بۇگىن اقپارات قۇرالدارى پارلامەنت دەپۋتاتتارىنىڭ قىزمەت ورنىندا سمارتفوندار پايدالانۋىنا تىيىم سالىنعانى تۋرالى جارىسا حابارلادى. بۇل تالاپ وتكەن ايدىڭ سوڭىندا مەملەكەتتىك مەكەمە قىزمەتكەرلەرىنىڭ قىزمەت ورنىندا گادجەتتەر ۇستاۋىنا تىيىم سالۋ تۋرالى باستامانىڭ جالعاسى ىسپەتتەس بولىپ وتىر. ەستەرىڭىزدە بولساق، بۇدان بۇرىنىراق ءتۇرلى مينيسترلىكتەر وزدەرىنىڭ باعىنىشتى ورگاندارىنا قىزمەتتىك مەكەمەلەردە سمارتوفن ۇستاۋعا تىيىم سالاتىن قىزمەتتىك حاتتار جولداعان بولاتىن. سوعان قاراپ «پارلامەنت تە مەملەكەتتىك ورگان. سول سەبەپتەن دەپۋتاتتار دا سمارتفون ۇستاماسىن» دەي سالۋعا بولار ەدى. الايدا، «دەي سالعىزبايتىن» ءبىر ماسەلە بار.
كونستيتۋسيا بويىنشا پارلامەنت – بيلىكتىڭ ءوز الدىنا تاۋەلسىز ءبىر تارماعى. وعان نەگىزىنەن زاڭ شىعارۋ مىندەتى ارتىلادى. سونداي-اق، دەپۋتاتتار اتقارۋشى بيلىكتىڭ جۇمىسىنا باعا بەرىپ، ءبىرقاتار كادرلىق تاعايىنداۋلاردا شەشۋشى داۋىس يەلەنەدى. دەمەك، ۇكىمەتتەن باستالىپ، جەرگىلىكتى مەملەكەتتىك اتقارۋشى ورگاندار، قۇقىق قورعاۋ ورگاندارىندا ەنگىزىلىپ جاتقان بۇل تىيىم پارلامەنت قابىرعاسىنا قالاي ءوتىپ كەتتى؟ زاڭ شىعارۋشى ورگانعا تالاپ قوياتىن زاڭدى كىمدەر شىعارىپ وتىر؟ بۇل كونستيتۋسياعا، «پارلامەنت جانە ونىڭ دەپۋتاتتارىنىڭ مارتەبەسى تۋرالى» زاڭعا قايشى ەمەس پە؟
الايدا، قىزمەتتەرىنە جاڭادان كىرىسكەن دەپۋتاتتاردىڭ «بۇلارىڭ قالاي؟» دەگەنى بولمادى. بارلىعى دەرلىك باس شۇلعىپ، قۇپتاي جونەلدى.
تەك، كوممۋنيستەر اتىنان سايلانعان دەپۋتات ايدىن قوڭىروۆ قانا «ءبىزدى ەشكىم شەكتەي المايدى. ول ءۇشىن كونستيتۋسيالىق زاڭدارعا وزگەرىس ەنگىزۋ كەرەك شىعار. ءبىراق، بىزگە ءالى ونداي زاڭ جوبالارى تۇسكەن جوق. ال، كوپشىلىك سمارتفون ۇستاماۋ كەرەك دەسە،ب ءىز وعان باعىنامىز. ءبىراق، مەن ءوز باسىم دەپۋتاتتاردىڭ سمارتفونىن الىپ قويعانىنا قارسىمىن» دەگەن بولدى.
سوندا دەيمىز دە، ەشقانداي زاڭعا وزگەرىس ەنگىزبەي، زاڭ شىعارۋشى مىرزالارعا باسىن اشىپ تۇسىندىرمەي، دەپۋتاتتاردىڭ قولىنداعى تەلەفونىنا جارماسىپ وتىرعان قانداي كۇش؟ بۇرىن ەل اراسىندا قاۋقارسىزدىعىنا قاراي «قۋىرشاق پارلامەنت»، دەپۋتاتتىق كورپۋستىڭ باسىم بولىگىن بيزنەسمەندەردىڭ قۇراۋىنا وراي «قالتالى پارلامەنت» اتالىپ كەلگەن دەپۋتاتتىق كورپۋسقا ەندى جاسىرىن كۇشتەردىڭ مىنا شەكتەۋىنەن كەيىن «سمارتفونسىز پارلامەنت» دەگەن لاقاپ تاعىلا ما؟ ۇكىمەتتىڭ باسشىسىن اۋىستىرۋ بىلاي تۇرسىن، سالالىق مينيسترلىكتەر ازىرلەپ اكەلگەن زاڭ جوبالارىن «ءلام-ميم» دەمەستەن ماقۇلداپ جىبەرەتىن «ءتارتىپتى» پارلامەنتتە قانداي قاۋقار قالدى ءوزى؟
دارحان مۇقانتەگى
