ەلىمىزدەگى پەدوفيلدەردىڭ مالىمەتتەر بازاسى ىسكە قوسىلا سالىسىمەن جانجال تۋىندادى. پەدوفيلدەر قاتارىنان تابىلعان الماتى تۇرعىنى ءوزىن زورلاۋشىلار تىزىمىنەن الىپ تاستاۋدى تالاپ ەتتى. بۇل تۋرالى 31 ارنا حابارلايدى.
كەنجەبەك يسلاموۆ كۇن ۇزاققا ەسەڭگىرەگەن كۇيدە. تەلەفونى تىنىم تاپپاي شىرىلداپ، ەر ادامنىڭ تۋىستارى مەن دوستارى ونى سۇراقتىڭ استىنا الىپ جاتىر. ولار كەنجەبەكتى پەدوفيلدەر تىزىمىنەن تاۋىپ، اڭ-تاڭ.
“بۇل دەگەنىڭ ناعىز ماسقارا عوي. مەنىڭ وتباسىم، تۋىستارىم، تانىستارىم بار. ولار نە دەيدى؟ بالالارىمنىڭ كوزىنە قاراۋدان قالدىم. بۇل اقپارات قايدان شىققانىن تۇسىنە الار ەمەسپىن. مەنىڭ فوتوم مەن بارلىق اقپارات ەندى ەلدىڭ نازارىندا تۇر”، – دەپ اشۋلاندى يسلاموۆ.
كەنجەبەك ءوزىنىڭ راسىمەن ءىستى بولعانىن جاسىرمادى. 25 جىل بۇرىن ەر ادام سوتتالعانىن، الايدا پەدوفيلدەر قاتارىندا بولماعانىن العا تارتتى. ءۇش جىل وتىرعاننان كەيىن ونى مەرزىمىنەن بۇرىن بوساتقان. ول زورلاۋشىلار قاتارىنان قالاي تابىلعانىن تۇسىنبەي دال.
باس پروكۋراتۋرا ەر ادامنىڭ شاعىمدارىن ەستي سالىسىمەن، تەرگەۋدى باستاعان. مەكەمە ەر ادامنىڭ “توپتاسىپ زورلاۋ” بابى بويىنشا جاۋاپقا تارتىلعانىن العا تارتتى. ال زارداپ شەگۋشى ول كەزدە كامەلەتكە تولماعان ەكەن. سول سەبەپتى، يسلاموۆ قىلمىس جاساعانىنا 25 جىل وتسە دە پەدوفيلدەر كارتاسىنا تاپ بولعان.
“يسلاموۆ كامەلەتكە تولماعان جاسوسپىرىمگە زورلىق كورسەتۋ ءىسى بويىنشا جاۋاپقا تارتىلعاندىقتان، ەسەپكە الىنىپ، بۇل ينتەرنەتتە جاريا ەتىلدى. ەگەر يسلاموۆ بۇل فاكتى بويىنشا وزگە دالەلدى اقپاراتتار كورسەتە السا، مالىمەتتەر بازاسىنا تۇزەتۋلەر ەنگىزىلەتىن بولادى”، – دەيدى باس پروكۋراتۋرانىڭ قۇقىقتىق ستاتيستيكا بويىنشا كوميتەت باسشىسى كۇلجيان جاقيانوۆا.
كارتاعا 1991 جىلدان باستاپ كامەلەتكە تولماعانداردى زورلاۋ بابى بويىنشا جاۋاپقا تارتىلعاندار ەنگىزىلگەن. ياعني، بارلىعى 120 ادام تىركەلگەن.
قۇقىق قورعاۋشىلار مۇنداي مالىمەتتەردى جاريا ەتپەس بۇرىن ءار قىلمىسكەردىڭ بۇگىنگى تاڭدا قانشالىقتى ءتۇزۋ جولعا تۇسكەندىگى تۋرالى اقپارات جيناعان ابزال دەپ سانايدى.
“بۇل ادامدار وتباسىن قۇرىپ، بالالى، نەمەرەلى بولىپ وتىرعان شىعار؟ ال بۇگىندە بازاعا جاريالانىپ ماسقارا بولۋدا. مەنىڭشە، بۇل كۇردەلى ماسەلە جانە جان-جاقتى سارالاۋدى قاجەت ەتەدى. بۇل قىلمىسقا قايتا بارماعان تۇلعالاردى بازاعا ەنگىزۋدىڭ قاجەتى جوق دەپ ويلايمىن”، – دەيدى زاڭگەر رەنا كاريموۆا.
ال كەنجەبەك يسلاموۆ بولسا، ءوزىن بازادان الىپ تاستاۋىن جانە باس پروكۋراتۋرانىڭ كەشىرىم سۇراۋىن تالاپ ەتۋدە. ءتىپتى سوتقا جۇگىنۋگە دە ءازىر وتىر.
ەسكە سالساق، اعىمداعى جىلدىڭ باسىنان باستاپ، ەلىمىزدىڭ پەدوفيلدەر بازاسى قۇرىلدى. ونداعى مالىمەتتەردى كوميتەتتىڭ http://infopublic.pravstat.kz پورتالىنداعى «گەواقپاراتتىق جۇيەلەر» بولىمىنەن ينتەرنەت ارقىلى كورە الادى.
