قىرعىزستاننان ماسكەۋگە ءناپاقا تابۋعا كەلگەن جۇمىسشى ايەلدەر ەلىمىزدىڭ مادەنيەت ءمينيسترى ارىستانبەك مۇحامەدي ۇلىنىڭ "قىرعىزدار اجەتحانا تازالاپ ءجۇر" دەگەن سوزدەرىنە رەنىشتەرىن ءبىلدىردى دەپ حابارلايدى Qamshy.kz  Nur.kz-كە سىلتەمە جاساپ.

"ءبىز، بالكىم اجەتحانا تازالاپ تا جۇرگەن شىعارمىز، ءبىراق بۇل - ادال ەڭبەك. ءبىز دەنەمىزدى ساۋداعا سالىپ جۇرگەن جوقپىز، تەك ءوز وتباسىمىزدى اسىراپ ءجۇرمىز. ءبىز قىرعىزستان ەكونوميكاسىنا سۇبەلى ۇلەس قوسۋدامىز"، - دەيدى ءوزىن ريساليات-ەجە دەپ تانىستىرعان ايەل.

ودان ءارى كەلىنشەك مۇحامەديۇلىنا جاۋاپ قاتتى.

"قازاق مينيسترىنە ايتارىم، ونىڭ سوزدەرى دۇرىس ەمەس. ءبىز ماسكەۋدە ەرىككەننەن جۇرگەن جوقپىز. ءبىز تەك ازىعىمىزدى تابۋ ءۇشىن ءجۇرمىز. تۇپتەپ كەلگەندە، مۇندا اجەتحانا جۋىپ جۇرگەن قازاقستان ازاماتتارى دا بارشىلىق. ونىڭ ەش ۇياتتىعى جوق"، - دەيدى ريساليات-ەجە.

ونىڭ ايتۋىنشا، شەتەلدىكتەر ماسكەۋگە داعدارىستان كەيىن اعىلۋدا.

"داعدارىستى تەك قىرعىزدار عانا باستان كەشىرىپ جاتقان جوق. قازاقستان، رەسەي مەن وزبەكستان دا قيىن جاعدايدا. داعدارىس قىسسا ءبارى دە اجەتحانا جۋۋعا كىرىسەدى"، - دەپ جالعاستىردى قىرعىز ايەل.

ول ءوز وتانىندا مۇنداي جۇمىستى ەشكىم ۇيات سانامايتىنىن العا تارتتى.

"مەن مۇندا ون جىل جۇمىس ىستەپ، ەكى قىزىمدى وقىتىپ شىقتىم. بارلىق بالالارىم وتاۋ كوتەرىپ ۇلگەردى. ەندى، بۇيىرتسا، ۇيىمىزگە جوندەۋ جۇمىستارىن جۇرگىزەمىز. بۇل جەردە اجەتحانا جۋىپ جۇرسەك تە، ەلىمىزدە سىيلى ادامبىز"، - دەيدى ايەل.

گۋليا ەسىمدى وزگە قىرعىز ايەل دە ءمينيسترىمىزدىڭ سوزىنە اشۋلى كورىنەدى.

"ءسىزدىڭ سوزدەرىڭىزدە سوگۋ ەمەس، تۇسىنىستىك بولعاندا، اڭگىمە باسقاشا بولار ەدى. مۇندا مەن جاقسى جالاقى الامىن. ءار حالىقتىڭ باسىنا قيىندىقتار تۋىندايدى. مەن قازاقتارعا جاقسى كوزقاراستامىن، الايدا ءمينيستردىڭ ءسوزى ءبىزدىڭ كوڭىلىمىزگە ءتيدى. ءبىز ءسىزدىڭ ءسوزىڭىزدى دۇرىس دەپ سانامايمىز"، - دەيدى گۋليا.

وسى ورايدا، رەسەيدەگى قىرعىز ميگرانتتارى جايلى ءسوزى داۋعا ۇلاسقان ارىستانبەك مۇحامەدي ۇلىنىڭ «قىرعىز ميگرانتتارى جايلى ايتقانى ءۇشىن كەشىرىم سۇراعانىن» جازعان بولاتىنبىز.  

ۆيسە-مينيستر عالىم احمەدياروۆ «كەيبىر اقپارات قۇرالدارى ءمينيستردىڭ جاۋابىن بەرگەندە ونىڭ ءسوزىنىڭ ەكى شاعىن عانا ءۇزىندىسىن ۇسىنعانىن»، «انىعىندا جازۋشى شىڭعىس ايتماتوۆتىڭ تالانتىنا باس يەتىن مينيستر ونىڭ تەرەڭ فيلوسوفياسىنا نازار اۋدارتقىسى كەلگەنىن» ايتادى.

دەگەنمەن، قازاق ءمينيسترىنىڭ ءسوزى رەسەيدە جۇرگەن قىرعىز ميگرانت قىز-كەلىنشەكتەرىن نارازى ەتتى. ولار مينيستر مۇحامەدي ۇلىنىڭ دارەتحانا جۋۋدى ار كورگەن پىكىرىمەن كەلىسپەيتىن پىكىرلەرىن ۆيدەوعا ءتۇسىرىپ، الەۋمەتتىك جەلى ارقىلى تاراتقان.

قازاق ءمينيسترىنىڭ قىرعىز ميگرانتتارى جايلى سوزىنەن سوڭ، مامىردىڭ 24ء-ى كۇنءى قىرعىزستان سىرتقى ىستەر مينيسترلىگى قازاقستاننىڭ بىشكەكتەگى ەلشىلىگىنىڭ كەڭەسشى-ۋاكىلى ەربول احمەتوۆتى شاقىرىپ الىپ، قازاقستاندىق ديپلوماتقا نارازىلىق نوتاسىن تاپسىرعان.

بۇگىندە قازاقستاندىق اقپارات قۇرالدارى قازاقستان سىرتقى ىستەر مينيسترلىگىنىڭ قىرعىزستان نوتاسىنا جاۋاپ دايىنداپ جاتقانىن حابارلادى. ب ا ق مالىمەتىنشە، مينيسترلىكتىڭ باسپا ءسوز حاتشىسى ءانۋار جايناقوۆ «نوتا مازمۇنىن جاريا ەتپەيتىنىن، جاۋاپ دايىن بولا سالا قىرعىز تارابىنا جەتەتىنىن» ايتقان.