قازاقپارات حالىقارالىق اقپارات اگەنتتىگىنىڭ جۋرناليستەرى ناۋرىزدان بەرى ايلىق الماعان. وسىعان وراي قالام ۇستاعاندار نارازىلىق اكسياسىن باستاماق. اگەنتتىك قىزمەتكەرلەرى اقپارات جانە كوممۋنيكاسيا، دەنساۋلىقساقتاۋ جانە الەۋمەتتىك دامۋ مينيسترلەرىنەن ماسەلەگە ارالاسۋدى سۇراپ حات جازۋدا، - دەپ حابارلايدى Qamshy.kz «قازاقستان جاڭالىقتارىنا» سىلتەمە جاساپ.

جۋرناليستەر تاراتقان حابارلامادا ولاردىڭ سوڭعى رەت 2016 جىلدىڭ قاڭتار، اقپان ايلارىنىڭ جالاقىسىن ناۋرىز ايىندا العانى ايتىلادى. سودان بەرى اگەنتتىك قىزمەتكەرلەرى ەڭبەكاقىسىز جۇمىس ىستەپ كەلگەن.

«19 ناۋرىزدان باستاپ ەلدە كوپتەگەن وقيعالار بولدى... پارلامەنت سايلاۋى ءوتتى، جەر ماسەلەسى كوتەرىلدى، جەر رەفورماسى جونىندە ۇلكەن كوميسسيا قۇرىلىپ، جاڭا مينيسترلىك پايدا بولدى. تەك «قازاقپارات» قىزمەتكەرلەرىنىڭ جالاقىسىنا قاتىستى عانا ەش وزگەرىس بولماي وتىر. بىرەۋلەر مۇنى قاساقانا سوزىپ وتىرعانداي كورىنەدى. اگەنتتىكتىڭ جالاقى ماسەلەسىن شەشۋ مەملەكەت دەڭگەيىندە مۇمكىن بولماي وتىر»، - دەلىنگەن جۋرناليستەر تاراتقان حابارلامادا.

جۋرناليستەر 17 مامىر كۇنى «قازاقپارات» حاا» ج ش س باسشىلىعىنا ەرەۋىلگە شىعاتىندارىن جەتكىزگەن كورىنەدى. الايدا، اگەنتتىك باسشىسى د. دياروۆ كەلەسى اپتادا ەڭبەكاقى تولەنەدى دەپ سەندىرگەن. الايدا، 27 مامىر كۇنى د. دياروۆ ۇجىمدى قايتادان جيناپ: «بارلىق قۇجاتتارعا قول قويىلدى، اقشا قازىناشىلىق باسقارماسىنا كەتتى، ەندى «قازكونتەنت» اق-ى «قازاقپاراتقا» اقشا اۋدارعانىن كۇتۋ كەرەك. بانك وپەراسيالارى بۇگىن اياقتالماسا، دۇيسەنبى كۇنى ايلىق الاسىزدار»، - دەگەن.

«ءبىراق، بۇگىن دۇيسەنبى تۇگىلى، بەيسەنبى بولدى. بىزگە بىرەسە قۇجاتتار ءازىر بولدى، بىرەسە وزگەرىستەر ەنەدى، تاعى بىرەۋلەر قول قويۋ قاجەت دەپ وتىر. ءبىزدىڭ جالاقىمىزدىڭ ەندىگى تاعدىرى «قازكونتەنت» پەن بۇرىنعى اقپارات جانە بايلانىس كوميتەتىنىڭ باسشىسى ت. قازانعاپتىڭ قولىندا كورىنەدى»، - دەيدى جۋرناليستەر.

95 جىلدىق تاريحى بار اگەنتتىك قىزمەتكەرلەرى جالاقى ماسەلەسى شەشىلمەسە كەلەسى اپتادا پرەزيدەنتكە حات جازاتىندارىن ايتىپ وتىر.

ەستەرىڭىزگە سالساق، اقپارات اگەنتتىگىندە ەڭبەكاقىنى كەشىكتىرۋ جاعدايى بۇرىنىراقتا دا ورىن العان بولاتىن.