وڭتۇستىك قازاقستان وبلىسى سايرام اۋدانىنىڭ 28 جاستاعى تۇرعىنى رابياي شەرمەتوۆا ءتورت بىردەي نارسەتەنى دۇنيەگە اكەلدى. وڭىردە بىردەن ءتورت ءسابي تۋۋ سوڭعى ون جىلدا العاش رەت ورىن الىپ وتىر، دەپ حابارلادى وقو دەنساۋلىق ساقتاۋ باسقارماسى باستىعىنىڭ ورىنباسارى سالتانات جاباعييەۆا.

ءتورت نارەستە 11 ناۋرىز كۇنى جارىق دۇنيە ەسىگىن اشقان. ەڭ ءبىرىنشى بولىپ 1500 گر سالماقپەن فاتيما ەسىمدى قىز بالا تۋدى. ونىڭ ارتىنان حاسان (1590 گر)، زۋحرا (1200 گر) دۇنيەگە كەلدى. تورتەۋدىڭ سوڭعىسى زاحرا 1490 گرامم سالماقپەن تۋدى. اناسى مەن بالالاردىڭ جاعدايى ءبىرقالىپتى دەيدى دارىگەرلەر. اكۋشەر دارىگەر گۇلجانات بايزاقوۆانىڭ ايتۋىنشا، ەندى بالالارعا كۇتىم كورسەتۋدىڭ ەكىنشى كەزەڭىنە اۋىسۋ جوسپارلانۋدا. بالالار اناسىنىڭ سۇتىمەن قورەكتەنۋدە، ءبىراق ولار سالماقتارى تىم از بولۋىنا وراي قوسىمشا تاماقتاندىرىلىپ جاتىر. ر.شەرمەتوۆانىڭ 7 جاسار ۇلى بار ەكەن. «ۋدز قۇرساعىمدا ءتورت ءسابي بار ەكەنىن كورسەتكەندە، جولداسىم باسىندا شوشىپ كەتكەنمەن، ارتىنشا قاتتى قۋاندى. بالالاردىڭ تورتەۋ ەكەنىن جۇكتىلىكتىڭ ەكىنشى ايىندا ءبىلدىم. كوتەرۋ وڭاي بولمادى، جاتىرىمدا ىسىك بولدى، سوندىقتان دا اۋىر سوقتى»، - دەيدى كوپ بالالى انا. ر.شەرمەتوۆا اۋرۋحاناعا 11 ناۋرىز كۇنى تۇسكەن. «بىرنەشە نارەستە كوتەرىپ جۇرگەندىكتەن، وعان شۇعىل وتا جاسالدى، تەحنيكالىق قيىندىقتار بولعان جوق»، - دەيدى اكۋشەر-گينەكولگ. نارەستەلەر 6 كۇن جان ساقتاۋ بولىمىندە بولعان، ال ءقازىر انالارىنىڭ جانىندا.

قازاقپارات