ەۋرازيالىق ەكونوميكالىق وداقتىڭ ورتاق ۆاليۋتاسىن اينالىمعا شىعارۋ تۋرالى اڭگىمەنى ەندى ايىرقالپاقتى اعايىن ايتا باستادى. قىرعىزستاننىڭ ۆيسە-پرەمەرى االى قاراشيەۆ بىشكەكتە ءوتىپ جاتقان «ەۋرازيالىق ەكونوميكالىق پەرسپەكتيۆالار» فورۋمى كەزىندە وداقتىڭ ورتاق ۆاليۋتاسىن ەنگىزۋ ماسەلەسىن جاقىن كۇندەرى قاراستىرۋ كەرەك دەپ مالىمدەدى.

«بىزگە وتە شۇعىل تۇردە ۆاليۋتالىق رەتتەۋ ماسەلەلەرىن قاراستىرۋ قاجەت. اتاپ ايتقاندا، ۇيىم ىشىندەگى بىرلەسكەن ساۋدا مەن كەدەندىك رەتتەۋلەردى جۇزەگە اسىرۋ ءۇشىن ەاەو-نىڭ ورتاق ۆاليۋتاسىن ەنگىزۋ تۋرالى ماسەلەنى قاراۋىمىز كەرەك»، - دەيدى ا. قاراشيەۆ.

بۇعان دەيىن بىلتىر قاراشا ايىندا رف مەملەكەتتىك دۋماسىنىڭ دەپۋتاتى لەونيد سلۋسكيي ەۋرازيالىق ەكونوميكالىق وداق ەلدەرىنە ارنالعان ءبىرىڭعاي ەسەپ ايرىسۋ قۇرالىن ازىرلەۋ بويىنشا جۇمىس بەلگىلى-بىر قيىندىقتارعا قاراماستان جۇرگىزىلىپ جاتقانىن مالىمدەگەن ەدى. بۇل مالىمدەمە قوعامدا ءبىرقاتار نارازىلىققا تاپ بولىپ، قازاقستان باسشىلىعى تاراپىنان كۇن تارتىبىندە وداقتىڭ ورتاق ۆاليۋتاسىنا كوشۋ ماسەلەسى قاراستىرىلىپ جاتپاعانىن حابارلاعان بولاتىن.

بۇل ماسەلەدە ۇيىمعا مۇشە ەلدەر ءالى ءبىر توقتامعا كەلمەگەنىمەن جەكەلەگەن شەنەۋنىكتەر مەن ساياساتكەرلەر ورتاق ۆاليۋتا تۋرالى اۋىق-اۋىق ەسكە سالىپ تۇراتىنىن ەسكەرۋ كەرەك.

ونىڭ ۇستىنە عالامدىق قارجى داعدارىسىنىڭ قىسپاعىن اقش-تان كورەتىن پوستكەڭەستىك ەلدەر دوللارسىزدانۋ ساياساتىن قىزۋ جۇرگىزىپ جاتقانىن قاپەرگە الساق، ورتاق ۆاليۋتا ەنگىزۋ تۋرالى يدەيانىڭ جۇزەگە اسۋ مۇمكىندىگى جوق دەي المايسىز.

بۇل باستامانىڭ پوستكەڭەستىك كەڭىستىكتە ىقپالىنان ايرىلعىسى كەلمەيتىن رەسەيدىڭ تاراپىنان ءجيى كوتەرىلىپ جۇرگەنىنە ەشكىم تاڭ قالمايدى. الايدا، ەۋرازيالىق ەكونوميكالىق وداققا بىلتىر تامىز ايىندا عانا قوسىلعان، دۇنيەجۇزىلىك ساۋدا ۇيىمىنىڭ 1998 جىلدان بەرى مۇشە بولىپ وتىرعان قىرعىزستاننىڭ ورتاق ۆاليۋتاعا نەلىكتەن قۇمارتا قالعانى تۇسىنىكسىز بولىپ وتىر.