اقتوبەدە قالا كۇنىنە وراي بۇقارالىق سپورت ءتۇرىن قولداۋشىلار اراسىندا ۆەلوشەرۋ ۇيىمداستىرىلدى. ۆەلوشەرۋدىڭ جالپى قاشىقتىعى — 6،5 شاقىرىم، - دەپ حابارلايدى Qamshy.kz Aktobenews.kz-كە سىلتەمە جاساپ.

شاراعا قاتىسۋشىلار ق ر تۇڭعىش پرەزيدەنت اتىنداعى ساياباقتان باستاپ، ءابىلقايىر حان داڭعىلى بويىمەن ءا.مولداعۇلوۆا داڭعىلىنا دەيىن، ارى قاراي ءا.مولداعۇلوۆا داڭعىلى بويىمەن ەسەت باتىر كوشەسىنە بۇرىلىپ، اباي داڭعىلى ارقىلى ءابىلقايىر حان داڭعىلىنا شىعىپ، ودان سوڭ ق ر تۇڭعىش پرەزيدەنت اتىنداعى ساياباققا ورالدى.

اقتوبە قالاسىندا ۆەلوسيپەد تەبەتىندەردىڭ قاتارى جىل سايىن ارتىپ كەلەدى. ءبىراق ارنايى ۆەلوجولى جوق. جەرگىلىكتى بيلىك بۇل جولى دا ۆەلوشەرۋ وتكىزۋ ءۇشىن قالانىڭ باس داڭعىلىندا كولىك قوزعالىسىپ شەكتەدى.

«قالامىزدا تاۋەلسىزدىكتىڭ 25 جىلدىعىنا ارنالعان ءتۇرلى شارالار وتكىزىلىپ جاتىر. قالا كۇنى دە وسى مەرەكە اياسىندا ءوتتى. وتكەن جىلعى ۆەلوشەرۋلەرگە 150 ادام قاتىسقان بولسا، بيىل قاتىسۋشىلار سانى ارتتى. بۇل ءبىزدى قۋانتادى. ءبىز سالاۋاتتى ءومىر سالتىن ناسيحاتتاۋ ارقىلى بۇقارالىق سپورت ءتۇرىن دامىتقىمىز كەلەدى. ۆەلوجارىستاردى الداعى ۋاقىتتا ءجيى وتكىزۋدى ويلاپ وتىرمىز»، — دەدى اقتوبە قالاسىنىڭ اكىمى بەكبول ساعىن.
 

بۇقارالىق سپورتقا قىزىعۋشىلاردى قالا اكىمى سپورتتىق كيىممەن كەلىپ قولدادى.
 

«ۆەلوسيپەدتىم ءالى اكەلىنگەن جوق. استانادان الدىرتىپ جاتىرمىن. وزىمدىكىن الدىرتقان سوڭ شەرۋلەرگە قاتىساتىن بولامىن. ءبىر جىلدان بەرى ۆەلوسيپەد تەبۋمەن تۇراقتى اينالىسىپ كەلەمىن»، — دەدى بەكبول ساعىن.