ۇبت-نىڭ العاشقى كۇنى تەست تاپسىرمالارى زاڭسىز تۇردە ينتەرنەت ارقىلى سىرتقا شىعىپ جاتىر. تالاپكەرلەر سۇراقتاردى سىرتتاعىلاردان كومەك سۇراپ نەمەسە «ەندى تاپسىراتىندارعا كومەك» ەتىپ جاريالاعان، - دەپ حابارلايدى Qamshy.kz ازاتتىققا سىلتەمە جاساپ.
قازاقستاندا مەكتەپ بىتىرۋشىلەر 2-9 ماۋسىم اراسىندا تاپسىراتىن ۇلتتىق ءبىرىڭعاي تەستىنىڭ (ۇبت) ءبىرىنشى كۇنى-اق ەلدەگى جاستار كوپ قولداناتىن «ۆكونتاكتە» جانە «موي مير» الەۋمەتتىك جەلىسىندە بيىلعى ەمتيحان سۇراقتارى جاريالانىپ جاتىر. تاپسىرمالاردىڭ كوبى ۇيالى تەلەفونعا سۋرەتكە تۇسىرىلگەن. سىناق تاپسىرۋ ەرەجەسى بويىنشا تالاپكەرلەرگە اۋديتوريا ىشىندە ۇيالى تەلەفون الىپ كىرۋگە تىيىم سالىنسا دا، تىيىمدى اينالىپ ءوتۋدىڭ امالىن تاپقاندار از ەمەس سياقتى.
الەۋمەتتىك جەلىدەن بولەك WhatsApp پەن Viber بايلانىس باعدارلامالارى ارقىلى دا تەست تاپسىرمالارى تاراپ كەتكەن.
«ۆكونتاكتە» جەلىسىندە قازاقستان تاريحى، ماتەماتيكا، قازاق ءتىلى، ورىس ءتىلى، فيزيكا، گەوگرافيا، بيولوگيا پاندەرىنىڭ تاپسىرمالارى فوتو رەتىندە جاريالانعان. جاريالانعان تەست ساۋالدارى – قازاق جانە ورىس تىلىندە.
بىلتىر قازاقستاندا گرانتقا تۇسكەندەردىڭ ءتىزىمىن ينتەرنەتتە مينيسترلىكتەن بۇرىن جاريالاعان «ارتەم» ەسىمدى ينتەرنەت قولدانۋشى بيىل دا ءوز فورۋمىندا «2014 جىلى كەلەتىن ۇبت تاپسىرمالارىن» جاريالاپ توپ-توبىمەن شىعارىپ جاتىر.

ونىڭ ايتۋىنشا، «بۇل تەستەردىڭ بارلىعى ماۋسىمنىڭ 2ء-سى كۇنى كەلگەن». «ارتەم» ءوز فورۋمىندا «الداعى ۋاقىتتاردا تاعى دا تەست تاپسىرمالارىن جاريالايتىنىن» جازعان.
«ارتەمنىڭ» كىم ەكەنى جانە ۇبت ساۋالدارى مەن وقۋعا تۇسۋشىلەردىڭ ءتىزىمىن قانداي جولمەن قولىنا تۇسىرگەنى ءالى انىقتالماعان.
«ءار كۇنى ءارتۇرلى نۇسقا كەلەدى»
ۇبت وتكىزۋگە جاۋاپتى قازاقستان تەستىلەۋ ورتالىعىنىڭ ديرەكتورى قالي ابدييەۆ ازاتتىققا بەرگەن سۇحباتىندا ءار كۇنگە ءار ءتۇرلى نۇسقالار دايىندالعانىن ايتتى.

«تاپسىرمالاردا بىر-ەكى بەتتىڭ جاۋابى بار. ولاردى ءبىز كوردىك. بىر-ەكى سۋرەتتە تۇرعان ەشتەڭە جوق. باستىسى وندا جاۋابى جوق. ءبىراق بۇل كەي وڭىرلەردە ءتارتىپ بۇزىلعانىن بىلدىرەدى. كوبى تەلەفونعا ءتۇسىرىپ، شىققان سوڭ جاريالاعان سياقتى. 
تەستىڭ العاشقى كۇنى تەلەفون قولدانىپ اۋديتوريادان شىعارىلعاندار مەن ناتيجەلەرى جويىلعان وقۋشىلار بار. ناقتى دەرەكتى الداعى كۇنى جاريالايمىز. ال ءبىرىنشى كۇنى كەلگەن تەست نۇسقالارى ەكىنشى كۇنى كەلمەيدى. ءار كۇنگە نۇسقالارى بولەك-بولەك كىتاپشالار دايىندالعان» دەدى تەستىلەۋ ورتالىعىنىڭ باسشىسى ازاتتىق تىلشىسىنە.
ال شىعىس قازاقستان وبلىسى تارباعاتاي اۋدانىنداعى مەكتەپتەردىڭ بىرىندە ساباق بەرەتىن ءمۇعالىمى گۇلفايرۋز ساپارعالييەۆا پايىمداۋىنشا، ۇبت-نى بىرنەشە كۇنگە سوزباي ءبىر-اق كۇندە وتكىزۋ كەرەك.
«قازاقستاندا ۇبت – ۇلكەن ناۋقان، تالاي ادامنىڭ تاعدىرىنا سەبەپ سىن. ءبىلىم جانە عىلىم مينيسترلىگى، ىشكى ىستەر ورگاندارى بۇل سىناقتىڭ تازا ءوتۋى ءۇشىن بار جاعدايدى جاساپ جاتقانىمەن كوپ جايتتاردا جاۋاپتار ساتىلىپ، سۇراقتار سىرتقا شىعىپ جاتىر. جالپى ۇبت-نى ءبىر، ۇزاعاندا ەكى كۇندە وتكىزۋدى قاراستىرعان ءجون» دەيدى مەكتەپ ءمۇعالىمى.
ءبىلىم جانە عىلىم مينيسترلىگى ۇبت وتەر الدىندا WhatsApp پەن Viber سياقتى بايلانىس قۇرالدارى ارقىلى اقپاراتتىڭ سىرتقا شىعىپ كەتۋى مۇمكىن ەكەنىن ايتقان ەدى.
ال ماۋسىمنىڭ 2ء-ى كۇنى ۇبت الدىندا باسپا ءسوز ءماسليحاتىن وتكىزگەن ءبىلىم جانە عىلىم ۆيسە-مينيسترى تاحير بالىقبايەۆ: «قاۋىپسىزدىك ماسەلەسى – وتە ماڭىزدى. ءار اۋديتوريا الدىندا بايلانىس قۇرالدارىن بۇعاتتايتىن قۇرىلعىلار ورناتىلعان. تەست وتكىزۋگە ىشكى ىستەر مينيسترلىگى مەن مەملەكەتتىك كوميسسيا قىزمەتكەرلەرى دە تارتىلدى» دەپ مالىمدەگەن.