پوليسەيلەر قازاقستان-امەريكاندىق ەركىن ۋنيۆەرسيتەتىنىڭ بيىل ساۋىردە قىرۋار قاراجاتپەن جوعالعان ستۋدەنتى اقجول سەرىكتى قاراعاندىنىڭ ماڭىنداعى اۋىلدان تاپتى. جىگىت 26 مامىردا تابىلعان، - دەپ حابارلايدى Qamshy.kz Tengrinews.kz-كە سىلتەمە جاساپ.
شىعىس قازاقستان وبلىستىق ءىىد وكىلدەرى 23 جاستاعى ستۋدەنتتى بۇكىل ايماق بويىنشا ىزدەگەنىن ايتتى. پوليسەيلەر اقجولدى سوڭعى رەت سەمەيدە جۇرگەن كەزىندە ءتۇسىپ قالعان ۆيدەودان بايقاعان. ەر ادام جەرگىلىكتى اۆتوبەكەتتىڭ ماڭىندا بولعان.
"پوليسەيلەر ىزدەۋدە جۇرگەن ستۋدەنت باسقا وڭىرگە كەتىپ قالدى دەگەن بولجام جاساپ، ول بولجامى دۇرىس بولىپ شىقتى. ونى ىزدەۋ بويىنشا ۇلكەن جۇمىس اتقارىلدى. ونى قاراعاندىدان الپىس شاقىرىم قاشىقتىقتا ورنالاسقان اۋىلدان امان-ەسەن تاپتى. پوليسەيلەر ونى ۇيىنە جەتكىزدى"، - دەدى ۆەدومستۆونىڭ باسپا ءسوز قىزمەتىنىڭ جەتەكگىسى باقىتجان تورعايەۆ.
اقجولدىڭ تۋىستارى بۇل وقيعاعا قاتىستى پىكىر بىلدىرۋدەن باس تارتىپتى.
وسكەمەندە قازاقستان-امەريكاندىق ەركىن ۋنيۆەرسيتەتىنىڭ ستۋدەنتى بەلگىسىز جاعدايلاردا جوعالعان ەدى. تۋىستارى ونىڭ جوعالعان كۇنى قولىندا قىرۋار قاراجاتتىڭ بولعانىن ايتقان ەدى. اقجول سەرىكتى ىزدەۋگە ەرىكتىلەر دە قوسىلدى. ولار ستۋدەنتتىڭ سۋرەتتەرىن قالا بويىنشا ىلگەن بولاتىن.
