ءال-فارابي اتىنداعى قازۇۋ دەلەگاسياسى سيان كولىك ۋنيۆەرسيتەتىنىڭ 120 جىلدىعىنا ارنالعان ءىس-شارالارعا قاتىستى، - دەپ حابارلايدى «قامشى» پورتالى.
2016 جىلعى 6-10 ءساۋىر ارالىعىندا قازاق ۇلتتىق ۋنيۆەرسيتەتىنىڭ رەكتورى ع.م.مۇتانوۆ باستاعان دەلەگاسيا قىتايدا وتكەن سيان كولىك ۋنيۆەرسيتەتىنىڭ 120 جىلدىعىنا ارنالعان ءىس-شارالارعا قاتىستى. مەرەيتوي اياسىندا الەمدىك دەڭگەيدەگى ۋنيۆەرسيتەتتەردىڭ كورمەسى، مەرەيتويعا ارنالعان كونفەرەنسيا، الەمدىك دەڭگەيدەگى ۋنيۆەرسيتەتتەردىڭ پرەزيدەنتتەرىنىڭ ءسامميتى، جاڭا جىبەك جولى ۋنيۆەرسيتەتتەرىنىڭ اليانسىنىڭ اتقارۋشى كوميتەتىنىڭ پرەزيدەنتتەرى مەن رەكتورلارىنىڭ جينالىسى سياقتى بىرنەشە شارالار وتكىزىلدى.
7 ساۋىردە الەمدىك دەڭگەيدەگى ۋنيۆەرسيتەتتەردىڭ (World-Class Universities Expo) اۋقىمدى كورمەسى ءوتتى. كورمەگە پرينستون ۋنيۆەرسيتەتى (Princeton University)، وكسفورد ۋنيۆەرسيتەتى (University of Oxford)، ستەنفورد ۋنيۆەرسيتەتى (Stanford University) سياقتى بۇكىل الەم بويىنشا 100-دەن استام ۋنيۆەرسيتەتتەر قاتىستى. ءال-فارابي اتىنداعى قازۇۋ ستەندىنە ەرەكشە كوڭىل ءبولىندى. وسى كۇنى سيان قالاسىنىڭ مەرى مەرەيتويعا ارنالعان سالتاناتتى قابىلداۋ وتكىزدى.
8 ساۋىردە سيان كولىك ۋنيۆەرسيتەتىنىڭ سپورتتىق ستاديونىندا مەرەيتويعا ارنالعان سالتاناتتى كونفەرەنسيانىڭ اشىلۋى ءوتىپ، اشىلۋعا 20 مىڭنان استام ادام قاتىستى. سونداي-اق، بۇل كۇنى 100-دەن استام الەمدىك دەڭگەيدەگى ۋنيۆەرسيتەتتەردىڭ رەكتورلارى قاتىسقان سامميت ۇيىمداستىرىلدى. سامميت بارىسىندا ۋنيۆەرسيتەتتەردىڭ مىندەتتەرى جانە مادەنيەتتەردىڭ ارتۇرلىلىگى، اقپاراتتىق داۋىردەگى جوعارى ءبىلىم بەرۋدىڭ مۇمكىندىكتەرى مەن قيىنشىلىقتارى، جاھاندىق اۋقىمداعى دارىندى ستۋدەنتتەردىڭ ۇتقىرلىعى سياقتى كوپتەگەن ماسەلەلەر قاراستىرىلدى.
9 ساۋىردە جاڭا جىبەك جولى ۋنيۆەرسيتەتتەرىنىڭ اليانسىنىڭ اتقارۋشى كوميتەتىنىڭ پرەزيدەنتتەرى مەن رەكتورلارىنىڭ جينالىسى (The President`s Summit for Executive Committee) ءوتتى. 2015 جىلدىڭ مامىر ايىندا سياندا 26 مەملەكەتتىڭ 86 جوعارعى وقۋ ورىندارىنىڭ وكىلدەرى اتالعان اليانستى قۇرعان بولاتىن. قول قويىلعان سيان دەكلاراسياسىنا سايكەس، ۋنيۆەرسيتەتتەر اليانسىنىڭ باستى ماقساتى ءبىلىم بەرۋ سالاسىنداعى ىنتىماقتاستىقتى دامىتۋ ءۇشىن ورتاق الاڭدى قۇرۋعا، مادەنيەتتەر مەن ۇلتتار اراسىنداعى ديالوگتى دامىتۋعا، سونداي-اق، جىبەك جولىنىڭ عىلىمي بەلدەۋى نەگىزىندە كادرلاردى دايىنداۋ، عىلىمي زەرتتەۋلەر، مادەني قارىم-قاتىناس سەكىلدى سالالاردا ۋنيۆەرسيتەتتەر اراسىنداعى ىقپالداستىقتى تەرەڭدەتۋگە باعىتتالعان. بۇل جيىنعا ميلان پوليتەحنيكالىق ۋنيۆەرسيتەتىنىڭ، سيان كولىك ۋنيۆەرسيتەتىنىڭ، گونكونگ پوليتەحنيكالىق ۋنيۆەرسيتەتىنىڭ، ن.ە. باۋمان اتىنداعى ماسكەۋ مەملەكەتتىك تەحنيكالىق ۋنيۆەرسيتەتتىڭ جانە ءال-فارابي اتىنداعى قازۇۋ رەكتورلارى جانە ت.ب. ۋنيۆەرسيتەتتەردىڭ باسشىلارى قاتىستى. جيىندى سيان كولىك ۋنيۆەرسيتەتىنىڭ پرەزيدەنتى پروفەسسور ۆان شۋگو (Wang Shuguo) اشتى.
كۇن تارتىبىنە سايكەس اليانستىڭ حاتشىسى ءبىر جىل ىشىندە جۇزەگە اسىرىلعان شارالارعا توقتالدى. كەزدەسۋدە اليانستىڭ ۋنيۆەرسيتەتتەرى اراسىندا جەلىلىك نىسانىنداعى ىقپالداستىعى، حالىقارالىق ستۋدەنتتىك جازعى مەكتەبىنىڭ وتكىزىلۋى جانە ت.ب. ماسەلەلەر تالقىلانىپ، اتقارۋشى كوميتەتتىڭ قاتىسۋشىلارىنىڭ پىكىرتالاسى ورىن الدى. جينالىستىڭ قورىتىندىسى رەتىندە اليانستىڭ جارلىعى مەن سيان كەلىسىمى قابىلداندى. اليانستىڭ كەلەسى وتىرىسى 2016 جىلدىڭ قاراشا ايىندا گونكونگ پوليتەحنيكالىق ۋنيۆەرسيتەتىنىڭ (The Hong Kong Polytechnic University) 80 جىلدىعىنا وراي وتكىزىلەتىندىگى جوسپارلاندى. كەزدەسۋ كەزىندە باتىسقىتايلىق عىلىمي جانە تەحنولوگيالىق حابىنىڭ (Science and Technology Innovation Harbor) اشىلۋى جاريالانىپ، جىبەك جولى قورىنىڭ (Silk Road Foundation) نەگىزى سالىندى.
مەرەيتويعا ارنالعان ءىس-شارا بارىسىندا سيان كولىك ۋنيۆەرسيتەتىنىڭ (Xi’an Jiaotong University) وكىلدەرىمەن، ونىڭ ىشىندە ۋنيۆەرسيتەت رەكتورى پروفەسسور ۆان شۋگومەن (Wang Shuguo) كەزدەسۋلەر وتكىزىلدى. كەزدەسۋ بارىسىندا تاراپتار ەكى ۋنيۆەرسيتەت اراسىنداعى ىنتىماقتاستىقتىڭ نىساندارى مەن باعىتتارى بويىنشا پىكىر الماستى. اتالمىش ۋنيۆەرسيتەتتىڭ وكىلدەرى ستۋدەنتتەر، ماگيسترانتتار جانە PhD دوكتورانتتارعا ارنالعان حالىقارالىق ستيپەنديالىق باعدارلامالار ۇسىنا وتىرىپ، ءال-فارابي اتىنداعى قازۇۋ-مەن تىعىز قارىم-قاتىناستى دامىتۋعا مۇددەلى ەكەندىگىن ءبىلدىردى. ءال-فارابي اتىنداعى قازۇۋ رەكتورى ع.م.مۇتانوۆ ءوز كەزەگىندە جاڭا جىبەك جولى ۋنيۆەرسيتەتتەرىنىڭ اليانسىنىڭ حالىقارالىق IT-تەحنوپاركىن قۇرۋدى ۇسىندى. بۇل قازۇۋ اياسىندا قۇرىلاتىن سۋپەركومپيۋتەرلىك ەسەپتەۋ ورتالىعىنىڭ نەگىزىندە قالىپتاستىرىلادى.
سونىمەن بىرگە گونكونگ پوليتەحنيكالىق ۋنيۆەرسيتەتىنىڭ پرورەكتورىمەن جانە حالىقارالىق دەپارتامەنتتىڭ ديرەكتورىمەن كەزدەسۋ بولدى. 2016 جىلدىڭ قاراشا ايىندا وتەتىن گونكونگ پوليتەحنيكالىق ۋنيۆەرسيتەتىنىڭ 80 جىلدىق مەرەيتويى اياسىندا وتكىزىلەتىن اليانستىڭ ەكىنشى وتىرىسىنا جانە اليانس ۋنيۆەرسيتەتتەرىنىڭ رەكتورلارى مەن پرەزيدەنتتەرى اليانسىنىڭ فورۋمىنا ءال-فارابي اتىنداعى قازۇۋ وكىلدەرى شاقىرىلدى. اتالعان بايلانىس ماڭىزدى بولىپ تابىلادى، ويتكەنى الەمدىك رەيتينگتە، ونىڭ ىشىندە "جاھاندىق ءبىلىم بەرۋ" باعدارلاماسى اياسىندا جوعارعى ورىندى يەلەنەتىن ۋنيۆەرسيتەتپەن بىرلەسكەن جوبالاردى جۇزەگە اسىرۋ كوپتەگەن مۇمكىندىكتەردى اشادى.
جالپى العاندا، دەلەگاسيانىڭ جۇمىسى قىتايلىق ۇيىمدارمەن جانە الەمدىك دەڭگەيدەگى الدىڭعى قاتارلى ۋنيۆەرسيتەتتەرمەن تىعىز قارىم-قاتىناس ورناتۋعا سەبەپتىگىن تيگىزدى.
