اقش پرەزيدەنتى باراك وباما وسى ايدا جاپونيانىڭ حيروسيما قالاسىنا بارادى، - دەپ حابارلايدى Qamshy.kz ازاتتىققا سىلتەمە جاساپ.
وباما - تاريحتا ءبىرىنشى اتوم بومباسى تاستالعان حيروسيماعا باراتىن اقش-تىڭ ءىس باسىنداعى العاشقى پرەزيدەنت بولماق. اق ءۇي اقش باسشىسى حيروسيماعا 27 مامىردا ازيا ەلدەرىنە جاسايتىن ساپارى اياسىندا باراتىنىن مالىمدەدى. وباما جاپونيادا "ۇلكەن جەتىلىك" ەلدەرىنىڭ سامميتىنە قاتىسادى. ول ساپار اياسىندا ۆەتنامعا دا بارماق.
پرەزيدەنت اكىمشىلىگىنىڭ حابارلاۋىنشا، بۇل ساپارى وبامانىڭ "بەيبىتشىلىك پەن يادرولىق قارۋسىز قاۋىپسىزدىكتى قامتاماسىز ەتۋ" پرينسيپىنە ادال ەكەندىگىن دالەلدەيدى. ءبىراق اقش بيلىگى وباما حيروسيمادا رەسمي تۇردە كەشىرىم سۇراۋى مۇمكىندىگىن جوققا شىعاردى.
بۇدان جەتپىس جىلدان استام ۋاقىت بۇرىن حيروسيما جانە ناگاساكي قالالارىنا اقش قولدانعان جويقىن قارۋ 150 مىڭعا جۋىق ادامنىڭ ءومىرىن قيعان. سودان كەيىن بەس جىلدىڭ ىشىندە ءتۇرلى اۋرۋلاردان كوز جۇمعان تاعى 156 مىڭ ادامنىڭ اجالىن دارىگەرلەر اتوم بومباسى جارىلىسى سالدارىمەن بايلانىستىرادى.
