اقتوبەلىك ايەلدەر شەتەلدىكتەرگە دە جاتىرىن جالعا بەرىپ جاتىر. وزگەگە بالا سىيلاعانى ءۇشىن ايەلدەر 1،5-2،5 ملن تەڭگە الادى. بۇل تۋرالى timeskz.kz سايتىنا سىلتەمە جاساپ NUR.KZ پورتالى حابارلايدى.

اقتوبەدە بەس سۋرروگات انا تۇرادى. ولاردىڭ ۇشەۋى نارەستەسىن بوسانىپ، الماتى، اقتوبە جانە ورال تۇرعىندارىنا تابىستاعان. ال ءتورتىنشى سۋرروگات انانىڭ اياعى اۋىر. بەسىنشىسى بولسا، ەندى عانا ەمبيرون سالدىرۋعا بەل بۋعان.

ماۋسىم ايىندا كەلىنشەككە ەمبريوندى اقتوبەنىڭ ۆرت-تەحنولوگياسى كلينيكاسىندا سالاتىن بولادى. نارەستەگە تاپسىرىس بەرىپ وتىرعاندار – مارتۇك اۋدانىنداعى ەرلى-زايىپتىلار.

تاعى ءبىر تاپسىرىس بەرۋشى - كاناداداعى تورونتو قالاسىنىڭ تۋمالارى. شەتەلدىك ەرلى-زايىپتىلار نارەستەنى قۇشاعىنا باساتىن ءساتتى تاعاتسىز كۇتىپ وتىر. جۇكتى ايەل تامىز ايىندا بوسانىپ، نارەستەنى شەتەلدىك جۇپقا تابىستاۋى ءتيىس.

ايتا كەتەرلىگى، كانادادا سۋرروگات انادان نارەستەلى بولۋ الدەقايدا قىمبات.

"اقتوبەلىك سۋرروگات انالار ءوز قىزمەتى ءۇشىن 1،5-2،5 ملن تەڭگە سۇرايدى. تاعى شامامەن 1،4 ملن تەڭگە ەكستراكورپورالدى ۇرىقتاندىرۋ جاساتۋ ءۇشىن اقتوبەنىڭ ۆرت-تەحنولوگياسى كلينيكاسىنا تولەنەدى. سۋرروگات انالارعا مەملەكەتتىك تاپسىرىس بەرۋ قىزمەتى ەلىمىزدە جوق"، - دەيدى ۆرت-تەحنولوگيسى كلينيكاسىنىڭ ديرەكتورى ليۋدميلا پوكوتيلو.

ونىڭ ايتۋىنشا، ءتىپتى جاتىرى الىنىپ تاستالعان ايەل دە انا اتانا الادى. تەك ونىڭ ورنىنا ايەلدىڭ جاسۋشالارىن وزىنە سالدىرعان سۋرروگات انا بالانى كوتەرەتىن بولادى.

"كوبى قاراجات قيىندىقتارىن شەشۋ ءۇشىن سۋرروگات انا بولادى. جاقىندا ولاردىڭ ءبىرى 2،5 ملن تەڭگە الىپ، نەسيەسىن جاپتى"، - دەيدى ليۋدميلا.

ءۇشىنشى سۋرروگات انا 2016 جىلدىڭ اقپانىندا تاپسىرىس بەرۋشىلەرگە ەگىز بوسانعان.