ءال-فارابي اتىنداعى قازاق ۇلتتىق ۋنيۆەرسيتەتىندە جىل سايىنعى ءداستۇر بويىنشا تۇلەكتەر كۇنى اتاپ ءوتىلدى. قازۇۋ-دىڭ بارشا تۇلەكتەرىنە ارنالعان سالتاناتتى شارا  قازاقستان رەسپۋبليكاسىنىڭ 25 جىلدىعى مەن الماتى قالاسىنىڭ 1000 جىلدىق مەرەيتويىنا ارنالدى، - دەپ حابارلايدى Qamshy.kz .

بارشا قازۇۋ تۇلەكتەرى كۇنىن تويلاۋ مەرەكەسىنە وراي وقىتۋشىلار، ستۋدەنتتەر مەن قازۇۋ تۇلەكتەرىنىڭ قوعامداستىعى ستۋدەنتتىك كامپۋس اۋماعىندا «ماڭگىلىك ەل» ساۋلەت كەشەنىن قۇرۋ يدەياسىن ۇسىندى. مەرەكە باسىندا  اتالمىش كەشەننىڭ نەگىزگى كومپوزيسيالىق قۇرىلىمى –  «ماڭگىلىك ەل» ستۋدەنتتەر مەن تۇلەكتەر تريۋمفالدى قاقپاسى،  «تەمىرقازىق» مونۋمەنتالدى كومپوزيسياسى جانە سۋبۇرقاعى بار «تايقازان» الاڭىنىڭ تانىستىرىلىمى ءوتتى. الداعى ۋاقىتتا بۇل جوبا بىتىرۋشىلەردىڭ  ورتاسىندا ەرىكتى جارنالار سالۋ نەگىزىندە جۇزەگە اساتىن بولادى. جيىلعان قاۋىمدى اتالمىش جوبالارمەن تانىستىرعان تۇلەكتەر قاۋىمداستىعىنىڭ اتقارۋشى ديرەكتورى كۇلعازيرا نۇران قىزى مەسەناتتاردىڭ قۇرمەت تاقتاسىنىڭ تۇساۋىن كەستى. سونىمەن قاتار تۇلەكتەر شىعىستىڭ ۇلى ويشىلى ءابۋ-ناسىر ءال-فارابي ەسكەرتكىشى مەن اكادەميك ءو.ا. جولداسبەكوۆ مونۋمەنتىنە قۇرمەتپەن گۇل شوقتارىن قويدى.

تۇلەكتەر كۇنىنە ارنالعان مەرەكەلىك جيىندا ءسوز باستاعان ءال-فارابي اتىنداعى قازۇۋ رەكتورى عالىم مۇتان ۇلى: «ءار ۋنيۆەرسيتەت جۇمىسىنىڭ كورسەتكىشى – تۇلەكتەرى. تۇلەكتەرىنىڭ ەڭبەك جولىنداعى ۇزدىك جەتىستىكتەرى – ۋنيۆەرسيتەت ءۇشىن زور ماقتانىش. وسى ورايدا قازۇۋ تۇلەكتەرى قوعامنىڭ بارلىق سالاسىندا بەلسەندى ەڭبەك ەتىپ، الدىڭعى قاتاردان كورىنىپ ءجۇر. ءوز ءىسىنىڭ شەبەرى اتانىپ، تۋعان ۋنيۆەرسيتەتىنىڭ دارەجەسىن كوتەرىپ جۇرگەن بارشا تۇلەكتەرىمىزگە ۇلكەن العىسىمدى جەتكىزەمىن»، – دەي كەلە، 2016 جىلعى جاس تۇلەكتەرگە اق جول تىلەدى. سونىمەن قاتار رەكتور ۋنيۆەرسيتەتتىڭ دامۋىنا  ايرىقشا ۇلەس قوسقانى ءۇشىن «ءال-فارابي اتىنداعى قازۇۋ-عا 80 جىل» مەرەيتويلىق مەدالىمەن ءبىرقاتار تۇلەكتەردى ماراپاتتادى. ولاردىڭ قاتارىندا گەولوگيا-توپىراقتانۋ فاكۋلتەتىنىڭ 1954 جىلعى تۇلەگى ن.ءا. كاليمولدايەۆ، بەلگىلى دراماتۋرگ، جۋرناليست 1971 جىلعى تۇلەك س.ب. بالعابايەۆ، حيميا فاكۋلتەتىنىڭ 1986 جىلعى تۇلەگى د.ج. نۇكەتايەۆا، حيميا فاكۋلتەتىنىڭ 1981 جىلعى تۇلەگى ز.گ. كاترانوۆا جانە زاڭ فاكۋلتەتىنىڭ 1981 جىلعى تۇلەگى ب.س. راحيموۆ بولدى.

مەرەكەلىك كەشتە قازاقستان رەسپۋبليكاسى جوعارعى سوتىنىڭ ءتوراعاسى، قازۇۋ تۇلەكتەر قاۋىمداستىعىنىڭ پرەزيدەنتى، ز.ع.د.، پروفەسسور، زاڭ فاكۋلتەتىنىڭ 1981 جىلعى تۇلەگى قايرات ءابدىرازاقۇلىنا ءسوز بەرىلدى. ق. ءمامي: «ءال-فارابي اتىنداعى قازۇۋ-دا جىل سايىن مامىر ايىنىڭ سوڭعى سەنبىسىندە اتاپ وتىلەتىن ەستە قالارلىق ەرەكشە مەيرام بار. ول – تۇلەكتەر كۇنى! بۇگىنگى كەزدەسۋگە كەلگەن بارشاڭىزدى، ۋنيۆەرسيتەت باسشىلىعى مەن ۇستازداردى، تۇلەكتەر مەن ستۋدەنتتەردى اتاۋلى مەرەكەمەن شىن جۇرەكتەن قۇتتىقتايمىن. بۇل كۇنى جينالعاننىڭ ءبارى ءبىرىن-بىرى كورىپ، تىلدەسىپ قانا قويماي، قايتا ورالماس ستۋدەنتتىك جىلداردىڭ ەستەلىكتەرىن ەسكە الۋدىڭ تاماشا مۇمكىندىگىنە يە بولادى. ءبىز قازۇۋ-مەن، قازۇۋ تۇلەكتەرىمەن ماقتانا الادى دەپ سەنىممەن ايتا الامىن. وسى جىلعى ءبىتىرۋشى ءاربىر جاس تۇلەك اعا بۋىننان ۇلگى الۋى قاجەت. قاسيەتتى قارا شاڭىراق قابىرعاسىندا العان ءبىلىمىن ەل يگىلىگىنە جۇمساۋ – ءاربىر تۇلەكتىڭ مىندەتى»، – دەپ ءسوز باستاپ، ودان ءارى تۇلەكتەر قاۋىمداستىعىنىڭ ءبىرجىلدىق جۇمىسىن قورىتىندىلادى. سونىمەن قاتار ول الدا جاسالاتىن جوبالارمەن تانىستىرا وتىرىپ، ساحناعا بەلگىلى اقىن، قازۇۋ تۇلەگى ولجاس سۇلەيمەنوۆتى شاقىردى. ۋنيۆەرسيتەت باسشىلىعى داڭقتى تۇلەگىن «قازاقستاننىڭ ەڭبەك ەرى» اتاعىن يەلەنۋىمەن قۇتتىقتاي وتىرىپ،  «قازۇۋ-دىڭ № 1 بەلدى تۇلەگى» مەدالىمەن ماراپاتتادى.  سونداي-اق ولجاس ومار ۇلى تۇلەكتەر قاۋىمداستىعىنىڭ اتىنان ۇزدىك ستۋدەنتتەرگە شاكىرتاقىلار تابىستاپ، ءبىلىم جولىندا ساتتىلىك تىلەدى.  

كەزدەسۋ بارىسىندا تۇلەكتەر اتىنان وزگە دە ۇزدىك ستۋدەنتتەرگە جانە كافەدرالارعا باعالى سىيلىقتار تاپسىرىلىپ، كوپشىلىك نازارىنا الما-ماتەر جەتىستىكتەرى تۋرالى ارنايى فيلم ۇسىنىلدى. جيىننىڭ رەسمي ءبولىمى اياقتالعان سوڭ، شاراعا قاتىسۋشىلار قازۇۋ ستۋدەنتتەرى دايىنداعان مەرەكەلىك گالا-كونسەرتتى تاماشالادى. ءارى قاراي ءداستۇر بويىنشا  سالتاناتتى كەزدەسۋ فاكۋلتەتتەردە جالعاسىن تاپتى. تۇلەكتەر ءوز فاكۋلتەتتەرىن ارالاپ، وقىتۋشىلارمەن جانە ستۋدەنتتەرمەن كەزدەسىپ، سۇحباتتاستى.

ءبىر كۇنگە سوزىلعان تۇلەكتەر كۇنىن كەرەمەت نوتادا قورىتىندىلاعان بال بىتىرۋشىلەردىڭ كوڭىلىن ءبىر سەرپىلتىپ تاستادى. بۇگىندە ەلىمىزدە جاستاردىڭ قاتىسۋىمەن ۇيىمداستىرىلاتىن كەشتەردە ۆالس بيلەۋ ۇلكەن  تانىمدىلىققا يە بولىپ كەلەدى. ۋنيۆەرسيتەت ستۋدەنتتەرىنەن قۇرالعان دەبيۋتانتتار پولونەز ءبيىن بيلەپ، ارتىنان ۆەنا ۆالسىمەن كوپشىلىكتى تامساندىردى.

«بۇگىن سىزدەر شىن مانىندە ۇلكەن ءومىردىڭ تابالدىرىعىن اتتاعالى تۇرسىزدار. ءبىز سىزدەرگە تەك ساپالى ءبىلىم بەرىپ قانا قويماي، سونىمەن قاتار ءارقايسىڭىزدىڭ بويىڭىزعا ازاماتتىق قاسيەتتەردى سىڭىرە بىلدىك دەپ ويلايمىز.

بۇگىن قوشتاسۋ كەشى. الايدا ءبىز سىزدەرمەن قوشتاسپايمىز. سىزدەر ءۇشىن قازۇۋ ەسىگى ءاردايىم اشىق. ۋنيۆەرسيتەت بىتىرۋشىلەرگە ارناپ ءتيىمدى «تۇلەكتەر كارتوچكاسىن» جاسادى. اتالمىش كارتا ۋنيۆەرسيتەت بىتىرۋشىلەرىنە الداعى ۋاقىتتا وقۋ ورداسىنىڭ بىرەگەي ءال-فارابي كىتاپحاناسىمەن، «كەرەمەت» ستۋدەنتتەرگە قىزمەت كورسەتۋ ورتالىعىمەن، جاقىندا اشىلاتىن ءجۇزۋ باسسەيىنى قىزمەتتەرىن ەش كەدەرگىسىز پايدالانۋعا مۇمكىندىك بەرەدى»، – دەدى قازۇۋ رەكتورى، اكادەميك عالىم مۇتان ۇلى. قۇتتىقتاۋ ءسوز سوڭىندا ۋنيۆەرسيتەت باسشىسى ستۋدەنتتىك جىلداردا بەلسەندىلىك تانىتقان وقۋ وزاتتارىن العىسحاتتارمەن ماراپاتتادى.

قارا شاڭىراقتىڭ تۇلەكتەر كۇنىنە قىزۋ دايىندىقپەن قاتىسقان، كۇنى ەرتەڭ وزدەرىنىڭ ءبىتىرۋ جۇمىستارىن قورعاپ، ديپلومدارىن قولعا ۇستاعالى تۇرعان بيىلعى بىتىرۋشىلەر ءۇشىن بۇل كەش ەرەكشە تولقۋمەن ءوتتى. بۇل كەش ءبىتىرۋشى تۇلەكتەر جادىندا ماڭگى ساقتالارى ءسوزسىز.

تۇلەكتەردى قۇتتىقتاۋ ءۇشىن قازاق ەستراداسىنىڭ جارىق جۇلدىزى ءمولدىر اۋەلبەكوۆا ارنايى كەلىپ، سالتاناتتى جيىن سوڭى جاستاردىڭ بي كەشىنە ۇلاستى.

قالامقاس امانقوسوۆا،

ەلدانا توقباي