مالايزيا بيلىگى 8 ناۋرىزعا قاراعان ءتۇنى جوعالىپ كەتكەن «بوينگ 777» بورتىندا شىن مانىسىندە نە بولعانىن انىقتاعانشا، ولار وسى ۇشاقتا بولعانداردىڭ ءارقايسىسىنا قاتىستى مالىمەتتەردى ءجىتى زەرتتەمەك، دەپ حابارلايدى CNN.

ۇشاقتىڭ بورتىندا بولعان 239 ادامنىڭ ءبارى دە تۇتقىن بولۋى مۇمكىن نەمەسە ءارقايسىسى كۇدىككە الىنۋى دا عاجاپ ەمەس. بارلىق جولاۋشىلار دا، ەكى ۇشقىش تا كۇدىكتىلەردىڭ قاتارىندا. سول بورتتا بولعانداردىڭ ءارقايسىسىنىڭ ءومىرى ءجىتى زەرتتەلمەك. «وسى ۇشاقتا بولعانداردىڭ ءارقايسىسىنىڭ ءومىربايانىن زەرتتەۋ كەرەك»، - دەدى نيۋ-يوركتەگى فتب ديرەكتورىنىڭ بۇرىنعى كومەكشىسى بيلل گيەۆين. - ارينە بالالار مەن قارتتار كۇدىكتىلەر قاتارىنا قوسىلمايدى». ەستەرىڭىزگە سالا كەتەيىك، Malaysian Airlines اۋە كومپانياسىنىڭ كۋالا-لۋمپۋردان بەيجىڭگە بەت العان من370 لاينەرىمەن بايلانىس 8 ناۋرىزعا قاراعان ءتۇنى ۇزىلگەن ەدى. ەكيپاج ودان كەيىن بايلانىسقا شىقپاعان جانە اپاتقا ۇشىراعانى جونىندە دابىل بەرمەگەن. اپات ورىن الاتىنداي اۋا رايى دا قولايسىز بولماعان. ۇشاقتاعىلارمەن بايلانىس سوڭعى رەت مالايزيانىڭ شىعىس جاعالاۋىنان 220 شاقىرىم جەردە ورناتىلعان. ۇشاق بورتىندا 227 جولاۋشى مەن 12 ەكمپاج مۇشەسى بولعان. ءتۇرلى ەلدەردەن ۇشاقتار وڭتۇستىك جۇڭگو تەڭىزىندە ىزدەۋ شارالارىن جۇرگىزۋدە. جوعالىپ كەتكەن «بوينگ 777»ء-نى ىزدەۋگە كىرىسكەن ەلدەر سانى 25-كە جەتتى، دەپ حابارلايدى مالايزيانىڭ كولىك ءمينيسترى حيسامۋددين حۋسەين. اپاتقا سەبەپ بولعان نەگىزگى سەبەپتەر مىنالار بولۋى مۇمكىن: تەحنيكالىق اقاۋلىق، قوزعالتقىشتىڭ ىستەن شىعۋى، لاڭكەستەردىڭ شابۋىلى، ۇشاقتى ۇرلاۋ، ەكيپاجدىڭ قاتەلىگى.

قازاقپارات