بوستاندىق اۋدانىنىڭ ازاماتتىق ىستەر بويىنشا سوتىندا بۇگىنگە بەلگىلەنگەن "قازاقستاننىڭ ءبىرىنشى ارناسىنا" ("پەرۆىي كانال كازاحستانا") تەلەارناسىنا قارسى شاعىم بويىنشا سوتتىڭ الدىن الا تىڭداۋى كەيىنگە قالدىرىلدى. بۇعان جاۋاپكەر تاراپ - تەلەارنا ادۆوكاتىنىڭ كەلمەي قالۋى سەبەپ بولدى، - دەپ حابارلايدى Qamshy.kz ازاتتىق راديوسىنا سىلتەمە جاساپ.

قاراعاندىلىق زاڭگەر نۇرحان جۇمابەكوۆ بۇعان دەيىن "قازاقستاننىڭ ءبىرىنشى ارناسى" قارايتىن "ەۋرازيا+ورت" كومپانياسىنىڭ ۇستىنەن شاعىم ءتۇسىرىپ، مورالدىق شىعىن رەتىندە 100 مىڭ تەڭگە تالاپ ەتكەن. شاعىمعا تەلەارنا جۇرگىزۋشىسى ايميرا شاۋكەنتايەۆانىڭ ەفيردە ايتقان ءسوزى - جەر ماسەلەسى بويىنشا ميتينگتەردى وتكىزگەن ادامدارعا "اقشا تولەنگەنى" تۋرالى تاراتقان حابارى سەبەپ بولعان.

سۋديا تاتيانا چەرنىش تەلەارنا وكىلدەرى حابارلاسىپ، ادۆوكاتتىڭ ءىسساپاردان كەلە الماي قالعانىن ايتىپ، سوت تىڭداۋىن كەيىنگە قالدىرۋدى سۇراعانىن جەتكىزدى. سۋديا الدىن الا سوت تىڭداۋىن 8 ماۋسىم كۇنى تاڭعى ساعات 9-عا بەلگىلەدى.

بۇدان سوڭ سۋديا چەرنىش پەن شاعىمدانۋشى جۇمابەكوۆتىڭ اراسىندا از-كەم ديالوگ بولدى. سۋديا جۇمابەكوۆكە "ءسىز شاعىمىڭىزدا مورالدىق شىعىن تالاپ ەتىپ وتىرعان اقپاراتتى تەرىستەۋ تۋرالى تالاپ قويماپسىز. مۇنداي تالاپ قوياسىز با؟ شاعىمىڭىزدى وسىعان بايلانىستى تولىقتىراسىز با، الدە سولاي قالدىراسىز با؟" دەپ سۇرادى. زاڭگەر ازاماتتىق كودەكس پەن باسقا دا اكىمشىلىك زاڭدارعا سۇيەنىپ، تەلەارنادان اقپاراتتى تەرىستەۋدى تالاپ ەتپەيتىنىن ايتتى.