بۇگىن ق ر جوعارعى سوتىنىڭ ءتوراعاسى قايرات ءمامي ساياسي-زاڭ كوميسسياسىنىڭ حاتشىسى، جۇڭگو كومپارتياسى ورتالىق كوميتەتى ساياسي بيۋروسىنىڭ مۇشەسى مەن سزيانچجۋمەن كەزدەستى. سونداي-اق، ول بەيجىڭ قالاسىنىڭ جوعارى دارەجەلى حالىق سوتىندا دا بولدى، - دەپ حابارلايدى «قامشى» پورتالى قازاقپاراتقا سىلتەمە جاساپ.

«كوشباسشىلارىمىزدىڭ باسا نازار اۋدارۋىنىڭ ارقاسىندا بۇگىندە قازاقستان مەن جۇڭگو - سەنىمدى ارىپتەس، دوستاس ەل. قحر ءتوراعاسى سي سزينپين مەن ق ر پرەزيدەنتى نۇرسۇلتان نازاربايەۆ اراسىندا تىعىز جۇمىس بايلانىستارى عانا ەمەس، سونىمەن بىرگە جىلى دوستاستىق قاتىناس ورناعان. مەن ەكى ەلدىڭ جوعارعى حالىق سوتتارى اراسىندا بىرلەسكەن كۇشپەن ەكى ەلدىڭ سوت جۇيەلەرى جۇمىسىنىڭ ساپاسىن ارتتىرۋ ءۇشىن تۇراقتى تاجىريبە، اقپارات الماسۋ (ونىڭ ىشىندە شانحاي ىنتىماقتاستىق ۇيىمى اياسىندا) جۇرگىزىلەتىنىنە سەنىمدىمىن»، - دەدى مەن سزيانچجۋ.

ول ەكى ەل اراسىندا ورتاق قاۋىپسىزدىك سىن-قاتەرلەرى (تەرروريزم، ترانسشەكارالىق قىلمىس جانە ت.ب.) تۇرعانىن اتاپ ءوتتى، بۇل وسى سالادا ءوزارا ءىس-قيمىلدى كۇشەيتۋدى تالاپ ەتەدى.

«ەلدەر اراسىندا ءادىل سوت سالاسىنداعى ىنتىماقتاستىقتى نىعايتۋ تۋرالى، سوتتالعان تۇلعالاردى ءوزارا قايتارۋ تۋرالى كەلىسىمگە قول قويىلدى. وتكەن جىلى جۇڭگو قازاقستاننىڭ ءوتىنىشى بويىنشا وعان قحر اۋماعىندا ءتۇرلى مەرزىمدەگى جازالارىن وتەپ جۇرگەن قىلمىسكەرلەردى قايتاردى»، - دەدى ول.

ق. ءمامي تەرروريزم، ەكسترەميزم، سەپاراتيزم سياقتى ءۇش قاۋىپپەن كۇرەس سالاسىنداعى ىستەردى قاراۋ تاجىريبەسىن ءوزارا زەردەلەۋ، سونداي-اق ەكى ەلدىڭ جوعارعى سوتتارى ىنتىماقتاستىق تۋرالى بارىنشا كەڭەيتىلگەن مەموراندۋمعا دايىندىق تۋرالى ۋاعدالاستىققا جەتۋ ماڭىزدىلىعىن اتاپ ءوتتى.

ق ر جوعارعى سوتىنىڭ سۋدياسى ماديار بالكەن قازاقستاندىق جۋرناليستەرگە بەرگەن سۇحباتىندا قازاقستان مەن قىتايدا سوت-قۇقىقتىق رەفورمالار ۇقساس ەكەنىن اتاپ ءوتىپ، ساپار قورىتىندىسىن شىعاردى.

«ءبىز ەكى ەل جوعارعى سوتتارىنىڭ ىنتىماقتاستىعىن ودان ءارى تەرەڭدەتۋ ماسەلەلەرىن تالقىلادىق. قىتايدا دا، قازاقستاندا دا وتە اۋقىمدى قۇقىقتىق رەفورما باستالدى. ءبىز ەكى ەلدە دە بارلىق باعىت بويىنشا مىندەتتەر مەن ماقساتتار سايكەس كەلەتىنىن كورىپ وتىرمىز. بۇل جاعىنان تاجىريبە الماسۋدى تەرەڭدەتۋ، سوت پراكتيكاسىن زەردەلەۋ، جاڭا تەحنولوگيالار مەن ستاندارتتاردى ەنگىزۋ، سوت ءبىلىمىن دامىتۋ، سونداي-اق تۇتاستاي، ءادىل سوت جۇرگىزۋدىڭ ساپاسىن جاقسارتۋ بويىنشا ۋاعدالاستىققا قول جەتكىزىلدى»، - دەدى ول.

ەسكە سالسا كەتسەك، بۇل ق ر جوعارعى سوتى ءتوراعاسىنىڭ قحر-عا العاشقى رەسمي ساپارى. 11 ساۋىردە ق. ءمامي قحر مەملەكەتتىك سوت اكادەمياسىنا، قحر جوعارعى حالىق سوتىنا باردى. وندا ءتوراعا چجوۋ سيانمەن تانىستى.

قازاقستاندىق دەلەگاسيا قۇرامىنا جوعارعى سوت سۋدياسى ماديار بالكەن، اقمولا وبلىستىق سوتىنىڭ ءتوراعاسى نۇرعازى ءابدىقانوۆ، باتىس قازاقستان وبلىستىق سوتىنىڭ ءتوراعاسى بەك امەتوۆ، جوعارعى سوت جانىنداعى سوتتار قىزمەتىن قامتاماسىز ەتۋ دەپارتامەنتى باسشىسىنىڭ ورىنباسارى ءاسيا قاسەنوۆا مەن حالىقارالىق بايلانىس جانە حاتتاما ءبولىمىنىڭ باس كونسۋلتانتى نۇرىش تاسبولاتوۆ كىردى.