بۇگىن استانا قالاسىنداعى «نۇر وردا» مەكتەپ-ليسەيىندە «KATEV» حالىقارالىق قوعامدىق قورىنىڭ ۇيىمداستىرۋىمەن قازاق-تۇرىك ليسەي وقۋشىلارىنىڭ اراسىندا رەسپۋبليكالىق «جاس جاسامپازدار جوبا جارىسى» جانە «روبوتوتەحنيكا» سايىسى باستالدى، - دەپ حابارلايدى Qamshy.kz.

شارانىڭ سالتاناتتى اشىلۋىنا ق ر ءبىلىم جانە عىلىم مينيسترلىگى مەكتەپكە دەيىنگى جانە ورتا ءبىلىم دەپارتامەنتىنىڭ ديرەكتورى جونتايەۆا جاڭىل الپامىس قىزى، «KATEV» حالىقارالىق قوعامدىق قورىنىڭ ۆيسە-پرەزيدەنتى ابدۋراحمان سەل، استانا قالاسىنىڭ ماسليحات دەپۋتاتى كاسەنوۆ گايدار، رەسپۋبليكالىق دارىن عىلىمي-پراكتيكالىق ورتالىعىنىڭ ديرەكتورى قيرابايەۆا شولپان اقاش قىزى، «نۇروردا» مەكتەپ-ليسەيىنىڭ ديرەكتورى ورحان وزتومسۋك جانە تاعى دا باسقا قوناقتار قاتىستى.   

«جاس جاسامپازدار جوبا جارىسى» بۇل - قازاقستان پرەزيدەنتى نۇرسۇلتان نازاربايەۆتىڭ «قازاقستان جولى – 2050: ءبىر ماقسات، ءبىر مۇددە، ءبىر بولاشاق» جولداۋى اياسىندا وسىمەن 3 رەت ۇيىمداستىرىلىپ جاتىر. سونداي-اق، «EXPO-2017» بالامالى ەنەرگيا كوزدەرى، الەۋمەتتىك-قوعامدىق ماسەلەلەر، جاراتىلىس تانۋ جانە گۋمانيتارلىق باعىت بويىنشا وتكىزىلەدى.

ال، روبوتيكس سايىسى بيىل العاش رەت وقۋشىلاردىڭ ەكولوگيالىق، شىعارماشىلىق، لوگيكالىق، قاسيەتتەرىن نىعايتۋ، حاي-تەك جانە نانوتەحنولوگيالاردى يگەرىپ، تەحنيكاعا دەگەن قىزىعۋشىلىعىن دامىتۋ ءۇشىن ۇيىمداستىرىلىپ وتىر. وعان ەلىمىزدىڭ بارلىق وڭىرىندەگى قازاق-تۇرىك ليسەيلەرىنەن 200-دەن اسا وقۋشى قاتىسۋدا. شارا بارىسىندا وقۋشىلار روبوت جاسايتىن جاڭا ۇلگىدەگى «لەگو-روبوت» سەكىلدى باعدارلامالاردى پايدالانادى.

ءادىلقازىلار قۇرامىنا روبوتوتەحنيكا سالاسىندا قىزمەت ەتەتىن قازاقستان جانە شەتەل ماماندارى مەن عالىمدارى كىرەدى. وقۋشىلار اراسىنان جاقسى ناتيجە كورسەتكەن جوبالار «ستارتاپ» رەتىندە قاراستىرىلىپ، كاسىپكەرلىكتە قولدانىلاتىن بولادى. مۇنداي جۇلدەلەندىرۋ ءۇردىسى بالالاردىڭ كۇردەلى عىلىمي سۇراقتاردىڭ جاۋابىن ىزدەۋگە، اۋتەنتيكالىق زەرتتەۋ جۇمىستارىن قولدانۋعا، ەرتەڭگى كۇننىڭ وزەكتى ماسەلەلەرىنە شەشىم تابۋعا يتەرمەلەيدى.

سونداي-اق، سايىس ناتيجەسىندە جوعارى ورىن يەلەنگەن بالالار كورەيادا جانە برازيليادا وتەتىن جارىسقا جولداما الادى.

نۋريلا اسانباي جانە التىناي مومبەكوۆا، شىمكەنت قالاسىنداعى قىز بالالارعا ارنالعان قازاق-تۇرىك ليسەي وقۋشىلارى:

ءبىزدىڭ بۇگىن الىپ كەلگەن جوبامىز «SMART DOOR» ياعني، «اقىلدى ەسىك» دەپ اتالادى. جالپى جۇمىس ىستەۋ جولى بىلاي: ءبىز ەسىككە ارنايى دىبىستاردى ەستە ساقتايتىن جانە ماگنيتپەن جۇمىس جاسايتىن ەكى قۇرىلعى ورناتتىق. ءبىرىنشىسى – ءسىز نەمەسە وتباسىڭىزداعى بەلگىلى ءبىر ادامار عانا بىلەتىن ەسىك قاعۋ دىبىسى. ماسەلەن، ءسىز باستاپقىدا ەسىكتى ساۋساقتارمەن نەمەسە قولمەن 4-5 رەت قاعۋ نەمەسە تاعى دا باسقا جولدار ارقلى ورناتىپ الاسىز. سودان كەيىن وسى دىبىستى ەستە ساقتاپ العان ەسىك تەك ءسىز ەسىك قاققاندا عانا اشىلادى.

ال، ەكىنشىسى – ءقازىر كوپقاباتتى ۇيلەردە قولدانىلىپ كەلە جاتقان ماگنيتتىك قۇرىلعى (دوموفون). مۇندا ەسىكتىڭ ارناي جەرىنە ورناتىلعان قۇرىلعى بولادى. ءسىز سوندا تەك وزىڭىزدە بولاتىن كارتوچكانى سول جەرگە تيگىزسەڭىز ەسىك اشىلا قويادى.

شارانىڭ سالتاناتتى جابىلۋ ءراسىمى ەرتەڭ 10:00-دە نۇروردا مەكتەپ-ليسەيىندە وتەدى.

ساپارعالي قانات