جەڭىس كۇنى قارساڭىندا ۇلى وتان سوعىسىنىڭ ارداگەرلەرىنە قولداۋ كورسەتۋ ءۇشىن قوسىمشا 2،6 ملرد تەڭگە بولىنەدى، - دەپ حابارلايدى «قامشى» پورتالى 24.kz-كە سىلتەمە جاساپ.

بۇل قاراجات مەملەكەت تاراپىنان كورسەتىلەتىن ءتيىستى الەۋمەتتىك تولەمدەردەن بولەك قاراستىرىلىپ وتىر.

«بۇگىن مەملەكەتتىك حاتشىنىڭ توراعالىعىمەن جەڭىستىڭ 71 جىلدىعىن مەرەكەلەۋگە دايىندىق ماسەلەلەرى پىسىقتالدى. بيىل بۇل مەيرام تاۋەلسىزدىكتىڭ 25 جىلدىعى اياسىندا وتەدى. دەمەك، وتان ءۇشىن وت كەشكەندەرگە دەگەن قۇرمەت تە لايىقتى دەڭگەيدە بولۋى ءتيىس»، - دەپ جازادى 24.kz.

وتكەن جىلى جەڭىستىڭ 70 جىلدىعىندا باستاۋ العان يگى شارالار دا جالعاسىن تاپپاق. ەلىمىزدە بۇگىندە 3668 ۇلى وتان سوعىسىنىڭ ارداگەرى تۇرادى. ولارعا ارناپ اكسيالار ۇيىمداستىرىلادى. دەرەكتى فيلمدەر ءتۇسىرىلىپ، كىتاپتار شىعارىلماق. ءتۇرلى الەۋمەتتىك كومەكتەر دە قاراستىرىلعان. قازىرگى تاڭدا ءاربىر ارداگەرگە 110 مىڭ تەڭگە كولەمىندە زەينەتاقى تولەنەدى.

ءومىرزاق وزعانبايەۆ، رەسپۋبليكالىق ارداگەرلەر ۇيىمى ورتالىق كەڭەسىنىڭ ءتوراعاسى:

- ارداگەرلەردىڭ كەز كەلگەنى جەكە ەمحاناعا بارىپ، مەديسينالىق كومەك الا المايدى. سەبەبى، زەينەتاقىنىڭ مولشەرى جەكەمەنشىك ەمحاناعا تولەۋگە جەتپەي جاتادى.

تامارا دۇيسەنوۆا، ق ر دەنساۋلىق ساقتاۋ جانە الەۋمەتتىك دامۋ ءمينيسترى:

- ءقازىر 3 ايدىڭ كولەمىندە 3300-گە جۋىق ۇوس ارداگەرلەرى مەن وعان تەڭەستىرىلگەن ازاماتتاردى مەديسينالىق تەكسەرۋدەن وتكىزىپ، ديپانسەرلىك كومەك بەرۋدى باستادىق. مىڭعا جۋىق ۇوس ارداگەرى مەن وعان تەڭەستىرىلگەن ازاماتتارعا 52 ملن تەڭگەگە تەگىن دارى-دارمەك جەتكىزىلدى.