قوستاناي مەسەناتتار كلۋبى ونەر، مادەنيەت، عىلىم، جۋرناليستيكا سىندى سالالاردا وزىق شىققاندارعا «قازىنا» جانە «شابىت» سىيلىقتارىن تاپسىردى، - دەپ حابارلايدى «قامشى» پورتالى munara.kz – كە سىلتەمە جاساپ.

ايتا كەتەيىك، كونكۋرستا مادەنيەت جانە ونەر قىزمەتكەرلەرى، شىعارماشىلىق ۇجىم جەتەكشىلەرى، تىلشىلەر، اقىندار، جازۋشىلار، عالىمدار، ءبىلىم بەرۋ سالاسىنىڭ قىزمەتكەرلەرى كىم ۇزدىكتى انىقتادى. «ميراس» مادەنيەت سارايىندا وتكەن سالتاناتتى جيىننىڭ اشىلۋىندا ءسوز سويلەگەن وبلىس باسشىسى ارحيمەد مۇحامبەتوۆ:

«توبىل-تورعاي وڭىرىندە تالاي تارلاندار تۇلەپ شىققان. كەشەگى وتكەن اردالارىمىزدىڭ جەڭىستى-جەمىستى جولىن جالعايتىن جاستاردىڭ بارىنا قۋانامىن. مىنە، بيىل دا ءار سالادا وزىق شىققان شىن مىقتىلاردى انىقتادىق. 2000 جىلى ەلىمىزدە مادەنيەتتى قولداۋ جىلى بولىپ جاريالاندى. ءدال سول جىلى وڭىردەگى شىعارماشىلىق يەلەرىن قولداۋ ماقساتىندا قوستاناي مەسەناتتار كلۋبى قۇرىلعان. وسىلايشا، وبلىسىمىزدىڭ اتىمتاي جومارتتارى مادەنيەت سالاسىنىڭ يەلەرىنە قارجىلاي قولداۋ ءبىلدىرىپ كەلەدى. قوستانايداعى وسى باستاما ماجىلىسكە دەيىن جەتىپ، ەندى باسقا وبلىستارعا ۇلگى رەتىندە ۇسىنىلدى. ونەر ادامدارىنىڭ ەڭبەگىن ەسكەرگەن قوستانايلىق كاسىپكەرلەرگە مىڭ العىس»، — دەدى.

ارحيمەد بەگەجان ۇلى «مادەني مۇرا» اتالىمى بويىنشا جەڭىسكە جەتكەن قمپي پرورەكتورى، پەداگوگيكا عىلىمدارىنىڭ كانديداتى تىلەگەن احمەتوۆ پەن تانىمال ايتىسكەر اقىن ايبەك قالييەۆكە «قازىنا» سىيلىعىن تابىس ەتتى. بيىلعى بايقاۋعا 97 ۇسىنىس كەلىپ تۇسسە، ونىڭ ىشىندە 32 ادام مەن 2 ۇجىم سىيلىقتارعا لايىق دەپ تانىلدى.

وبلىستىڭ مەسەناتتارى اۋىر ناۋقاسقا شالدىعىپ، ەمدەلۋدى مۇقتاج ەتكەندەرگە قوماقتى قارجى جۇمسايتىنىنا يتا كەتۋ كەرەك. سونداي-اق، قولى قىسقا ادامدارعا كوممۋنالدىق قارىزدى وتەۋگە، قىسقا وتىن-سۋ الۋعا دا جومارت جاندار قول سوزادى. وبلىس اكىمىنىڭ ايتۋىنشا، وسى ۋاقىتقا دەيىن جەدەل جاردەم كولىگىنىڭ كومەگىمەن ءتورت جارىم مىڭنان استام تۇرعىن ەمدەلدى.