جەردەن بولەك، جەر قويناۋىنداعى قازىنا دا اۋكسيون ارقىلى ساتىلا باستادى. ەلىمىزدەگى پايدالى قازباعا تۇنىپ تۇرعان 100-دەن اسا كەن ورنى 16-شى ماۋسىمدا اشىق ساۋداعا شىعارىلماق، - دەپ حابارلايدى Qamshy.kz كتك ارناسىنا سىلتەمە جاساپ.

قازاقستاننىڭ كەز-كەلگەن قالتالى ازاماتى مەن شەتەلدىكتەر اۋكسيونعا قاتىسىپ، باعالى، ءتۇرلى-تۇستى مەتالل، التىن، مىس، ءتىپتى المازى بار كەن ورنىن ساتىپ الۋعا قاقى بار. ەڭ قىمبات باعا ۇسىنعان بايلار قويناۋى قازىناعا تولى جەردىڭ يەسى اتانادى.

ءبىرىنشى كەزەڭ بويىنشا، اقمولا وبلىسىنداعى «كومسومول» كەن ورنى ساۋداعا تۇسەدى. ونىڭ  باستاپقى قۇنى 9 جارىم ميلليون. ال، سولتۇستىك قازاقستانداعى المازى بار «قاراتال» كەن ورنىنىڭ باستاپقى باعاسى  600 مىڭ تەڭگە. اۋكسيونعا قاتىسۋعا نيەتتى ينۆەستورلار مەن جەرگىلىكتى كاسىپكەرلەر 26-شى مامىرعا دەيىن ءوتىنىش جازۋى ءتيىس. جەر قويناۋىنداعى بايلىقتى جاپپاي ساتۋ ناۋقانى بىلتىر باستالعان بولاتىن. ول كەزدە ساۋداعا قويىلعان 100 كەن ورنىنىڭ 49-ى ساتىلىپ، بيۋدجەتكە 1 جارىم ميلليارد تەڭگە تۇسكەن.