اقتوبەدە دارەتحاناعا تاستالعان ءسابيدى قۇتقارۋ ءساتى تۇسىرىلگەن ۆيدەو جاريالاندى، - دەپ حابارلايدى Qamshy.kz.
اقتوبە قالاسىنداعى مولتەك اۋدانداردىڭ بىرىندەگى جەر ۇيلەردىڭ دارەتحاناسىنان جاڭا تۋعان ءسابي تابىلعان ەدى. ءۇي يەسى مولداعالي ورىنباساروۆ قاپشىققا سالىنعان ءسابيدى دارەتحانا شۇڭقىرىنان ءوزى الىپ شىققان. وقيعا ورنىنا جەتكەن جەدەل جاردەم دارىگەرلەرى نارەستەنىڭ كىندىگىن كەسكەن. دارەتحانادان تابىلعان نارەستە قىز بولىپ شىقتى.
وقيعا ورنىن شولعان پوليسيا قىزمەتكەرلەرى بەلگىسىز ايەلدىڭ نارەستەسىن سول دارەتحانا جانىندا دۇنيەگە اكەلگەنىنە كوز جەتكىزگەن.
دارىگەرلەر ءقازىر وبلىستىق پەريناتالدى اۋرۋحاناعا جاتقىزىلعان نارەستەنىڭ دەنساۋلىعى ءبىر قالىپتى دەپ وتىر. اۋرۋحانا دارىگەرلەرى ءسابيدىڭ سالماعى 3 كەلى 80 گرام، بويى 52 سانتيمەتر ەكەنىن حابارلاعان.
ەستەرىڭىزگە سالساق، وسى جىلدىڭ 3 قاڭتارىندا جامبىل وبلىسىندا دا جاڭا تۋعان نارەستە دارەتحاناعا تاستالعان ەدى.
