قازاقستاندىقتارعا جەر كودەكسىنىڭ دۇرىس تۇسىندىرىلمەۋىنە دەپۋتاتتار كىنالى دەپ ەسەپتەيدى ءماجىلىس دەپۋتاتى نۇرتاي ءسابيليانوۆ. ونىڭ پىكىرىنشە، حالىق جەر تۋرالى زاڭدى دۇرىس تۇسىنبەگەندىكتەن ەلدە جەر ساۋداسىنا قاتىستى داۋلى ماسەلەلەر ءجيى تۋىنداپ وتىرعان كورىنەدى، - دەپ حابارلايدى Qamshy.kz informburo.kz پورتالىنا سىلتەمە جاساپ.

"ءبىز مويىندايمىز، بۇل بىرىنشىدەن ۇكىمەتتىڭ قاتەلىگى، ءبىزدىڭ دەپۋتاتتاردىڭ قاتەلىگى. ءبىز حالىققا ءتيىستى دەڭگەيدە ءتۇسىندىرۋ جۇمىستارىن جۇرگىزگەنىمىز جوق، ونى مويىندايمىز. اسىرەسە، جەر كودەكسىنە ەنگىزىلگەن تۇزەتۋلەر مەن وزگەرتۋلەرگە قاتىستى. ءتۇسىندىرۋ جۇمىستارىن جىل باسىندا، ءتىپتى، بىلتىر بۇكىل وبلىستاردا، اۋدان-قالالاردا جۇرگىزۋىمىز كەرەك ەدى" دەدى ءماجىلىس دەپۋتاتى سەمەي قالاسىنداعى سايلاۋشىلارىمەن كەزدەسۋ بارىسىندا.

ءسابيليانوۆ سەمەيگە وسى جەر كودەكسىنە بايلانىستى ارنايى كەلىپ وتىر. قازاستاندىقتاردى اياعىنان تىك تۇرعىزعان وسىناۋ زاڭنىڭ قىر-سىرىن دەپۋتات ءوز جەرلەستەرىنە ءتۇسىندىرىپ كورمەكشى. ونىڭ ايتۋىنشا، جەردى جالعا بەرۋدىڭ ۋاقىتىن سوزۋعا قاتىستى وزگەرىس زاڭعا 2014 جىلى ەنىپ كەتكەن. ءبىراق، كوپشىلىك مۇنى بىلتىرعى جاڭالىق دەپ ەسەپتەپ وتىر دەيدى حالىق قالاۋلىسى. بۇعان دەيىن بيلىك وكىدەرى جاپپاي قايتالاعانداي، ءسابيليانوۆ تا قازاقستان جەرىنىڭ شەتەلدىكتەرگە ەشقاشان ساتىلمايتىنىن، تەك جالعا بەرىلەتىنىن ەسكەرتتى. ساتىپ الۋ ءۇشىن قازاقستان ازاماتى نەمەسە قازاقستاندا تىركەلگەن زاڭدى تۇلعا بولۋى ءتيىس.

"قازاقستاندا 100 ميلليوننان استام اۋىلشارۋاشىلىق جەرلەرى بار. ونىڭ 99،5 ميلليونىن قازاقستاندىقتار جالعا الىپ وتىر. ال، وسى 99،5 ميلليون گەكتاردىڭ 65 مىڭ گەكتارى شەتەلدىكتەردە. بۇل نەبارى 0،06 پايىز. دەگەنمەن، سول 65 مىڭنىڭ 45 مىڭى بىرلەسكەن كومپانيالاردىڭ ەنشىسىندە. ءاۋ باستا حالىققا ءدال وسىلاي ءتۇسىندىرۋىمىز كەرەك ەدى" دەيدى دەپۋتات.

ونىڭ ايتۋىنشا، شقو-دا ءىرى ينۆەستورلار جوق. شەتەلدىك كومپانيالارعا جالعا 300 گەكتار جەر بەرىلگەن.

"ال، قالعان جەر تەلىمدەرى ءوز ازاماتتارىمىزدا. ءبىز ولارعا بۇل جەرلەردى جەڭىلدىكپەن ساتىپ الۋعا ۇسىنىس جاساپ وتىرمىز. ولار جۇمىس ىستەۋى كەرەك، جەر يگەرىلۋى كەرەك" دەپ اتاپ ءوتتى ءماجىلىس دەپۋتاتى. ول سونداي-اق، جەر كودەكسىنە قاتىستى حالىق تاراپىنان ۇسىنىس بولسا پارلامەنت قابىرعاسىندا مىندەتتى تۇردە قارالاتىنىن دا ەسكەرتتى.