بۇگىننەن باستاپ «ەل ارنا» تەلەارناسى ءوز جۇمىسىن توقتاتادى. بۇل تۋرالى «حابار» اگەنتتىگى حابارلادى.

«حابار» اگەنتتىگى» اق 2014 جىلدىڭ 18 ناۋرىزىنان باستاپ، قازاقستاننىڭ 98،8% اۋماعىندا «24KZ» جاڭالىقتار تەلەارناسى تارالاتىنىن حابارلايدى. «24KZ» قازاقستان اۋماعىندا «ەل ارنا» تەلەارناسىنىڭ نەگىزىندە بالامالىق جيىلىكتە ءوز جۇمىسىن جانداندىردى. دەمەك، ەل تۇرعىندارى جاڭالىقتار ارناسىن تەليەۆيزيالىق كادىمگى انتەننا ارقىلى كورە الادى»، - دەلىنگەن حابارلامادا. «24KZ» - ەلىمىزدەگى تاۋلىك بويى اقپارات تاراتاتىن تۇڭعىش تەلەارنا. 2012 جىلدىڭ 1 قىركۇيەگىنەن باستاپ ارنا كورەرمەنگە جول تارتتى. العاشقى ساتتە تەلەارنا ساندىق جانە جەرسەرىكتىك Otau TV ۇلتتىق جەلىسىنىڭ ابونەنتتەرىنە، كابەلدىك تەليەۆيزيا وپەراتورلارىنا قولجەتىمدى بولدى. بۇگىندە «24KZ» - قازاقستانداعى جەدەل اقپارات بەرەتىن تەلەارنا. تاۋلىك بويى ەفيرگە «جاڭالىقتار» توپتاماسىن 48 جانە اقپاراتتىق-تانىمدىق باعدارلاماسىنىڭ 50 شىعارىلىمىن ۇسىنادى. تەلەارنا Reuters، APTN جانە Euronews سەكىلدى الەمگە تانىمال كومپانيالارمەن ارىپتەستىك ورناتقان. مەديا رەسۋرس رەسپۋبليكا بويىنشا تىلشىلەر قوسىنىمەن قامتىلعان.