ق ر پارلامەنتى ءماجىلىسىنىڭ دەپۋتاتى نۇرلان ءابدىروۆ قازنەتتىڭ تانىمال بلوگەرلەرىنە وزدەرىنىڭ الەۋەتىن قوعامدىق كەڭەستەر جانىندا جۇزەگە اسىرۋعا شاقىردى، - دەپ حابارلايدى Qamshy.kz.

بۇل تۋرالى دەپۋتات ورتالىق كوممۋنيكاسيالار قىزمەتىندەگى باسپا ءسوز ءماسليحاتىندا ءسوز قوزعادى.

«ءبىز بلوگەرلەر تۋرالى پىكىر الماسقان بولاتىنبىز. كوپتەگەن جاستار الەۋمەتتىك جەلىدە وتىراتىنى بەلگىلى. ەگەر دە ولار جەلىدە بەلسەندى جانە شىنىمەن دە پاتريوتتىق رۋحتاعى ازاماتتار بولسا، وندا وسى جاستار قوعامدىق كەڭەستەر الاڭىنا قوسىلىپ، ماسەلەلەردى تالقىلاعانى دۇرىس بولار ەدى. ەلىمىزدىڭ وركەندەۋىنە اشىق تۇردە ۇلەس قوسىپ، بۇل باعىتتاعى جۇمىستاردى ايقىن اتقارۋدى ۇسىنامىن»، - دەدى دەپۋتات.

نۇرلان ءابدىروۆتىڭ سوزىنە قاراعاندا، «قوعامدىق كەڭەستەر تۋرالى» زاڭىن ازىرلەۋشىلەر كەڭەس مۇشەلەرى جۇمىسىنا قاجەتتى بارلىق جاعدايلاردى قامتىدى.

«بۇل تۇرعىدا ولارعا مەملەكەتتىك ورگانداردىڭ مۇشەلەرىمەن بىرگە ەڭ وزەكتى پروبلەمالاردى قاراستىرۋى ءۇشىن مۇمكىندىك بەرىلىپ وتىر»،-دەدى ول.

قوعامدىق كەڭەستەر قىزمەتىنە كەلسەك، ولاردىڭ قىزمەتىندەگى باستى نىسان - قوعامداعى ماڭىزدى ماسەلەلەر بويىنشا قوعامنىڭ پىكىرىن ءبىلدىرۋ بولىپ تابىلادى. ياعني، قوعامدىق كەڭەستەر ءتۇرلى ماسەلەلەرگە قاتىستى قوعامنىڭ پىكىرىن بيلىك ورگاندارىنا جەتكىزەدى، ءوز كەزەگىندە بيلىك ورگاندارى ونداي ۇسىنىمداردى قاراۋعا مىندەتتى بولىپ تابىلادى.