ەلباسى نۇرسۇلتان نازاربايەۆ 11-15 ءساۋىر ارالىعىندا بىرنەشە شەت مەملەكەتتەرگە ساپار شەگەدى، - دەپ حابارلايدى «قامشى» پورتالى اقوردانىڭ باسپا ءسوز قىزمەتىنە سىلتەمە جاساپ.

«11-12 ءساۋىر كۇندەرى نۇرسۇلتان نازاربايەۆ حاسان ءرۋحانيدىڭ شاقىرۋىمەن يران يسلام رەسپۋبليكاسىنا بارادى. وندا مەملەكەت باسشىلارى 2014 جىلدىڭ قىركۇيەگىندە استانادا جاسالعان كەلىسىمدەردىڭ ورىندالۋ بارىسىن ءسوز ەتەدى. سونىمەن قاتار، ساۋدا-ەكونوميكالىق، ينۆەستيسيالىق، اۋىلشارۋاشىلىق، كولىك-ترانزيتتىك سالاداعى ارىپتەستىك پەن حالىقارالىق جانە ايماقتىق قاۋىپسىزدىك ماسەلەلەرى ءسوز بولادى»، - دەلىنگەن اقوردا تاراتقان حابارلامادا.

13-14 ءساۋىر كۇندەرى پرەزيدەنت ن. نازاربايەۆ تۇركياعا بارىپ، يسلام ىنتىماقتاستىق ۇيىمىنىڭ ءحىىى سامميتىنە قاتىسادى. ساپار بارىسىندا ەلباسى ەرەجەپ ەردوعانمەن، تۇرىك كاسىپكەرلەرىمەن كەزدەسەدى دەپ كۇتىلۋدە.

وزبەكستانعا ەلباسى 15 ءساۋىر كۇنى سوعادى. وندا مەملەكەت باسشىسى يسلام كارىموۆپەن كەزدەسىپ، ەكى ەل اراسىنداعى قارىم-قاتىناستىڭ نەگىزشى ماسەلەلەرىن تالقىلايدى.