اسقار جاكۋلين اتىنداعى قور ناۋقاس بالالارعا قۋانىش سىيلادى

/uploads/thumbnail/20170709010134849_small.png

«اسقار جاكۋلين اتىنداعى قايىرىمدىلىق قورى». بۇل اتاۋدى ەستىگەن كوپشىلىك جۇرت اسقار جاكۋلين دەگەن كىم دەۋى ابدەن مۇمكىن. سەبەبى ونىڭ ەسىمى التى الاشقا اسا تانىمال دەپ ايتا المايمىز. ەگەر ونىڭ اتاسى جاكۋلا 1800 جىلدارى-اق ەۋروپالىق دەڭگەيدە مەديسينالىق ءبىلىم السا، بولىس اتانسا، تاۋەلسىزدىگىمىزدىڭ ىرگە تاسى «الاشوردا» ءۇشىن قىزمەت ەتسە، ال اكەسى ءانۋار قىتايداعى ىلە ايماعىنىڭ ءۋاليى اتانىپ، شىڭجاڭ ولكەسىنىڭ پوليسيا باستىعى بولسا، قحر حالىق قۇرىلتايىنىڭ ءبىرىنشى شاقىرىلىم دەپۋتاتى بولسا، وندا اسقار كىم بولۋى مۇمكىن؟

اسقار – سونداي تەگەۋرىندى تەكتى اتالارىنىڭ اماناتىن اتاجۇرتتا جالعاعان ازامات ەدى... كوزى تىرىسىندە كوپ مال-مۇلىكتىڭ يەسى اتاندى. بىلايعى جۇرتتىڭ ءبىرازى ونى ەڭ الدىمەن «قالتاسى قالىڭ» باي رەتىندە تانيتىن... ءبىراق اسەكەڭ ءوزىنىڭ كىم ەكەنىن ولەر الدىنداعى وسيەت حاتىندا «التىن ارىپپەن» جازىپ كەتىپتى:«مەن ءۇشىن ومىرىمدەگى ەڭ كەرەمەت وقيعا – قازاقستاننىڭ تاۋەلسىزدىك الۋى، ەڭ ۇلى شەشىمىم – قازاقستانعا قونىس اۋدارۋىم...». بۇدان ارتىق قازاق بالاسى ءۇشىن قانداي ءسوز كەرەك؟ قىتايدا تۋىپ، گەرمانيادا وقىپ، پەكيندە قىزمەت اتقارعان اسقارعا ميلليارد جۇڭگو ىشىندەدە «التىن تاعى» سايلاۋلى ەدى... ءبىراق اسقار ءۇشىن تاۋەلسىزدىگىن ەندى الىپ، قالت-قۇلت ەتىپ تۇرعان قازاقستانعا قىزمەت ەتۋ قىمباتىراق بولدى. وتباسىمەن قونىس اۋداردى، بيزنەس باستادى، قۇرىلىسقا قاجەتتى تەحنيكا تاسىدى... ءوزى دە بايىدى، وزگەلەردى دە توق قىلدى. اعايىن-تۋىسقا قول ۇشىن سوزدى. اتاسى جاكۋلانىڭ اسىن التى الاشقا دۇرىلدەتىپ وتكىزدى.

ءبىر اتتەگەن-ايى - ايدانا مەن ايقۇت ەسىمدى ەكى بالاسى جاستاي قالدى ارتىندا. ءبىر قۋانتاتىنى - اسەكەڭنىڭ ومىردەن وتكەنىنە 100 كۇن تولماي جاتىپ، جارى جاينا جاكۋلينا قۇرعان قايىرىمدىلىق قور قازاققا قىزمەت ەتە باستادى...

كەشە عانا الماتىداعى «اقساي» ۋنيۆەرسيتەتتىك كلينيكالىق بالالار اۋرۋحاناسىندا «اسقار جاكۋلين اتىنداعى قايىرىمدىلىق قور» ايتۋلى شارا وتكىزدى. قور قۇرىلتايشىلارى قۇنى 4 ميلليون تەڭگەدەن استام ساۋىقتىرۋ قوندىرعىلارىن بالالار اۋرۋحاناسىنا تابىستاپ، سوندا قىزمەت اتقاراتىن دارىگەرلەر مەن دەرتىنە شيپا ىزدەگەن سابيلەردىڭ شەكسىز العىسىنا بولەندى. اقىن، قازاقستان رەسپۋبليكاسىنىڭ مادەنيەت قايراتكەرى الماس احمەتبەك، قور قۇرىلتايشىسى جاينا جاكۋلينا، قور ديرەكتورى گۇلنار سەيدوللا باستاعان توپ زاماناۋي ەمدەۋ قوندىرعىلارىنىڭ تۇساۋكەسەر راسىمىنە قاتىستى. اۋرۋحانا ديرەكتورى يرينا برەجنيەۆا حانىم «اسقار جاكۋلين اتىنداعى قايىرىمدىلىق قورىنا» شەكسىز ريزاشىلىعىن ءبىلدىردى. اسقار جاكۋلين مىرزانىڭ اۋلەتىنە راحمەت ايتىپ، كوپشىلىكتەن مارقۇمدى ءبىر مينۋت ەسكە الۋدى سۇرادى. اۋرۋحانا قىزمەتكەرلەرىنىڭ ايتۋىنشا، يرينا حانىم كەزىندە اتاعى دۇركىرەپ، كەيىن «قاراۋسىز» قالعان اۋرۋحانانى قايتا تۇلەتكەن اق حالاتتى ابزال جان ەكەن. ال سول اۋرۋحانادا 40 جىل قىزمەت اتقارعان نەسىبەلى ەسىموۆا اپاي اسقار جاكۋلين مىرزانىڭ رۋحى قاتارىمىزدا تۇرعانداي سەزىندىم دەپ كوڭىل تولقىنىسىن اقتاردى. تۇساۋكەسەر ءراسىمىن ديرەكتور ورىنباسارى ايدار مامەدوۆ جۇرگىزدى.

اقىن الماس احمەتبەك ۇلى اۋرۋحانا ۇجىمى مەن اۋرۋىنا شيپا ىزدەپ كەلگەن جاندارعا اسقار جاكۋلين تۋرالى قىسقاشا مالىمەت بەردى. «اسقارداي ازاماتتىڭ 17 اي بويى اۋرۋ ازابىن بىرگە بولىسكەن جارى جاينا جاكۋلينانىڭ» قايىرىمدىلىق قورىن قۇرىپ، ناۋقاس بالالارعا كومەكتەسكەنىنە تىلەكتەسىگىن جەتكىزدى. ال قور ديرەكتورى گۇلنار سەيدوللا حانىم الداعى ۋاقىتتا دا ءزارۋ مەكەمەلەرگە قول ۇشىن سوزىپ، اۋرۋ جاندارعا شيپا سىيلاۋ – قايىرىمدىلىق قوردىڭ باستى ماقساتى دەدى.

ەڭ اسەرلى ءسات – جاڭا قوندىرعىلاردىڭ ەمىنە ءزارۋ بولىپ وتىرعان بالالاردىڭ، ولاردىڭ اتا-انالارىنىڭ، سول ەمدى قولمەن جاساپ جۇرگەن دارىگەرلەردىڭ سوزدەرىن ەستىگەندە تولقىماعان جان قالمادى.

ايتا كەتەرلىگى – «اسقار جاكۋلين اتىنداعى قور» بۇعان دەيىن دە شىعىس قازاقستاندا جۇلدە قورى 2،5 ميلليون تەڭگەنى قۇرايتىن وقۋشىلار اراسىندا وليمپيادا وتكىزىپتى.

ءيا، اتام قازاق ايتقانداي، «جاقسىدان شاراپات، جاماننان كەسەپات»، «جاقسىنىڭ اتى ولسەدە حاتى ولمەيدى»... اسەكەڭنىڭ جارى جاينا مەن باۋىرلارىنىڭ سوزىنەن اڭعارعانىمىز – «اسقار جاكۋلين اتىنداعى قوردىڭ» اتقاراتىن قىزمەتى الدا. اسىرەسە، قازاق بالاسىنىڭ اۋرۋىنا ەم، دەرتىنە شيپا تابۋىنا ايانىپ قالمايمىز دەپ وتىر. سونداي-اق، وقۋشىلار اراسىندا وتەتىن «جاكۋلا كۇشىك ۇلىنىڭ» اتىنداعى وليميپيادانىڭ دا جىل سايىن كەمەلدەنىپ، كەڭەيە تۇسەتىنىنە نىق سەنىمدى.

اسقار مارقۇمنىڭ رۋحى ءجانناتتا شالقىعاي!