وتانداسىمىز قانات يسلامنىڭ كاسىپقوي بوكستاعى 21-جەكپە-جەگىن «قازاقستان» ۇلتتىق ارناسى تىكەلەي ەفيردە كورسەتۋدى جوسپارلاۋدا، - دەپ حابارلايدى Qamshy.kz پورتالى. بۇل تۋرالى «قازاقستان» رترك» اق باسپا ءسوز قىزمەتىنەن حابار تاراتتى.
كاسىپقوي بوكس الەمىندە «قازاق» اتىمەن تانىلعان يسلامنىڭ بۇل جولعى قارسىلاسى 28 جاستاعى كولۋمبيالىق بىلعارى قولعاپ شەبەرى حۋان دە انحەل.
باستى كەزدەسۋى يسلام مەن دە انحەل اراسىنداعى جەكپە-جەك بولىپ تابىلاتىن رەيتينگتىك بوكس كەشى 9 مامىر كۇنى اقش-تىڭ فلوريدا شتاتىنداعى لەيكلەند قالاسىندا استانا ۋاقىتىمەن تاڭعى 07:00-دە باستالادى.
ەستەرىڭىزگە سالا كەتەيىك، كاسىپقوي بوكسقا 2012 جىلى اۋىسقان قانات يسلام بۇعان دەيىنگى وتكىزگەن 20 جەكپە-جەگىنىڭ بارلىعىندا جەڭىسكە جەتكەن. ونىڭ ىشىندەگى 17 كەزدەسۋدە وتانداسىمىز قارسىلاستارىن نوكاۋتقا تۇسىرگەن.
ايتا كەتەيىك، 2011 جىلى اتاجۇرتى - قازاقستانعا ورالعان قانات سول جىلى قۇرىلعان بۇكىلالەمدىك بوكس سەرياسىنداعى (WSB) اتاقتى Astana Arlans كومانداسىنا قابىلدانىپ، وتانداستارىن رينگتەگى جارقىن ونەرىمەن قۋانتادى.
بۇگىندە قانات امەريكا قۇراما شتاتتارىندا جاتتىعادى. باپكەرى - تانىمال امەريكالىق مامان نەلسون لوپەس. دە انحەلگە قارسى جەكپە-جەك - قاناتتىڭ كاسىپقوي بوكستاعى كەڭ اۋقىمدى تەلەارنا كورسەتەتىن العاشقى كەزدەسۋى.
