كىسى ولىمىنە ايىپتى دەپ تانىلىپ، ارتىنشا ءوز باسشىلىعىنىڭ بىلىقتارىن اشكەرەلەيتىن حات جازعان اتىراۋلىق ەكس-پوليسەي 23 جىلعا سوتتالۋى مۇمكىن. بۇگىن مەملەكەتتىك ايىپتاۋشى وزبەكستان ازاماتى دميتريي كيمدى ايۋاندىقپەن ولتىرگەن ماناربەك وتەۋوۆكە وسىنداي جازا سۇرادى، -دەپ حابارلايدى كتك ارناسى.

بۇرىنعى پوليسيا لەيتەنانتىنا قاتىستى سوت پروسەسى وسىدان ءدال 1 اي بۇرىن باستالعان. وتەۋوۆ اباقتىدا قاراپ جاتپاي، ءوزىن بۇل قىلمىسقا باسشىلارىنىڭ يتەرمەلەگەنىن قاعازعا ءتۇسىرىپ جازعان بولاتىن. ءقازىر مامانداندىرىلعان پروكۋراتۋرا قىزمەتكەرلەرى سول حاتقا قاتىستى تەكسەرۋ جۇرگىزىپ جاتىر. ال سوتى ءوتىپ جاتقان ەكس-پوليسەيگە قىلمىستىق كودەكستىڭ 8 بابى بويىنشا ايىپ تاعىلعان. ونىڭ ىشىندە قىزمەت بابىن اسىرا پايدالانۋ، ادام ءولتىرۋ، توناۋ، قىلمىستىق ءىستى ۇيىمداستىرۋ سەكىلدى ايىپتاۋلار بار. ەگەر سوت مەملەكەتتىك ايىپتاۋشىنىڭ سۇراعان مەرزىمىن كەسسە، وتەۋوۆ جازاسىن قاتاڭ تارتىپتەگى تۇرمەدە وتەيدى.

رامازان كامەل، مەملەكەتتىك ايىپتاۋشى:

-سوتتالۋشى وتەۋوۆ ماناربەككە ءومىر بويى مەملەكەتتىك قىزمەت اتقارۋ قۇقىنان ايىرىپ، قىلمىستىق جولمەن تابىلعان مۇلكىن تاركىلەي وتىرىپ، پوليسيا لەيتەنانتى ارناۋلى شەنىنەن ايىرىپ، 23 جىلعا باس بوستاندىعىنان ايىرۋ جازاسىن تاعايىنداۋدى، جازا وتەۋ ورنىن قاتاڭ رەجيمدەگى تۇزەۋ كولونياسى دەپ بەلگىلەۋدى سۇرايمىن