«قازاقستان رەسپۋبليكاسى پرەزيدەنتىنىڭ ءىس باسقارماسى» مەملەكەتتىك مەكەمەسىنە قاراستى «قازاقستان رەسپۋبليكاسى پارلامەنتىنىڭ شارۋاشىلىق باسقارماسى» مەملەكەتتىك مەكەمەسىنىڭ تاپسىرىسىمەن پەردە تىككەن كاسىپكەر ايەل 2014 جىلدىڭ قازانىنان بەرى ادال ەڭبەگىنىڭ اقىسىن الا الماي ءجۇر، - دەپ حابارلايدى «قامشى» پورتالى.

بۇگىن جەكە كاسىپكەر اتالعان ماسەلەنىڭ نۇكتەسىن قويىپ، ءادىل شەشىم شىعارۋدى سۇراپ جوعارعى سوت ءتوراعاسى قايرات ءمامي مەن باس پروكۋرور اسحات داۋىلبايەۆتىڭ اتىنا حات تاپسىردى.

كاسىپكەردىڭ ايتۋىنشا، 2014 جىلدىڭ قازان ايىندا جالپى قۇنى 82،5 ملن. تەڭگە بولاتىن 3 لوت بويىنشا دەپۋتاتتار تۇراتىن قىزمەتتىك پاتەرلەرگە تەرەزە پەردە ساتىپ الۋ جونىندە مەملەكەتتىك ساتىپ الۋ كونكۋرسىن جاريالانادى. سول لوتتاردىڭ قۇنى 25،1 ملن. تەڭگە بولاتىن بىرەۋىن، ياعني، قوناق ءۇي بولمەسىنە پەردە تىگۋ جونىندەگى لوتتى جەكە كاسىپكەر اقمارال ارداۋبايەۆا ۇتىپ الادى. كاسىپكەر 2014-جىلدىڭ 05 مامىرىندا پارلامەنتتىڭ شارۋاشىلىق باسقارماسىمەن كەلىسىم شارتقا وتىرادى. 

«كەلىسىمگە ساي كاسىپكەر دايىنداعان 130 پەردە جيناعى (130 كومپلەكت) ەكى جىلعا جۋىق ۋاقىت بويى پارلامەنتتىڭ شارۋاشىلىق باسقارماسىنىڭ قويماسىندا ءۇيىلىپ جاتىر. ال، كاسىپكەر ا. ارداۋبايەۆا بولسا، ءالى كۇنگە دەيىن ءتيىستى قاراجاتىن الا الماي، ءبىر جىلدان اسا ۋاقىت بويى پارلامەنتتىڭ شارۋاشىلىق باسقارماسىمەن سوتتاسىپ ءجۇر»، - دەيدى ايقمارال ارداۋبايەۆا.

كاسىپكەرگە پارلامەنتتىڭ شارۋاشىلىق باسقارماسى «تىگىلگەن پەردەلەر تالاپقا ساي ەمەس» دەگەن سەبەپپەن قاراجات تولەمەي وتىر.

ا. ارداۋبايەۆانىڭ قوعامدىق قورعاۋشىسى ماقسات ءىلياس ۇلى سوت بارىسىندا پارلامەنتتىڭ شارۋاشىلىق باسقارماسى تىگىلگەن پەردە جيناقتارىنا "نەگىزسىز تالاپ قويعانىن" ايتىپ وتىر.

«پارلامەنتتىڭ شارۋاشىلىق باسقارماسى تاراپىنان پەردە ماتاسىنىڭ ءبىر شارشى قالىڭدىعىنا 585 گرامم ماتا تالاپ ەتىلگەن. ءبىراق، ءبىز رەسەي، ۋكراينا، بەلارۋس ەلدەرىندەگى ءىرى ماتا شىعارۋشى فابريكالارىنا سۇراۋ سالعاندا، مۇنداي قالىڭدىقتا پەردە تىگىلمەيتىنىن بىلدىك. ونىڭ ۇستىنە پارلامەنتتىك شارۋاشىلىق باسقاراماسى «اناليتيكا» اتتى جەكە ۇيىمنىڭ ساراپتاماسى نەگىزىندە تالاپ قويدى. ءبىراق، «اناليتيكا» ۇيىمى بىزگە وسى ىسكە قاتىستى ەشقانداي قورىتىندى جاساماعانىن جازدى. سوت بارىسىندا وسى ۋاجدەرىمىز نازارعا الىنبادى»، - ­دەيدى زاڭگەر.

كاسىپكەر ا. ارداۋبايەۆا وسى جاعدايعا بايلانىستى جيىرما شاقتى جۇمىسشىسىنا ەڭبەكاقى تولەي الماي وتىرعانىن دا العا تارتادى.