ساكەن سارسەنوۆ ق ر اقپارات جانە كوممۋنيكاسيالار ۆيسە-مينيسترى بولىپ تاعايىندالدى، - دەپ حابارلايدى Qamshy.kz اتالعان ۆەدومستۆونىڭ باسپا ءسوز قىزمەتىنە سىلتەمە جاساپ.
سارسەنوۆ ساكەن سەيتجاپپار ۇلى 1977 جىلى 2 اقپاندا دۇنيەگە كەلگەن.
2000 جىلى ماسكەۋ مەملەكەتتىك اۆياسيا ينستيتۋتىن «اقپاراتتى وڭدەۋ مەن باسقارۋدىڭ اۆتوماتتاندىرىلعان جۇيەلەرى» ماماندىعى بويىنشا بىتىرگەن.
ەكىنشى جوعارعى ءبىلىمىن «قۇقىقتانۋ» ماماندىعى بويىنشا ەۋرازيالىق گۋمانيتارلىق ينستيتۋتىندا الدى.
2000 جىلى قازاقستان رەسپۋبليكاسى كولىك جانە كوممۋنيكاسيلار مينيسترلىگىنىڭ كولىكتىك باقىلاۋ كوميتەتىنىڭ جەتەكشى مامانى رەتىندە مەملەكەتتىك قىزمەتكە تۇردى. قازاقستان رەسپۋبليكاسى راديوجەلىلىك سپەكترىن قولدانۋدى باقىلاۋ ماسەلەلەرىمەن اينالىستى.
2000 جىلدىڭ قاراشا ايى مەن 2003 جىلدىڭ قازان ايى ارالىعىندا قازاقستان رەسپۋبليكاسى قارجى مينيسترلىگىنىڭ «قارجى جۇيەلەرىن اقپاراتتاندىرۋ ورتالىعى» رمك اقپاراتتى قورعاۋدى ۇيىمداستىرۋ ءبولىمىنىڭ مەڭگەرۋشىسى بولىپ ىستەدى. مينيسترلىكتىڭ اقپاراتتىق جۇيەلەرى مەن رەسۋرستارىن قازاقستان رەسپۋبليكاسىندا تۇڭعىش رەت ەنگىزىلگەن اداپتيۆتىك قاۋىپسىزدىك تەحنولوگياسىن قولدانۋمەن قورعاۋدى ۇيىمداستىرۋ ماسەلەلەرىنە جەتەكشىلىك ەتتى.
2003 جىلى «ۇلتتىق اقپاراتتىق تەحنولوگيالار» اق باسقارما ءتوراعاسىنىڭ ورىنباسارى بولىپ تاعايىندالدى، مۇندا ۇلتتىق اقپاراتتىق ينفراقۇرىلىم مەن «ەلەكتروندىق ۇكىمەتتىڭ» ينفراقۇرىلىمىن دامىتۋ بويىنشا مەملەكەتتىك باعدارلامالار اياسىندا جوبالاردى ىسكە اسىرۋ مەن مەكەمەارالىق اقپاراتتىق جۇيەلەردى سۇيەمەلدەۋ ماسەلەلەرىمەن اينالىستى. سول كەزەڭدە «جەكە تۇلعالار»، «زاڭدى تۇلعالار» مەملەكەتتىك دەرەكتەر بازالارى، ەلەكتروندىق ۇكىمەت پورتالى، جىلجىمايتىن مۇلىك رەگيسترى، ەلەكتروندىق قۇجاتاينالىمىنىڭ ءبىرىڭعاي جۇيەسى ىسكە قوسىلدى.
2008 جىلدىڭ ءساۋىر ايى مەن 2009 جىلدىڭ قازان ايى ارالىعىندا «قازاقتەلەكوم» اق-نىڭ ەلەكتروندىق قىزمەتتەر جونىندەگى باسقارۋشى ديرەكتورى بولىپ جۇمىس ىستەدى. بيزنەس-جوبالاردى دامىتۋ مەن قازنەتتە جاڭا ينتەراكتيۆتىك جانە ترانزاكسيالىق قىزمەتتەردى جاساۋ بويىنشا جەتەكشىلىك ەتۋمەن قاتار قر-دا ەلەكتروندى وقىتۋ جوبالارىن ىسكە اسىرۋ مەن ۇيالى WiMAX تەحنولوگياسىنىڭ نەگىزىندە جەلى قۇرۋ ماسەلەرىمەن اينالىستى. تەلەكومنان ينفوكومعا كوشۋ تۇجىرىمداماسىن ازىرلەدى
2009 جىلدىڭ قىركۇيەگىنەن باستاپ 2010 جىلدىڭ 30 ناۋرىزىنا دەيىن - قازاقستان رەسپۋبليكاسى باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەت ءتوراعاسىنىڭ ورىنباسارى. قىلمىستىق ىستەردىڭ ەلەكتروندى تىركەۋ جۇيەسىن (ەلەكتروندىق وەق) ازىرلەپ ەنگىزدى.
2010 جىلدىڭ ناۋرىز ايى مەن 2012 جىلدىڭ قاڭتار ايى ارالىعىندا - قازاقستان رەسپۋبليكاسىنىڭ بايلانىس جانە اقپارات مينيسترلىگىنىڭ ۆيسە-مينيسترى. ءدال وسى كەزەڭدە، 3G قىزمەتتەرى، سيفرلىق سپۋتنيكتىك جانە ەفيرلىك تەلەديدار ىسكە قوسىلدى، سونداي-اق، 2011 جىلدىڭ 11 ناۋرىزىندا وسى مەكەمەگە تاپسىرىلعان حالىققا قىزمەت كورسەتۋ ورتالىقتارى (حقكو) جاڭعىرتىلىپ اۆتوماتتاندىرىلدى.
2012 جىلى 1 اقپاندا قازاقستان رەسپۋبليكاسىنىڭ كولىك جانە كوممۋنيكاسيا مينيسترلىگىنىڭ ۆيسە-مينيسترى بولىپ تاعايىندالدى (№180 01 اقپان 2012 جىلعى قازاقستان رەسپۋبليكاسى ۇكىمەتىنىڭ قاۋلىسى). بۇل لاۋازىمدا بايلانىس قىزمەتتەرىنىڭ تاريفتەرىن تومەندەتۋ مەن مەملەكەتتىك قىزمەتتەردى اۆتوماتتاندىرۋ جۇمىستارىن جالعاستىرىپ، 4Gء-دىڭ ىسكە قوسىلۋىن، MNP جوباسىنىڭ باستالۋىن جانە دە اۆتوموبيل يەلەرىنە ارنالعان ارنايى حقكو-لارىنىڭ اشىلۋىن باقىلادى.
2014 جىلدىڭ ءساۋىر ايىندا قازاقستان رەسپۋبليكاسىنىڭ بايلانىس جانە اقپارات اگەنتتىگى ءتوراعاسىنىڭ ءبىرىنشى ورىنباسارى بولىپ تاعايىندالدى. حقكو، ەلەكتروندىق ۇكىمەت، IT جانە تەلەكوممۋنيكاسيا سالالارىن دامىتۋمەن اينالىستى.
2014 جىلدىڭ 18 تامىزى مەن 2016 جىلدىڭ 21 مامىر ايىنىڭ ارالىعىندا - بايلانىس، اقپاراتتاندىرۋ جانە اقپارات كوميتەتىنىڭ ءتوراعاسى، ق ر ينۆەستيسيا جانە دامۋ مينيسترلىگىنىڭ ۆيسە-مينيسترى.
2016 جىلدىڭ 21 مامىرىنان باستاپ - ق ر اقپارات جانە كوممۋنيكاسيا ۆيسە-مينيسترى. حقكو، ەلەكتروندىق ۇكىمەت، اقپاراتتاندىرۋ جانە بايلانىس سالالارىن دامىتۋ بويىنشا جۇمىسىن جالعاستىرۋدا.
