رەسەي قىتايدىڭ شىڭجاڭ ۇيعىر اۆتونوميالى ولكەسىنە قازاقستان اۋماعى ارقىلى سۋ ايداماق، - دەپ حابارلايدى Qamshy.kz lenta.ru-عا سىلتەمە جاساپ.
رەسەي اۋىلشارۋاشىلىق ءمينيسترى الەكساندر تكاچيەۆ قىتايدىڭ شىڭجاڭ ولكەسىنە تۇششى سۋ ايداۋعا ءازىر ەكەندىكتەرىن مالىمدەدى. بۇل شارۋا ەكى تاراپ كەلىسسە، قازاقستان اۋماعى ارقىلى جۇزەگە اسپاق ەكەن.
«ءبىز رەسەيدىڭ التاي ايماعىنان قىتايدىڭ قۇرعاقشىلىققا ۇشىراپ وتىرعان شىڭجاڭ ۇيعىر اۆتونومياسىنا قازاقستان رەسپۋبليكاسى ارقىلى سۋ ايداۋ تۋرالى جوبانى جۇزەگە اسىرۋعا ءازىرمىز. جاقىن كۇندەرى وسى ماسەلەگە وراي قازاقستان تاراپىمەن كەڭەسەمىز»، - دەيدى ا. تكاچيەۆ.
رەسەيلىك مينيستر ەكى ەلدىڭ ساراپشىلارىنا وسى ماسەلەگە وراي ءوزارا كەڭەسىپ، ناقتى ماتەريالدار الماسۋعا كەڭەس بەرەدى.
رف اۋىلشارۋاشىلىق مينيسترلىگى مەليوراسيا دەپارتامەنتى التاي ايماعىنىڭ سۋ رەسۋرستارىن ءتيىمدى پايدالانۋ ماقساتىندا قىتايعا 70 ميلليون تەكشە مەتر سۋ ايداۋدى ۇسىنىپ وتىر.
