كاسىپقوي بوكستا «قازاق» دەگەن اتپەن تانىمال قانات يسلام كاسىبي الاڭداعى كەزەكتى جيىرما ءبىرىنشى كەزدەسۋىن 28 جاستاعى بوكسشى حۋان دە انxەلمەن وتكىزىپ، 6-راۋندتا قارسىلاسىن تەxنيكالىق نوكاۋتقا جىبەردى.

كولۋمبيالىق بوكسشى قاناتتىڭ وڭ جۇدىرىعىنىڭ اۋىر سوققىسىن العاشقى راۋندتا-اق الىپ ۇلگەردى. ەكىنشى راۋندتا از-ماز بەلسەندىلىك تانىتقان دە انxەلدىڭ كۇشى ودان ارىگە جەتپەدى. ءۇشىنشى راۋندتا قاناتتىڭ سول قولىمەن بۇيىردەن سوققان سوققىسى دا وڭايعا سوقپادى. بەسىنشى راۋندتا ءبىر ەسەڭگىرەپ ەس جيعان حۋاننىڭ قۋانىشى كوپكە سوزىلمادى. التىنشى راۋندتا قاناتتىڭ نوكاۋتىمەن اياقتالدى.

ەستەرىڭىزگە سالساق، جەكپە-جەك الدىندا قوس بوكسشى سالماق ولشەتىپ، وندا قاناتتىڭ سالماعى 152،8 فۋت، حۋان دە انxەلدىكى 154،2 فۋتتى قۇراعان بولاتىن. وسى رەتتە كولۋمبيالىق كاسىپقوي بوكسشى حۋاننىڭ دا قۇر جۇرگەن جان ەمەستىگىن ايتا كەتۋ كەرەك. كاسىپقوي بوكستا 22 كەزدەسۋ وتكىزگەن ول ونىڭ 18ء-ىن جەڭىسپەن اياقتاعان. 17 نوكاۋند اۆتورى.

الايدا، سپورت ساراپشىلارى باعالاعان بۇل ارتىقشىلارى حۋاندى قاناتپەن كەزدەسۋدە قۋانتا قويمادى. جەكپە-جەك الدىندا دا جەرلەسىمىزدىڭ بۇل كەزدەسۋدى دە جەڭىسپەن اياقتايتىنىنا ەشكىمنىڭ كۇمانى بولماعانىن ايتا كەتۋ كەرەك.

قاناتتىڭ كاسىپقوي بوكستاعى قازىرگى باپكەرى ءارى مەنەدجەرى نەلسون لوپەس كەزدەسۋ الدىندا بوكسشى تۋرالى: «قازاقستاندا ءدال ءقازىر GGG ءبىرىنشى بولسا، ال قانات يسلام ونىڭ ارتىنان ەرىپ كەلەدى»،-دەگەن بولاتىن. «قازاقستاندا قانات يسلام وتە تانىمالدىلىققا يە جانە مىڭداعان جانكۇيەرلەرى جەتەرلىك. قانات قازاقستاندا تۇرىپ جاتقانىنا 6 جىلداي بولدى، ءبىراق بىزبەن بىرگە جاتتىعۋدا»، - دەيدى ن. لوپەس. «قانات يسلامدى الەم چەمپيونى گەناديي گولوۆكين(160)، بۇرىن الەم چەمپيونى بولعان ۆاسيليي جيروۆ (200)، بەيبىت شۇمەنوۆ(175) جانە جەڭىلىس كورمەگەن سەرگەي ليپينەس (147) سەكىلدى قازاق ساربازدارىمەن سالىستىرۋعا بولادى. ولار بارلىعى باۋىر سەكىلدى. قانات شىندىعىندا ولاردى باقىلاپ وتىرادى. ءدال ءقازىر قازاقستاندا GGG ءبىرىنشى بولسا، قانات ونىڭ ارتىنان ەرىپ كەلەدى.بىزگە شىندىعىندا جەڭىس كەرەك جانە وسى جەكسەنبى جەڭىستى كۇندە جولىعامىز دەگەن ويدامىز" - دەيدى ول. «قانات 147 جانە 154 فۋنتقا وڭاي تۇسەدى.ول گولوۆكينمەن شىعۋ كەرەك بولسا 160 فۋنتقا دەيىن بارادى. ءبىراق، بۇل جەكپە-جەك بولاتىن بولسا سوڭعى جەكپە-جەكتەرى بولۋى مۇمكىن.ول ءۇشىن تانىلىپ، سۋپەرجۇلدىز دەڭگەيىنە دەيىن جەتۋ كەرەك دەپ ويلايمىن. ارينە، ءبارى ۋاقىتتىڭ ەنشىسىندە».

قاناتتى قاناتىنىڭ استىنا العان - قازاقستانعا تانىمال مەسەنات، كاسىپكەر باۋىرجان وسپانوۆ. سپورتقا، ونىڭ شىندە بوكسقا جاناشىر جىگىت اعاسى قاناتتى قىتايدا جۇرگەن كەزىندە ەلگە الدىرىپ، ءۇي-جايىن رەتتەپ، بوكسپەن اينالىسۋىنا بارىنشا جاعدايىن جاسادى. دارالانىپ، داڭقىن شىعارۋ ءۇشىن ەمەس، قازاق ەلىنەن قازاق بوكسشىسىن، قازاق چەمپيونىن شىعارۋ ءۇشىن. تالاي بايراقتى باسەكەدە قارجىلاي دەمەۋ كورسەتىپ، قاناتتىڭ سپورتتاعى كارەراسىندا بيىكتەردى باعىندىرۋىنا سەپ بولدى.

باۋىرجان وسپانوۆ، كاسىپكەر: قانات مۇمكىندىك بولسا قازاقستاننىڭ اتىنان بارسا دەگەن وي بولعان. ەگەر وعان بارا الماي جاتسا، كاسىپقوي بوكسقا جاراپ تۇرعان جىگىت. سول جەردە قولدايمىن دەگەنمىن. وليمپياداعا وزدەرىڭىز بىلەسىزدەر وتە الماي قالدى. جۇڭگو ەلىنە قايتا شاقىرىپ ەدى بارعان جوق. ويتكەنى ول ءسوزىن ۇستايتىن جىگىت. ەلگە كەلدىم، ەلدىڭ اتىنان عانا شىعامىن دەدى.

قاناتتى قاناتتاندىرعان باپكەردىڭ ءبىرى – نۇرلان اقۇرپەكوۆ. ونىڭ ايتۋىنشا، قانات يسلامنىڭ بويىنداعى قاجىر-قايرات ەكىنىڭ بىرىندە جوق. اسىرەسى ونىڭ تەحنيكاسى شاپشاڭ. ەكى قولىمەن دە جاقسى بوكستاسادى. باپكەردىڭ ايتۋىنشا قاناتتىڭ بويىندا قايناعان نامىس پەن قاجىرلى قايرات ونى تەك چەمپيون بولۋعا جەتەلەيدى.

نۇرلان اقۇرپەكوۆ، «Astana Arlans» كلۋبىنىڭ باس باپكەرى: ونىڭ سوققىلارى وتە اۋىر جانە وزىنە سوققى جىبەرمەي، شاپشاڭ قيمىلدايدى. ونىڭ تاجىريبەسى جەتكىلىكتى. ول ءقازىر ناعىز بابىندا. ەندى قانات يسلام ءبىزدى تەك قانا جەڭىسىمەن قۋانتادى دەپ سەنەمىن. بوكس مايتالماندارى قاناتتىڭ كۇش-قۋاتىن جاقسى بىلەدى. ونىڭ وسى جولعى قارىسىلاسى دا قولىنا ەندى قولعاپ كيگەن بوكسشى ەمەس. 28 جاستاعى حۋان دە انحەل دە ءقازىر دايىندىق ۇستىندە. ءقازىر ەكى مىقتىنىڭ سايىسى تۋرالى بولجام كوپ. ەرماحان ىبىرايىموۆ، وليمپيادا چەمپيونى: قاناتتىڭ سوققىلارى گەناديي گولۆكيننىڭ سوققىلارى سياقتى وتە اۋىر. ءار سوققىسىنا جەكە كوڭىل بولەدى. الدىڭعى دجەبىمەن ول ءوزىنىڭ قارسىلاسىن ابدەن شارشاتتىرادى. 6-شى نەمەسە 7ء-شى راۋندتا قانات حۋان دە انحەلدى نوكاۋتپەن جەڭەدى دەگەن سەنىمىمىز بار. سوندىقتان، العا قازاقستان، العا قانات يسلام!

سەرىك ساپييەۆ، وليمپيادا چەمپيونى: قاناتقا بۇكىل قازاقستان جانكۇيەر بولادى. ءبىز وعان سەنەمىز. ەندى نوكاۋتپەن جەڭەدى دەپ ويلايمىن. قاناتتى بىلەمىن. ول ابدەن دايىندالدى. ونىڭ سوققىسى وتە مىقتى. قاناتتىڭ ۇزەڭگىلەستەرى مەن جانكۇيەرلەرى ودان تەك جەڭىس كۇتتى. ۇلكەن سپورتتا جەڭىسكە بەرگىسىز جەڭىلىستەر مەن بايانى جوق جەڭىستەر بولادى. باعى مەن بابى كەلىسپەسە شاشاسىنا شاڭ جۇقپاعان شىن جۇيرىك تە شاراسىزدىققا شالىنادى. بۇل كەزدەسۋدە قاناتتىڭ بابى مەن باعى قاتار شاپتى. جەڭىس قۇتتى بولسىن، اعايىن!

ايتا كەتەيىك، قانات يسلام مەن حۋان دە انحەل اراسىنداعى جەكپە-جەك بولىپ تابىلاتىن رەيتينگتىك بوكس كەشى اقش-تىڭ فلوريدا شتاتىنداعى لەيكلەند قالاسىندا ءوتتى.

 "قامشى" سىلتەيدى