاازيا كوتەرىلىسى جونىندە قويىلىم قويدى.

مۋكاي ەلەبايەۆ رومانىنىڭ جەلىسى بويىنشا پەسانى وقۋشىلاردىڭ وزدەرى جازىپ شىققان. باستى رولدە — ون جاستاعى بالا (ونى 3-سىنىپ وقۋشىسى وينايدى). مىڭداعان وزگە قىرعىزدار سەكىلدى ول دا پاتشا قاھارىنان قىتايعا قاشادى. الايدا جولدا اناسى قازا تابادى، ءوزى قۇلدىققا تاپ بولادى.
"ءبىز وسىعان دەيىن ءارتۇرلى سپەكتاكلدەردى ويناپ كەلدىك. ءبىراق 1916 جىلعى كوتەرىلىس ءبىزدىڭ جانىمىزعا قاتتى باتتى. ءبىز ولاردىڭ قايعى-قاسىرەتىن سەزىندىك.

بۇل ءبىز ءۇشىن ەرەكشە تاقىرىپ بولدى"، - دەيدى ونىنشى سىنىپ وقۋشىسى التىناي بورۋكەيەۆا.

ساحنانىڭ كەيبىر كەمشىلىكتەرىنە قاراماستان، بالالار ۇلكەن قۇشتارلىقپەن وينادى. تىپتەن ساحناداعى ارتىستەردىڭ بالالار ەكەنىن كورەرمەندەردىڭ وزدەرى سەزبەدى.