كوكشەتاۋدا ءوتىپ جاتقان جەر كوميسسياسىنىڭ وتىرىسىندا ساياساتكەر مۇحتار تايجان اگروبانك قۇرۋدى ۇسىندى، - دەپ حابارلايدى Qamshy.kz.

ساياساتكەر اۋىلشارۋاشىلىعى مەن اۋىلدىق وڭىرلەردى قولداۋمەن اينالىساتىن قارجى ۇيىمىن قۇرۋ ارقىلى ۇلتتىق بانك قارجىسىن ءتيىمدى ۇسىنۋعا بولاتىنىن ايتادى.

«اۋىلعا نەگە كومەكتەسپەيمىز. ۇلتتىق قوردان 10 ملرد اۋىلعا نەگە بەرمەسكە؟ تەك ديحاندارعا عانا ەمەس، ول اقشانى جول، گاز، سۋ، مەديسينا جاعىنان نەگە كومەكتەسپەسكە؟»، - دەگەن ساياساتكەر اگروبانك ارقىلى اۋىلدىڭ كوپتەگەن پروبلەماسىن شەشۋگە بولاتىنىنا سەنىمدى.

م. تايجاننىڭ بۇل ۇسىنىسىن دەپۋتات ۆ. كوساريەۆ تە قولدادى. 

سونداي-اق، م. تايجان ميتينگكە قاتىسقانداردى قۋدالاۋ ماسەلەسىن دە كوتەردى.

«قۋدالاۋ تۋرالى ايتۋعا ءماجبۇرمىن. وتكەندە 15 تاۋلىككە قامالعاندار شىعا باستادى. ءبىراق، ماكس بوقايەۆ، جانات ەسەنتايەۆ، ماحامبەت ءابجان، تالعات ايان سىندى جىگىتتەردىڭ ۇستىنەن قىلمىستىق ءىس اشىلدى. وتە اۋىر باپتەرمەن اشىلدى. تاعى دا ايتامىن، ازاماتتاردى قۋدالاۋ توقتاتىلسىن! ميتينگكە شىققان ادامداردى جامانداۋدى توقتاتايىق. ولار دا ءبىزدىڭ ادامدارىمىز. مەن ءوزىم دە ميتينگىگە ءوتىنىش بەرگەن اداممىن. ءتيىستى ورگاندارعا تاعى دا ۇندەۋ جاسايمىن، قۋدالاۋدى توقتاتايىق. وسىنداي ۇستەل باسىندا ورتاق شەشىمگە كەلەيىك، قۋدالاۋ كەرەك ەمەس»، - دەيدى م. تايجان.