بۇرىنعى ءبىلىم جانە عىلىم ۆيسە-مينيسترى مۇرات ابەنوۆ 15 جاستان اسقان وقۋشىلار ءۇشىن مەكتەپ فورماسىن الىپ تاستاۋدى ۇسىندى، - دەپ حابارلايدى Qamshy.kz NewTimes.kz اگەنتتىگىنە سىلتەمە جاساپ. 

" 15-كە تولماعاندار ءۇشىن مەكتەپ فورماسى اۋاداي قاجەت. ال 15 جاستان كەيىن بالالار ءوز كوزقاراستارىن كورسەتە باستايدى. ولار تۇلعا رەتىندە قالىپتاسىپ، ءوزىنىڭ وزگەلەردەن ەرەكشە ەكەنىن كورسەتكىسى كەلەدى. ءبىز ولارعا بۇل تۇرعىدا قولداۋ كورسەتۋىمىز كەرەك. 15 جاستان كەيىن مىندەتتى مەكتەپ فورماسىن تالاپ ەتۋگە بولمايدى"، - دەيدى ابەنوۆ.

ول مەكتەپ فورماسى ەل ءيميدجىن قالىپتاستىرۋ ءۇشىن مىندەتتى تۇردە قازاقستاندا تىگىلۋى كەرەكتىگىن العا تارتتى.

"مەكتەپ فورماسى قازاقستاندا ساپالى ءبىراق قىمبات ەمەس ماتالاردان تىگىلۋى كەرەك. مۇنىڭ ەش قيىندىعى جوق. ول قولىمىزدان كەلەدى دەپ ويلايمىن"، - دەيدى ابەنوۆ.