ەلىمىزدەگى مەكتەپتەردە ءۇش تىلدە ءبىلىم بەرۋ 2017-2018 وقۋ جىلىنان باستالادى. كەزەڭ-كەزەڭمەن، ءبىراق، قارقىندى تۇردە ەنگىزىلەتىن بۇل جۇيەگە مەملەكەت قازىناسىنان 1 ترلن 391 ملرد تەڭگە قارجى بولىنەدى، - دەپ حابارلايدى «قامشى» پورتالى halyknews.kz – كە سىلتەمە جاساپ.
وسى قارجىنىڭ 1 ترلن 153 ملرد تەڭگەسى رەسپۋبليكالىق بيۋدجەتتەن، 220 ملرد تەڭگە جەرگىلىكتى بيۋدجەتتەن، ال 18 ملرد تەڭگە باسقا كوزدەردەن ناقتى قانداي كوزدەر ەكەنى ايتىلمادى) بولىنەدى. ءبىلىم جانە عىلىم مينيسترلىگىنىڭ رەسمي جاۋابىنا سۇيەنسەك، ءۇش ءتىلدى ەنگىزۋگە ارنالعان بازا مەكتەپتەر مەن بالاباقشالاردا جاساقتالىپ قويىپتى. «مەكتەپكە دەيىنگى بۇكىل مەكەمەلەردە ءۇش ءتىلدى كەڭىستىككە ەنگىزۋدىڭ پاندىك-دامىتۋ ورتاسى جاساقتالدى. 2013-2014 وقۋ جىلىنان باستاپ، مەكتەپتەردە 1-سىنىپتان باستاپ اعىلشىن ءتىلى وقىتىلادى. 2017-2018 وقۋ جىلىندا 5-سىنىپقا 1-سىنىپتان باستاپ اعىلشىن ءتىلىن وقىعان وقۋشىلار كەلەدى. سوندىقتان، 5-سىنىپتان باستاپ، جوعارى سىنىپقا دەيىن اعىلشىن تىلىندە وقۋعا دايىندىق باستالادى»، — دەگەن مينيسترلىكتىڭ جاۋابىندا.
ءبىراق «پاندىك-دامىتۋ ورتاسى» دەگەن ءسوزدىڭ ءمانى مەن وقۋشىلاردىڭ 5-سىنىپقا دەيىن اعىلشىن ءتىلىن يگەرىپ كەتكەنىن جان-جاقتى ءتۇسىندىرىپ بەرە المادى. سونداي-اق، حيميا، فيزيكا، بيولوگيا مەن ينفورماتيكا پاندەرىن اعىلشىن تىلىندە وتۋگە قابىلەتتى ۇستازدار تۋرالى دا ەشقانداي مالىمەت جوق. مينيسترلىكتىڭ مالىمەتى بويىنشا 2015-2016 جىلى ەلىمىزدەگى 42 جوعارعى وقۋ ورىندارىندا ءۇش تىلدە ءبىلىم بەرۋ اياسىندا پەلاگوگيكالىق، ينجەنەر-تەحنيكالىق جانە ناقىت عىلىمدار بويىنشا ارنايى بولىمدەر اشىلىپتى. سونداي-اق، 816 پەداگوگ حالىقارالىق «بولاشاق» باعدارلاماسى بويىنشا كاسىبي ءبىلىم الىپتى.
2020 جىلعا دەيىن ءتىل كۋرستارىن 2450 ءمۇعالىم وقىپ شىعادى ەكەن. ءبىراق ونىڭ ءبارى بىردەي اعىلشىن ءتىلىن يگەرىپ شىعا قويار ما ەكەن؟ ەڭ باستى ماسەلە وقۋلىقتارعا تىرەلەدى. بىزدەگى مەكتەپتەرگە بەيىمدەلگەن، اعىلشىن تىلىندەگى وقۋلىقتاردىڭ ساپاسى قانداي؟ قاعاز جۇزىندە ءبارى وڭاي. مينيسترلىك «نازاربايەۆ زياتكەرلىك مەكتەپتەرى» مەن حالىقارالىق مەكتەپتەردەگى وقۋلىقتاردى پايدالانا سالماق ەكەن. سونداي-اق، شەتەلدىك ينفورماتيكا، فيزيكا، حيميا جانە بيولوگيا وقۋلىقتارىن بەيىمدەۋدى جوسپارلاپتى.
مينيسترلىككە «قازىرگى جاستاردىڭ اعىلشىن ءتىلىن مەڭگەرۋ ىسىنە كوڭىلدەرىڭىز تولا ما؟» دەگەن سۇراق جولدانعان. «تۇرعىنداردىڭ ءۇش ءتىلدى مەڭگەرۋ ماسەلەسى بويىنشا الەۋمەتتىك ساۋالنامالار جۇرگىزۋ ق ر مادەنيەت جانە سپورت مينيسترلىگىنىڭ قۇزىرىندا» دەگەن جاۋاپ الىندى.
ءبىلىم جانە عىلىم مينيسترلىگى ءۇش ءتىلدى ءبىلىم بەرۋدى كەزەڭ-كەزەڭمەن ەنگىزە وتىرىپ، بۇل جاڭالىقتىڭ قازاقستاندىق ورتا ءبىلىم بەرۋ سالاسىن جەتىلدىرەتىنىنە سەنىم ءبىلدىردى. سوندىقتان، وزگە مەكتەپتەر دە «دارىن»، قازاق-تۇرىك ليسەيى، «نازاربايەۆ زياتكەرلىك مەكتەبىمەن» بىرگە ساپ تۇزەۋدى ۇسىندى. «ءبىراق بۇل مەكتەپتەر مەن اۋىلداعى زاماناۋي قۇرال-سايماننان جۇرداي، ينتەرنەتسىز، 40 جىلدان بەرى جوندەۋ جۇمىستارىن كورمەگەن جاداعاي مەكتەپتەردىڭ جاعدايىن سالىستىرۋ – مينيستر ساعادييەۆتىڭ ميىنا قونىپ وتىر. مۇمكىن، قازىرگى داعدارىس كەزىندە سونشاما قارجىنى دالاعا شاشپاي تۇرعانىمىز دۇرىس پا ەدى؟» دەپ جازادى باسىلىم.
