وزدەرىن ەلدەگى جالعىز وپپوزيسيالىق پارتيا سانايتىن بۇل پارتيانىڭ ءتوراعاسى جارماحان تۇياقبايدىڭ جوق بولىپ كەتكەنىنە ءبىراز ۋاقىت بولدى.

وعان جاقىن جۇرەتىن ادامداردىڭ ايتۋىنا قاراعاندا، جارماحان تۇياقباي شەتەلدە دەمالىپ جاتىر-مىس. ەگەر شىنىندا دا ول كىسى  شەتەلدە دەمالىپ جاتسا، بۇل نەعىلعان بىتپەيتىن دەمالىس؟

ەگەر دە، ونىڭ بەتىن ارى قىلسىن، جارماحان تۇياقباي سىرقاتتانىپ قالسا، ول ادامنىڭ تەز ساۋىعىپ كەتۋىنە تىلەكتەستىگىمىزدى بىلدىرەمىز...

جسدپ ءتوراعاسى جارماحان تۇياقباي «جوعالعالى» بەرى ەلدە نەبىر ساياسي جاعدايلار، دۇربەلەڭدەر ورىن الدى. بۇكىل ەل قازاق جەرىن ساتۋعا جانە جالعا بەرۋگە اشىق قارسى شىقتى. 21 مامىردا بۇكىل قازاقستان بويىنشا بەيبىت شەرۋ باستالماي تۇرىپ، قانشا ادام ۇستالدى، قانشاسى جازىقسىز سوتتالدى، مىنە، وسىنداي دۇربەلەڭ كەزىندە دە جارماحان تۇياقباي، «ءاۋ» دەپ جاق اشقان جوق...

21 مامىرداعى وقيعالارعا قاتىستى مەرزىمدى باسىلىم بەتتەرىندە جارىق كورىپ جاتقان جسدپ اتىنان جازىلعان ساياسي مالىمدەمەلەردى ءتورالقا مۇشەلەرى: بالتاش تۇرسىمبايەۆ، سەرىكباي الىبايەۆ، امىربەكتوعىسيەۆ جانە ت.ب. ازاماتتار دايىندايتىن كورىنەدى. «وسىنداي ساياسي مالىمدەمەلەر جاساڭدار! سەندەرگە ۋاقىتشا وكىلەتتىگىمدى بەرەمىن» دەپ ايتقان نەمەسە ءتوراعا رەتىندە بۇيرىق بەرگەن جارماحان تۇياقباي جوق سياقتى.

اڭگىمەنىڭ تۋراسىن ايتقاندا، جارىق كورىپ جاتقان پارتيالىق بۇل ساياسي مالىمدەمەلەرگە جسدپ ءتوراعاسى جارماحان تۇياقبايدىڭ ەش قاتىسى جوق بولىپ شىقتى. بۇل ساياسي مالىمدەمەلەرگە ول كىسى نە «ءيا»، نە «جوق» دەپ جاۋاپ بەرمەگەن. جارماحان تۇياقبايمەن ءبىر ساپتا جۇرگەن ونىڭ مۇراتتاس دوستارى دا بۇل «ۇنسىزدىكتىڭ» سىرىن بىلمەيدى...

جارماحان تۇياقبايمەن بايلانىستىڭ بارلىق ءتۇرى جاقبىق ەكەن. ول كىسى ءوزى جاقسى بىلەتىن مۇراتتاستارى تەلەفون شالعاندا دا، تەلەفون تۇتقاسىن المايتىن سياقتى. قاساقانا بايلانىسقا شىقپاي وتىرعان جسدپ ءتوراعاسى جارماحان تۇياقباي ما، جوق، الدە جاعدايدى ۋشىقتىرا تۇسكىسى كەلگەن ءبىر «ءۇشىنشى كۇش پە؟» ول «ءۇشىنشى» كۇشتىڭ كوزدەگەن ماقساتى نە؟ الدە جارماحان تۇياقبايدى ەل باسىنا كۇن تۋعانداي، مىنا قيىن كەزەڭدە ونى بىرەۋلەر ۇستاپ الىپ، حالىقپەن بايلانىسقا شىعارماي وتىر ما؟..

وسىعان جاۋاپ بەرەتىن ءبىر جان بار ما ەكەن؟

سونىمەن، جسدپ ءتوراعاسى جارماحان  تۇياقباي قايدا؟

جۇماش كەنەباي