بولشيەۆيكتەر قولدان جاسالعان زۇلمات – اشارشىلىقتان قىرىلعان قازاقتى تۇگەندەيتىن سايت اشىلدى، - دەپ حابارلايدى «قامشى» پورتالى كتك تەلەارناسىنا سىلتەمە جاساپ.

جوباعا قازاقستان پرەزيدەنتىنىڭ مۇراعاتى مۇرىندىق بولىپ وتىرعان كورىنەدى.

«1930-شى جىلدارى اشتىقتان قىرىلعان قازاقتاردىڭ ءاتى-جونىن ەندى «asharshylyg.kz» دەپ اتالاتىن سايتتان تابۋعا بولادى.

جاڭادان ىسكە قوسىلعان ەلەكتروندىق جەلىگە كەز-كەلگەن ازامات ءوزىنىڭ زۇلماتتى جىلدارى قازا تاپقان اتا-باباسىنىڭ ەسىمىن ەنگىزە الادى. وسىلايشا تاريحشىلار قولدان جاسالعان قاسىرەتتىڭ قۇرباندارىن ناقتى دەرەكتەر بويىنشا ەسەپتەمەك. پرەزيدەنت مۇراعاتى مۇرىندىق بولعان باستاماعا باسقا دا اۋداندىق، وبلىستىق دەڭگەيدەگى مۇراعات قىزمەتكەرلەرى مەن زەرتتەۋشى عالىمدار اتسالىسادى دەپ كۇتىلۋدە. سەبەبى، كەڭەس ۇكىمەتىنىڭ سولاقاي ساياساتىنان 1930-شى جىلدارى اشتىقتان قازاق ميلليونداپ قىرىلىپ، ءتىرى قالعاندارىنىڭ وزدەرى جەر اۋىپ كەتكەن»، - دەپ حابارلايدى تەلەارنا.

بوريس جاپاروۆ، ق ر پرەزيدەنتى مۇراعاتىنىڭ ديرەكتورى: 

-سول قىرىلعان كىسىلەر كومۋسىز قالعان. وتانداستارىمىزدىڭ ءاتى-جونى كىم ەدى، قاي جەردە، قانداي جاعدايدا ءولدى دەگەن سۇراقتار تۋىندايدى. ءبىز كوبىنەسە ستاتيستيكانى ايتامىز دا سونىڭ ارتىندا تۇرعان وتانداستارىمىزدىڭ كىم ەكەنىن بىلە بەرمەيمىز. سوندىقتان ءبىزدىڭ باستاپ وتقان جوبامىز رەسپۋبليكالىق دەرەكتەر بازاسى.