ەلگە تانىمال ءانشى ساكەن مايعازييەۆ ايەلدەر تۇزەتۋ مەكەمەسىنە بارىپ، تەمىر توردىڭ ار جاعىندا كۇنەلتىپ جۇرگەن انالار مەن قىزدارعا ارناپ كونسەرت قويدى، - دەپ حابارلايدى Qamshy.kz Stan.kz – كە سىلتەمە جاساپ.

ءوز تىڭدارماندارىن قالىپتاستىرىپ، قازاق ساحناسىندا ەشكىمگە ۇقسامايتىن داۋسىمەن ەرەكشەلەنەتىن ءانشى ساكەن مايعازييەۆ ايەلدەر كولونياسىنا باردى. ول اتالعان مەكەمەدە كونسەرت قويىپ، ۇلكەن كىسىلەردىڭ اق باتاسىن الدى.

«جىلاعان جۇرەكتەردى جۇباتىپ، اق باتالارىن الىپ قايتتىق. بوستاندىقتىڭ باعاسىن بىلمەي ءجۇرمىز-اۋ دەگەن وي تاعى كەلدى. 2013 جىلى دا ايەلدەر مەرەكەسى قارساڭىندا شاكىرتتەرىممەن بارىپ، كوڭىلدەرىن كوتەرىپ قايتقان ەدىم، بۇل جولعى كەزدەسۋىمىزگە كەنجەبەك تۇزدىق بولدى. ءار ءاننىڭ ماتىنىنە ءمان بەرىپ، ساعىنىشتان سارعايىپ كوزىنە جاس العان انالار مەن بولاشاق انالاردى كورگەندە ەركەك باسىڭمەن ەرىكسىز… اللا تاعالا مۇنداعى نازىك جاندىلاردىڭ ەرتەرەك وتباسىنا ورالۋلارىن ءناسىپ ەتكەي»، – دەپ ءانشى كونسەرت بارىسىندا ءبىر جىلاپ العانىن ايتتى.

مۇنى بىلگەن تىڭدارماندارى مايعازييەۆكە العىس جاۋدىردى. «جارايسىڭ، ساكە. ءبىر ءسات بولسىن ايەلدەرگە قۋانىش سىيلاپ، ولاردى باقىتتى ەتكەنىڭ ءۇشىن راحمەت» سىندى پىكىرلەر ءبىلدىرىپ، ءانشىنىڭ بۇل ارەكەتىن قولداي تۇسكەن.

ءانشى وسى ۋاقىتقا دەيىن ءانىن ءسۇيىپ تىڭدايتىن تىڭدارماندارىنىڭ ۇيىندە قوناق بولىپ، ولاردى ەرەكشە كوڭىل-كۇي سىيلاعان-دى.