الماتىدا جوعالعان ستۋدەنتتىڭ ءمايىتى ەسەنتاي وزەنىنەن تابىلدى، - - دەپ حابارلايدى Qamshy.kz الماتى قالاسى ءىىد باسپا ءسوز قىزمەتىنە سىلتەمە جاساپ.
س. اسپاندياروۆ اتىنداعى قازاق ۇلتتىق مەديسينالىق ۋنيۆەرسيتەتىنىڭ ستۋدەنتى سانجاربەك ارزييەۆتى ىزدەستىرۋ جونىندەگى جەدەل تەرگەۋ توبى ستۋدەنتتىڭ ءمايىتىن ەسەنتاي وزەنىنەن تاپقان.
«توپتىڭ حابارلاۋىنشا مۇردە وزەننىڭ رىسقۇلوۆ داڭعىلى تۇسىنان تابىلعان. ىزدەستىرۋ شارالارى بارىسىندا سۋ رەسۋرستارىن باسقارۋ جونىندەگى باسقارماعا ەسەنتاي وزەنىنىڭ سۋىن باسقا كوزدەرگە باعىتتاۋ ارقىلى تومەندەتۋ تۋرالى ءوتىنىش جاسالعان بولاتىن. باسقارما ءوتىنىشتى قاناعاتتاندىرىپ، ناتيجەسىندە جاس جىگىتتىڭ مۇردەسى سۋ تۇبىنەن تابىلىپ وتىر»، - دەلىنگەن ءىىد تاراتقان حابارلامادا.
ءقازىر سوت-مەديسينالىق ساراپتاما تاعايىندالدى. تەرگەۋ بارىسىندا وقيعاعا قاتىستى باسقا دا جاعدايلار ناقتىلاناتىن بولادى.
ەستەرىڭىزگە سالساق، س. اسپاندياروۆ اتىنداعى قازاق ۇمۋ ستۋدەنتى سانجاربەك ارزييەۆ ءساۋىردىڭ 29-ىنان 30-ىنا قاراعان ءتۇنى تۋعان كۇننەن تاكسيمەن قايتىپ كەلە جاتىپ، تاكسيدەن تۇسكەن بەتتە جوعالىپ كەتكەن بولاتىن. كوشەدەگى بەينەباقىلاۋ كامەرالارىنىڭ بىرىنە ونىڭ ەسەنتاي وزەنىنە قۇلاپ كەتكەن ءساتى جازىلىپ قالعان. الايدا، سۋعا تۇسكەن سۇڭگۋىرلەر جوعالعان ستۋدەنتتىڭ ءمايىتىن تاپپاعان ەدى.
