وسى اپتادا اقپارات قۇرالدارىنىڭ سىنىنا ارقاۋ بولعان تاقىرىپ -  پارلامەنتتىڭ شارۋاشىلىق باسقارماسى ەلەكتروندى ساتىپ الۋلار پورتالى ارقىلى 11 مىڭ قۇتى اراق-شاراپ ساتىپ الماق بولعان ارەكەتى. اقپارات قۇرالدارىنىڭ جازعانىن الەۋمەتتىك جەلى قولدانۋشىلارى دا ءىلىپ اكەتىپ، دەپۋتاتتاردى جەردەن الىپ جەرگە سالدى. وسى ماسەلەگە وراي، پارلامەنت جاقتان بۇگىن اقتالۋعا ۇقسايتىن رەسمي جاۋاپ شىقتى.

«پارلامەنت شارۋاشىلىق باسقارماسىنىڭ اكىمشىلىك عيماراتتار ديرەكسياسى» رەسپۋبليكالىق مەملەكەتتىك كاسىپورنى دەپ اتالاتىن مەكەمە باق-تاردىڭ ەلەكتروندى پوشتالارىنا ورىن العان جاعدايعا قاتىستى تۇسىنىك بەرگەن باسپا ءسوز حابارلاماسىن جولدادى. وندا كاسىپورىن باسشىلىعى تەندەر جاريالانعان پورتالعا سالىنعان مالىمەتتەردە قاتە كەتكەن دەپ وتىر. شىن مانىندە ساتىپ الىنباق اراق-شاراپ سانى 11 مىڭ قۇتى ەمەس، بار بولعانى 519 شولمەك قانا ەكەن.

«519 دانا الكوگولدى ءونىم ساتىپ الۋ ءۇشىن نارىققا تالداۋ جاسالدى. 11000 دەگەن سان قاتە. ق ر پارلامەنتى شارۋاشىلىق باسقارماسىنىڭ سايتىنداعى جاريالانىمدا ادام فاكتورىمەن بايلانىستى قاتە كەتكەن. مەملەكەتتىك ساتىپ الۋلار پورتالىنداعى ماتەريالداردى كوشىرۋ كەزىندە 519 دانانىڭ ورنىنا 11000 دانا دەپ جازىلىپ كەتكەن. ءقازىر وسى ماسەلە بويىنشا قىزمەتتكە تەكسەرۋ جۇرۋدە. اقپاراتتى بۇرمالاۋعا قاتىسى بارلار تارتىپتىك جازاعا تارتىلاتىن بولادى»، - دەلىنگەن حابارلامادا.

حوش. سونىمەن، پارلامەنتتىڭ شارۋاشىلىق جۇمىستارىنا جاۋاپتى كاسىپورىن حالىق قالاۋلىلارىنىڭ تۇتىنۋى ءۇشىن سپيرتتىك ىشىمدىك الىناتىنىن مويىندادى. تەك، سانىنان قاتە كەتىپتى-مىس. 11000 مەن 519-دىڭ اراسى جەر مەن كوكتەي، ارينە. زاڭ شىعارۋشى ورگانعا قىزمەت كورسەتۋشىلەر دە سول ءۇشىن شىر-پىر بولىپ وتىر.

وسى جەردە تاعى دا «چتو-تو نە تو» دەگىزەتىن تاعى ءبىر ءجايتتى ايتا كەتۋىمىز كەرەك. كاسىپورىن وسى حابارلامادا اتالعان مولشەردەگى اراق-شاراپتى ساتىپ الۋ ءۇشىن 2 ميلليون تەڭگەدەن ارتىق قاراجات بولىنگەنىن جانە ونىڭ رەسپۋبليكالىق قازىناعا قاتىسى جوق، كاسىپورىن بيۋدجەتىنىڭ اقشاسى ەكەنىن جازعان. دوڭگەلەكتەي ەسەپتەي سالعاننىڭ وزىندە، دەپۋتاتتار ءۇشىن الىناتىن ءاربىر شولمەككە شامامەن 4 مىڭ تەڭگە جۇمسالاتىنىن كورەسىز. سول دەپۋتاتتار قابىلداعان زاڭدارعا ساي ەلىمىزدە الكوگولدى ونىمدەرگە بەرىلەتىن اكسيز باعاسىنىڭ جىلدان جىلعا ءوسىپ وتىرعانىن بىلەمىز. ءبىراق، قازاقستاندىق زاۋىتتاردان شىعاتىن اراق-شاراپتى سونشالىقتى قىمباتتادى دەپ تە ايتا المايمىز. الدە، حالىق قالاۋلىلارى «اۋىلدىڭ اراعى ساسىق» دەپ شەتەلدىك ماركالارعا تاپسىرىس بەرگەن بە؟

جومارت ابدوللا ۇلى