قاتتى جاۋعان جاڭبىر سالدارىنان ارناسىنان اسقان ەسەنتاي وزەنى جاعالاۋدى شايىپ، ونداعى جەر ۇيلەردىڭ ءبىرىنىڭ مونشاسىن كۇل-تالقان ەتكەن، - دەپ حابارلايدى Qamshy.kz informburo.kz – كە سىلتەمە جاساپ.

وقيعا 1 مامىر كۇنى ءتۇس كەزىندە بولعان. استىن سۋ شايعان مونشانىڭ وزەن ارناسىنا قۇلاعان ءساتى تۇسىرىلگەن ۆيدەو الەۋمەتتىك جەلىلەردە جاريالانۋدا.

«قاتتى جاۋعان جاۋىن سالدارىنان مەدەۋ اۋدانىندا ەسەنتاي وزەنىنىڭ شىعىس جاق جاعالاۋى شايىلىپ كەتتى. سالدارىنان جەكە تۇرعىن ءۇي سەكتورىنا قاراستى شارۋاشىلىق عيماراتى قۇلادى. وقيعا ورنىنا توتەنشە جاعدايلار باسقارماسىنىڭ ماماندارى باردى. زارداپ شەككەندەر جوق»، - دەيدى الماتى قالالىق تجد باسپا ءسوز حاتشىسى ساندۋعاش بايمۇحانوۆا.

ەستەرىڭىزگە سالساق، 29 ءساۋىر كۇنى تۇندە الماتىنىڭ الاتاۋ جانە جەتىسۋ اۋداندارىندا قاتتى جاۋعان نوسەر سالدارىنان بىرنەشە ءۇي سۋ استىندا قالعان بولاتىن. 30 ءساۋىر كۇنى الماتىداعى العاباس ەلدى مەكەنىندە دە بىرنەشە ءۇيدى سۋ باستى. قارعالى وزەنىنىڭ ارناسىنان اسۋى ناتيجەسىندە سۋ دەڭگەيى 30 سم-گە كوتەرىلىپ، 59 جەكە تۇرعىن ءۇيدىڭ اۋلاسىنا سۋ كىرگەن بولاتىن.

سونىمەن قاتار، قۇتقارۋشىلار الداعى كۇندەرى وسىنداي جاعدايدىڭ تاعى دا قايتالاناتىنىن جوققا شىعارمايدى. قالا باسشىلىعى العاباس ەلدى مەكەنىندەگى زارداپ شەككەن تۇرعىندارعا 100 اەك (212000) تەڭگە كولەمىندە قاراجات تولەيتىنىن حابارلاعان.