قىتايلىق كومپانيا سولتۇستىك قازاقستاندا مايلى داقىل وڭدەۋ زاۋىتىنىڭ قۇرىلىسىن باستادى، - دەپ حابارلايدى Qamshy.kz ازاتتىققا سىلتەمە جاساپ.

سولتۇستىك قازاقستان وبلىسىندا قىتايلىق «ايسزيۋ» كومپانياسى مايلى داقىلداردى قايتا وڭدەيتىن بىرلەسكەن كاسىپورىن زاۋىتى قۇرىلىسىن باستادى. زاۋىت تايىنشا اۋدانىنا قاراستى يليچيەۆكا اۋىلىندا تۇرعىزىلماق. بىرلەسكەن جوباعا قىتايلىق ينۆەستورلار قازىرگە دەيىن 30 ميلليون دوللار قاراجات قۇيعان. جوباعا ءالى 100 ميلليون دوللار كولەمىندە ينۆيستيسيا قۇيۋ جوسپارلانىپ وتىر. زاۋىت سولتۇستىك قازاقستان وبلىسىنان جىلىنا 300 مىڭ تونناعا دەيىن مايلى داقىلداردى ساتىپ الادى جانە كۇنىنە ءبىر توننا ماي شىعارادى دەپ جوسپارلانعان.

«ايسزيۋ» كومپانياسىنىڭ پرەزيدەنتى حەي دزيانىڭ سوزىنشە، قازاقستاندا قايتا وڭدەۋ زاۋىتىن سالۋدىڭ مۇمكىندىگى زور.

- ءبىز قازاقستاندىق ءونىمدى ورگانيكالىق تازا ءونىم دەپ بىلەمىز. سوندىقتان ول جۇڭگو نارىعىندا ۇلكەن سۇرانىسقا يە بولادى. جۇڭگو جىلىنا 17 ميلليون توننا ماي ونىمدەرىن شەتتەن اكەلەدى. قازاقستاندا قايتا وڭدەۋ زاۋىتىن سالۋ ۇلكەن مۇمكىندىكتەر بەرەدى دەپ ويلايمىز جانە ءبىز قىتايدا ەسپورتتى ءبىر جونگە كەلتىرەمىز، - دەدى حەي دزيا.

سولتۇستىك قازاقستان وبلىسىنىڭ اكىمى ەرىك سۇلتانوۆ بۇل جوبا ءساتتى جۇزەگە اسسا كومپانيا باسشىلىعى تاعى جەتى زاۋىت سالۋدى جوسپارلاپ وتىرعانىن ايتادى.