ەلباسى بەلارۋس رەسپۋبليكاسىنىڭ پرەزيدەنتى الەكساندر لۋكاشەنكومەن كەزدەستى، - Qamshy.kz اقورداعا سىلتەمە جاساپ.
كەزدەسۋ بارىسىندا ساۋدا-ەكونوميكالىق، عىلىمي-تەحنيكالىق جانە مادەني-گۋمانيتارلىق ىنتىماقتاستىقتى ودان ءارى نىعايتۋ ماسەلەلەرى تالقىلاندى. مەملەكەتتەر باسشىلارى حالىقارالىق كۇن تارتىبىندەگى وزەكتى جايتتار جونىندە دە پىكىر الماستى. قازاقستان پرەزيدەنتى ەكى ەل اراسىنداعى قارىم-قاتىناس وداقتاستىق سيپاتىمەن ەرەكشەلەنەتىنىن اتاپ ءوتتى.
– ءبىزدىڭ رەسپۋبليكا – بەلارۋستىڭ جەتەكشى ەكونوميكالىق سەرىكتەسىنىڭ ءبىرى. جۇمسالعان كۇش-جىگەر ارقاسىندا سوڭعى جىلداردا كوپتەگەن بىرلەسكەن كاسىپورىندار قۇرىلدى. ءوزارا تاۋار اينالىمىنىڭ دەڭگەيى قازىرگى احۋالعا بايلانىستى ازداپ تومەندەدى، ءبىراق ونىڭ ناقتى جالپى كولەمى سول قالپىندا قالدى. ەلدەرىمىزدىڭ ينتەگراسيا ماسەلەلەرىنە قاتىستى كوزقاراسى ورتاق، حالىقارالىق ساياساتتا دا ۇستانىمدارى ۇقساس. ءبىز سىزبەن تۇراقتى تۇردە كەزدەسىپ وتىرامىز، قازىرگى كەزدە ستراتەگيالىق ىنتىماقتاستىقتى ودان ءارى دامىتۋ جۇمىسىن جۇرگىزۋدەمىز. كوپتەگەن ماسەلەلەر بويىنشا، سونىڭ ىشىندە ەۆرازيالىق ەكونوميكالىق وداق اياسىنداعى ءوزارا ءىس-قيمىل، وڭىردەگى جانە تۇتاس الەمدەگى احۋال جونىندە پىكىر الماسۋ ءۇشىن ءبىزدىڭ كەزدەسۋىمىزدىڭ ماڭىزى زور، – دەدى مەملەكەت باسشىسى.
الەكساندر لۋكاشەنكو قازىرگىدەي كۇردەلى جاعدايدا سەنىمگە نەگىزدەلگەن مۇنداي كەلىسسوزدەردىڭ ءاردايىم پايدالى ەكەنىن اتاپ ءوتتى.
– بىلتىر ءبىزدىڭ ارامىزداعى تاۋار اينالىمىنىڭ دەڭگەيى تومەندەدى. بۇل ۇدەرىستى كەرى باعىتقا ءتۇسىرۋ قاجەت. ءبىز – ءبىر ەكونوميكالىق وداقتا جۇمىس جۇرگىزىپ وتىرعان جاقىن مەملەكەتتەرمىز. بىزگە قارىم-قاتىناسىمىزدىڭ ىرگەتاسىن – ساۋدا مەن ەكونوميكانى نىعايتقان ءجون، ونىڭ ۇستىنە ءبىز قاي جولمەن ىلگەرى باسۋىمىز كەرەكتىگىن ايقىنداپ تا الدىق. بۇل باعىتتا جاسالعان نارسە از ەمەس، ءبىراق بىزگە وسى جاعدايدان تەزىرەك شىعۋ ءۇشىن قارىم-قاتىناسىمىزعا تىڭ سەرپىن بەرۋ كەرەك. حالىقارالىق ارەنادا ءبىز ءسىزدىڭ ەلگە بۇۇ اياسىندا دا، سونداي-اق جاھاندىق قۇجات – «الەم. XXI عاسىر» مانيفەسىنە قاتىستى دا قولداۋ بىلدىرەمىز. ءبىز كوپتەگەن باعىتتار بويىنشا قازاقستان تاراپىمەن بىرلەسە جۇمىس جۇرگىزۋگە ءازىرمىز، – دەدى بەلارۋس پرەزيدەنتى.
