الماتىدا ەسىرتكىگە تاۋەلدى جانداردىڭ سانى وتكەن جىلمەن سالىستىرعاندا ورتا ەسەپپەن 15 پايىزعا ازايعان، -دەيدى مەديسينالىق الەۋمەتتىك تۇزەتۋ ناركولوگيالىق ورتالىعىنىڭ باس دارىگەرىنىڭ ورىنباسارى رۋسلان الييەۆ ايتتى. 

«الماتىدا بيىل 1 ناۋرىزدا وتكەن جىلعى كورسەتكىشپەن سالىستىرعاندا ەسىرتكىگە تاۋەلدى جانداردىڭ سانى ورتا ەسەپپەن 15 پايىزعا ازايعان. بيىل ولاردىڭ سانى 34013 ادام بولسا، ونىڭ ىشىندە اششى سۋعا تاۋەلدى ادامداردىڭ سانى - 30318، ناشاقورلار -3601، توكسيكومانداردىڭ سانى 31 ادامدى قۇرادى. ايەلدەر اراسىندا الكوگولگە تاۋەلدى - 2811، ەسىرتكىگە تاۋەلدى - 430 ادام تىركەلگەن. جاسوسپىرىمدەر اراسىندا 965 بالا الكوگولگە تاۋەلدى بولسا، 8 بالانىڭ ەسىرتكى پايدالاناتىنى، 4 بالا توكسيكومان ەكەندىگى انىقتالدى»، - دەدى رۋسلان الييەۆ. ماماننىڭ ايتۋىنشا، قالاداعى ەسىرتكىگە تاۋەلدى جانداردىڭ سانىنىڭ ازايۋىنا بىرنەشە فاكتور اسەر ەتىپ وتىر. ولاردىڭ ءبىرى - اۋداندىق اكىمشىلىكتەر جانىنداعى ارنايى كوميسسيالاردىڭ، قۇقىق قورعاۋ ورگاندارىنىڭ، مۇددەلى ۇيىمداردىڭ، ناركولوگيالىق ورتالىقتىڭ، سالاۋاتتى ءومىر سالتىن قالىپتاستىرۋ ورتالىعىنىڭ بەلسەندى پروفيلاكتيكالىق ءىس-شارالارىنىڭ ارقاسىندا بولىپ وتىر. «ەسىرتكىگە تاۋەلدى جانداردىڭ سانىن ازايتۋ ماسەلەلەرى مەملەكەتتىك «سالاماتتى قازاقستان» باعدارلاماسى اياسىندا كەڭىنەن قاراستىرىلعان. سونداي-اق، ايماقتىق «2012-2016 جىلدارعا ارنالعان ناشاقورلىق پەن ناركوبيزنەسكە قارسى كۇرەس» باعدارلاماسىن جۇزەگە اسىرۋ اياسىندا وتكىزىلگەن كوپتەگەن شارالار ناشاقورلاردىڭ سانىنىڭ ازايۋىنا ىقپال ەتىپ وتىر»، - دەدى مەديسينالىق الەۋمەتتىك تۇزەتۋ ناركولوگيالىق ورتالىعىنىڭ باس دارىگەرىنىڭ ورىنباسارى رۋسلان الييەۆ.

قازاقپارات