ەرمۇرات ارعى بەتتەن الماتىعا العاش اتتاناردا اتا-اناسى دا ءتىرى ەدى، بالاسىنا باتاسىن بەرىپ، اق جول تىلەپ جولعا سالعان. ءوزى ۇلىقتاعان وسى ءبىر ونەردىڭ جولىندا ول، ساتكە بولسادا باسىنداعى بار باقىتىن قايىرىپ قويىپ، «قازاقستان قايداسىڭ» دەپ تارتتى دا كەتتى. بولماسا ىڭگالاپ ەندى عانا ءومىر  ەسىگىن اتتاعان، اۋەلدەسەڭىز، قىرقىنان دا شىقپاعان جورگەكتەگى قىزىل شاقا «قابانبايىن» كوتەرىپ، ەرجەتكىزەم دەپ قۇلجادا جۇرەتىن ەدى عوي. «ادامنىڭ باسى-اللانىڭ دوبى» دەيتىن، وسى ءبىر قاراپايىم قازاقتىڭ فيلوسوفياسىنا كەيدە مىڭ ماركستىڭ دا قۇرىعى جەتپەيدى. تەك مۇندا تون-شالبار كيگەن بابالارىمىزدىڭ بار جازىعى - بىتكەن ءومىر قۇبىلىستارىن «اللانىڭ الاقانىنا» سالىپ قانا بەرە سالعانى. كىم ءبىلسىن سول دا دۇرىس شىعار؟! سونىمەن ەرەكەڭ سول كەتكەننەن مول كەتتى. ەلى-جۇرتىن كورمەگەنىنە جەتى جىل بولدى. وسى بارىستا ارعى بەتتەگى اتا-اناسى دا دۇنيە سالىپ، سول كىسىلەرگە ءوز قولىنان دا توپىراق سالا المادى. جەتى جاسقا كەلگەن قابانبايى اناسىنىڭ ەتەگىنەن ۇستاپ، اكەسىن ىزدەپ الماتىعا كەلگەنى ا-نە-ۋ كۇنى عانا. قوساعى تۇران بولسا جەتى جىل كورىسپەگەن جارىنىڭ قازاقستانداعى قال-جايىنان بەيحابار، الماتىعا ۇلىن جەتەكتەپ جولاۋشىداي بولىپ قانا كەلە سالعان. بۇل كەزدەرى شىنىندا دا مارقۇمنىڭ باسپاناسىنىڭ بۇرىشىنان جەتىم قىزدىڭ جۇگىندەي عانا شوشايعان كورپە-جاستىقتى كورۋشى ەدىك. !؟.

    ەرەكەڭ ءبىر كەزدە توسەكتىڭ باسىنداعى كەرەگەگە سۇيەلگەن قارا دومبىراعا قول سوزدى. قايىرماسى: .

_ انا، ءتۇس كوردىم جاڭا،

تۇسىمدە مەنى تەربەتىپ وتىرسىڭ، انا،-دەپ كەلەتىن انالارعا باعىشتالعان ءبىر ءاندى توسىننان باستاپ الا جونەلدى. اتالمىش ءاندى مارقۇمنىڭ اۋزىنان تۇڭعىش ەستۋىم. ونىڭ ۇستىنە ءوزىم كورىپ جۇرگەن انشىلەردىڭ ىشىندە ءوزىن ۇمىتىپ، شىن دىلىمەن وسىلايشا ورىندايتىن اكتەر-انشىنى شىنىمدى ايتسام بۇرىن-سوڭدى كەزىكتىرمەپپىن. سول ساعاتتاردا اۋىت ەكەۋىمىزدىڭ دە شىيقانىمىز جارىلىپ كەتە جازداپ، پىسىلداپ، پىشىلداپ وتىردىق.

- ەرەكە،-دەدىم ءبىر كەزدە بوزاداي بۇزىلىپ وتىرعان كوڭىلدەردى باسقا ءبىر جاققا بۇرعىم كەلىپ، - مەنىڭ انام كىم، ءسىزدىڭ اناڭىز كىم، ءتۇبىن قۋساڭ ءبىر اتانىڭ، ءبىر اۋىلدىڭ قىزدارى ەمەس پە؟! ءسىزدىڭ بۇگىنگى سىنىڭىز دا ورىندى، انالارىمىزدىڭ ادال ەڭبەگىن سىيلاعانىڭىزعا اسەرلەنىپ وتىرمىن. ەندى مەنىڭ سيىمدى قابىل الساڭىز؛ وسى سىرماقتى اناڭىزدىڭ كوزىندەي كورىپ ءجۇرىڭىز، ءسىزدىڭ تورىڭىزگە اپارىپ سالايىن،-دەدىم. بۇل ويىمدى اۋىت تا الاقانىن اياماي سوعىپ قۋاتتاپ اكەتتى. سونىمەن سول كۇنى تۇندە اۋىت ەكەۋىمىز سىرماقتى ەرەكەڭنىڭ تورىنە اپارىپ سالىپ، وزىمىزشە سالتىن وتكىزىپ دەگەندەي تاڭ اتىرىپ تاراستىق. سول كۇنگى جاتاقحانادا ايتىلعان ءاننىڭ اسەرى كوپكە دەيىن مەنىڭ كوڭىلىمنەن كوتەرىلمەي قويدى. ايتۋلى اسەرلى شاقتىڭ مەنىڭ بار تانازارىمدى تارتىپ اكەتكەنىنەن بولسا كەرەك كوپ ۇزاماي، وسى ءاندى وزىنە وتتىق ەتكەن «ءاندى سۇيگەن ادام» اتتى ەرەكەڭە ارنالعان ولەڭىم جازىلدى:

كۇي تەربەتىپ، الديلەگەن ءان ءبىزدى،

بابالاردان ءبىر قاسيەت قالدى ىزگى.

ارعى بەتتەن الىپ ۇشىپ ءان سەنى،

بەرگى بەتكە ۇيالاتىپ قالعىزدى.

حان ءتاڭىردىڭ تانىپ مىناۋ مارقاسىن،

الاتاۋ دا توستى ساعان ارقاسىن.

ارعى بەتتى ساعىنعاندا ءان سالىپ،

شىڭبۇلاققا اۋناپ-قۋناپ قايتاسىڭ.

الماتى دا كەتتى ساعان كوكتەم بوپ،

از جارادىڭ، از جۋسادىڭ كوپ تەرلەپ.

سۇلۋلار دا وكپەلى ەمەس ەرەكە،

سۇلۋلارعا ءوزىڭنىڭ دە وكپەڭ جوق.

جىلاساڭ دا، قۋانساڭ دا، كۇلسەڭ دە،

ءان دەگەن ءبىر اسىل ارمان ءجۇر سەندە.

اندەي سۇيگەن جوق شىعارسىڭ ءاي، دوسىم،

قانشا قىزدى القىندىرىپ سۇيسەڭ دە.

اۋىلىڭ دا ءان، باۋىرىڭ دا ءان، اناڭ دا ءان،

ءان قاشاما، ءاندى سۇيگەن ادامنان.

جۇمىر جەردىڭ بەتىندەگى تىرشىلىك،

ءبىر سەن ءۇشىن ءان بولۋعا جارالعان.

مىناۋ ءاننىڭ شەر عوي تۇرعان نوتاسى،

تىڭداعاننىڭ شىمىرلايدى-اۋ جوتاسى.

ارعى بەتتە بوزداپ جاتسا بوزىنگەن،

بەرگى بەتتە بەبەۋلەيدى بوتاسى.

بوزىنگەننىڭ بۇل داعى ءبىر كۇيى مە،

نە بوپ كەتتى، ويحوي، مىناۋ دۇنيە!

ءان بوپ شىعا كەلەدى ەكەن اۋەندەر،

جولىققاندا سەنىڭ كوڭىل كۇيىڭە.

جالعىزدارعا جاراتقانىم جار بوسىن،

قونىسىنا قونار كەلىپ نار كوشىڭ.

ارعى بەتتى ساعىندىق قوي، ساعىندىق،

تاعى ءبىر ءان سالىپ جىبەر ال، دوسىم («اقساق ءبورى»، 2004-جىل، استانا، «ەلوردا» باسپاسى، 103-بەت) .

    مىنە وسىنداي جالعىز انگە عانا ەمەس جالپاق قازاق ونەرىنە ءوزىنىڭ كىسىلىك بار عۇمىرى مەن الدىندا تۇرعان ادامدىق بار باقىتىن بايلاعان، وسى جولدا «مىڭ ءبىر تۇندەگى» ءماجۇنىنىڭ كۇيىن كەشىپ كۇن كەشىرگەن، قايران ءبىزدىڭ قابىلان بولمىستى ەرەكەڭ ەلىمەن ەرتە قوشتاستى. ارتىندا ايتىلىپ تاۋسىلمايتىن، كۇندەر وتكەن سايىن كوبەيىپ مايالانا بەرەتىن ماڭگى اڭىز قالدى. ەرمۇراتتاي ەر تۇلعانىڭ باسىنداعى كەيبىر قۇپيا دا جۇمباق حالدى حالىققا ورايى كەلگەندە تەك قانا تاريح ءتۇسىندىرىپ بەرەتىن بولار؟! مۇنداعى «وراي» دەگەن ءسوزدىڭ ءوزى دە مەنىڭشە وڭىپ تۇرعان جوق، ارعى جاعى كوپ جاعدايدا مۇلدە شەشىلمەيتىن ءتۇپسىز تۇيىنشەككە اينالىپ، تاريحتىڭ تىلسىم بەتتەرىنە كوشىپ كەتۋى دە بەك مۇمكىن. ويتكەنى، ۇلىلاردىڭ ءومىرىنىڭ ءوزى كوبىندە وسىلاي تاڭعاجايىپ قۇپيالاردان تۇرادى.  !؟.

   مارقۇم دۇنيە سالعاندا جانازاسىنا قاتىناسا المادىم. قيسىنى كەلىپ قىرقىنا ۇلگەرىپ، اعامىزدىڭ الماتىداعى شاڭىراعىنا باس سۇققانىمدا، سامالدىقتىڭ ەدەنىندە جاتقان باياعى سول سىرماق كوزىمە وتتاي باسىلدى...

*****

 2005 جىلدىڭ كۇز ايلارىنىڭ بىرىندە جولىم ءتۇسىپ، قازاقستاننىڭ ەل ورداسى - استاناعا باردىم. بەلگىلى اقىن، ادەبيەت تانۋشى بەكقوجا جىلقىبەك ۇلى اعامىزدىڭ ۇيىندە وتىر ەدىك، تەلەفون قوڭىراۋى شالىندى. ترۋپكانى قۇلاعىنا كوتەرگەن بەكەڭ، «بولادى، بولادى» دەگەن قىسقا قايىرىمدى ماقۇلدىقپەن تۇتقانى ورنىنا قوندىرىپ جاتىپ: .

- ەل وردادان سويلەپ تۇرعان ەرمۇرات! ۇلى وتان سوعىسى جەڭىسكە جەتكەنىنىڭ 60 جىلعا تولۋ بايلانىسىمەن ونەر ۇجىمدارى ەرتەڭ كانگرەسحولدا ۇلكەن كونسەرت بەرەدى ەكەن. «كەلىپ كورەم دەۋشىلەرگە ەسىك اشىق، بيلەتسىز ويىن كورىڭدەر» دەپ ءبىزدى شاقىرىپ جاتىر،-دەدى باياعى جىميا كۇلىپ، جۇمساق سويلەيتىن ادەمى ادەتىمەن. تەگىن تاماشادان كىم قاشادى، ءبارىمىز دە بارۋعا پەيىلدىلىگىمىزدى ءبىلدىرىپ بارەكەلدى دەستىك. ەرتەسى جاعا-جەڭىمىزدى تۇزەپ بەكقوجا اعامىز باستاپ، بەلگىلى دىبىس اكتەرى اسەمعازى قاپان ۇلى ۇشەۋىمىز ۇيدەن شىقتىق. ويىن باستالار ۋاقىتتان جارىم ساعات بۇرىن جەتسەك تە، ورتالىق سارايدىڭ الدى قاپتاعان قالىڭ ادامدار لەگىمەن تولىپ كەتىپتى. جەڭىس كۇنى بولعاسىن با، كىم ءبىلسىن؟! كەۋدەسى وردەنگە تولعان كەڭەستەر وداعى كەزىندەگى اسكەري فورمالارىن كيگەن قارتتار دا ءجۇر. اسىرەسە، الاڭنىڭ ءتورت قۇبىلاسىندا ساپقا تۇرعان قارۋلى سالداتتار، بۇگىنگى بۇل كونسەرتتىڭ ايباتىن تىپتەن دە اسىرا تۇسكەندەي. سويتسەك، بۇگىنگى بۇل جەڭىس تويىنا قازاقستاننىڭ ەلباسى نۇرسۇلتان نازاربايەۆتىڭ ءوزى كەلىپ قاتىناسادى ەكەن. ۇلكەن كىسى كەلدى دەگەن ءسوز، بىتكەن مينستيرلىك اتقا ءمىندى دەگەن ءسوز. سونىمەن سولداتتاردىڭ نۇسقاۋىمەن ساۋلەتتى سارايدىڭ ەڭ ارتقى قاتارىنداعى ورىندىقتارىنىڭ بىرىنە كەلىپ تىزە بۇكتىك. پرەزيدەنت كىردى، بۇكىل ەل ورنىنان تۇرىپ قۇرمەت كورسەتتى. كونسەرت شىمىلدىعى ءتۇرىلدى، ساحنادان ءبىرىنشى بولىپ باياعى ءبىزدىڭ ەرمۇراتىمىز كورىندى. بۇگىنگى بۇل كونسەرتتىڭ اساباسى دا ەرەكەڭ ەكەن. كەزەگى كەلگەندە باريتون داۋىسىمەن كەلىستىرىپ وتىرىپ ءوزىنىڭ «كوك تۋدىڭ جەلبىرەگەنى» ءانىن اسقاقتاتا شىرقادى. سارايدىڭ ءىشى بولەك سالتاناتقا بولەنىپ، الاقانىمىز شىمىرلاپ اشىپ كەتكەنشە قول سوقتىق. ويتكەنى، ول كەز بۇل ءاننىڭ بۇگىنگىدەي كوپكە كەڭ تارالىپ كەتە قويماعان كەزى ەدى. مەنىڭ بايقاۋىمشا وسى ونەر كوللەكتيۆىنىڭ ىشىندەگى ەڭ مىقتى جەكە ورىنداۋشى دا مارقۇم ەرەكەڭ سەكىلدى. دەسە دە جاسىرىپ كەرەگى نە ءبىر نارسەگە كوڭىلىم تولماي، جانىم اشىپ، كەڭسىرىگىم كەرمەك تاتىپ وتىردى. نەگە دەسەڭىز مارقۇم سول كۇنى باستان اقىر ساحنا تورىنە ەتەك-جەڭى مەن بالاعى تۇجىركەلەنگەن مەشپەت-سىم، اياعىنا شاقاي، باسىنا قاسقانسىز قاراپايىم شاكپى كيىپ شىعىپ وتىردى. ادەتتە اسپاز بەن شوشقا باعاتىن ءوندىرىس اسكەرلەرى عانا وسىلاي كيىنسە كەرەك ەدى. ال، ۇجىمداعى ونەر يەلەرىنىڭ ەرمۇراتتان باسقاسى، قىلاياعى اركەستىردىڭ قولىنا شىلدىرماق ۇستاپ شىعاتىن قاتارداعى قاراپايىم مۇشەسىنە دەيىن، نەسىن ايتاسىڭ ەر-ايەل دەمەي ومىراۋلارى ساپ-سارالا، يىق-جەڭدەرىنە قادالعان اسكەري بەلگىلەرى جارىقپەن جارىسىپ جۇلدىزداي جارقىرايدى، باس كيىمدەرى قۇز باسىنداعى ارقاردىڭ مۇيىزىندەي تىپتەن ايباتتانىپ كەتكەن. «بۇنىسى نەسى؟» دەيمىن ىشتەي وز-وزىمنەن قورلانىپ! ارى ويلانىپ، بەرى ويلانىپ ويىمنىڭ ەڭ سوڭعى تياناعى باياعى سول «ورالمان» دەگەن اتاۋعا تىرەلدى دە تىندى. كونسەرت تە ءبىتتى. الدىمەن سولداتتار الدىڭعى  قاتاردا وتىرعان ەل باسىنا جول اشتى، قالعان كورەرمەندەر سونىڭ ارتىنان شۇيكەدەي شۇبالىپ ساراي ەسىگىنە بەت الدى. الدىمىزداعى ەلدىڭ قاتارى سەتىنەپ، سۋسىپ ادىمىمىز ەندى اشىلا بەرگەندە، بەكەڭ: .

- جىگىتتەر اسىقپاڭدار، ساحناعا بارىپ ەرەكەڭدى قۇتتىقتايىق،-دەپ تاعى دا اعالىق اقىلىن كورسەتىپ، الدىمىزدى وراپ كەتتى. ءبىزدىڭ دە سول ورتاداعى مۇنداي قوعامدىق سالتقا كوڭىل ۇيرەتە باستاعان كەزىمىز، بەكەڭە ەرىپ ساحنا جاققا بەتتەدىك. ءزاۋلىم ساحنانىڭ ءبىر بۇرىشىنداعى تورعىن شىمىلدىقتىڭ جاقپارىنان ەرەكەڭ، ءبىزدىڭ كەلە جاتقانىمىزدى كورىپ كۇزەتىپ تۇرىپتى. كەزەكپەن كەلىپ ءبارىمىزدى قۇشاعىنا الدى. بىلگەن ماقتاۋ مەن ماداعىمىزدى جاۋدىرىپ جاتىرمىز. مارقۇمنىڭ كوڭىلىندە كەرەمەت تولقۋ بار ەكەن: .

- ومىرىمدە ۇلكەن بۇرىلىس بولاتىن بولدى، باۋىرلارىم...،-دەپ قايتالاپ كەلىپ ۇشەۋىمىزدى تاعى دا قۇشاقتادى. تاعى بىزدەر ول قۋانىشتىڭ نە ەكەنىن قازىرشە ءبىلىپ كەتپەسەك تە، «قۇتتى بولسىن» ايتىپ، اق تىلەگىمىزدى جامىراتتىق.

- ءمينيستردىڭ ءوزى وسى ءقازىر مەنىڭ اسكەري شەنىمدى وسىرەتىن بولدى،-دەدى ەرەكەڭ داۋىسى تارعىلدانىپ. بەكەڭ باستاعان بىزدەر دە ەس قالمادى. كەزەك-كەزەك ەرەكەڭدى جەردەن كوتەرىپ الىپ، ءتوسىمىز قايقايىپ توبەمىزگە كوتەرگەن بولامىز. ءوزى دە ەتتى-جەندى شويىنداي جىگىت، قىڭار ەمەس. بىزگە سالسا ونى وسى ءقازىردىڭ وزىندە جەلكەمىزگە وتىرعىزىپ العىمىز بار. باقىتتان باسىمىز اينالىپ تۇرعاندا كوكتەن ءتۇستى مە، جەردەن شىقتى ما بىلمەيمىز؟! ساحناداعى الاڭدا 3-4 اسكەري ادام پايدا بولا كەتتى. ۇيىرمەنىڭ ءۇبىر-شۇبىر بولىسىپ جۇرگەن سولدات مۇشەلەرى قاققان شەگەدەي قازديا قالدى. اسىرەسە، ورتاداعى بىرەۋىنىڭ كەۋدەسىندەگى ءتوس بەلگىسى تىپتەن بولەك. ءمينسترىڭ   وسى كىسى بولسا كەرەك دەپ توپشىلادىم. ۇيىرمە جەتەكشىسى ەرەكەڭدى فاميلاسىمەن قوسىپ اتاپ قاستارىنا شاقىردى. وڭ قولىن انتەك شەكەسىنە اپارا بەرگەن مينستر (ۇمىتپاسام سول كەزدەگى قازاقستاننىڭ قورعانىس ءمينسترى مۇقتار التىنبايەۆ) : .

- كاپيتان شەنىڭمەن قۇتتىقتايىم، باۋىرىم،-دەپ ەرەكەڭە قولىن ۇسىندى. بويىن تۇزەپ، قازىقتاي قادالا قالعان ەرمۇرات باس قولباسشىسىنا وسى ءسات قولىن شەكەسىنە قاداپ تۇرىپ اسكەري سالەم بەردى. سونىمەن كەلىن تۇسكەندەي كەرەمەت بولاتىن شىعار دەپ توپشىلاعان ءبىزدىڭ جاڭالىعىمىز، قاس پەن كوزدىڭ اراسىندا اقىرلاسىپ، ەرەكەڭ كىشكەنە جارعاق قالتاعا قوراپتالعان ۋىستاي نارسەنى ماڭدايىنا تيگىزىپ قالا بەردى. شەن بەرگەن مينستر تەك اسكەري فورمانىڭ جاعا-جەڭىنە، ماڭداي-توسىنە قادايتىن بەلگىلەردى عانا تاپسىردى. قولباسىلارى كەتكەن سوڭ مارقۇمنىڭ ۇيىرمەدەگى ساپتاس سولداتتارى سامالا جۇلدىزداي ءتىزىلىپ كەلىپ، ەرەكەڭدى قۇتتىقتاپ قوشامەتتەپ الا جونەلدى. ەرەكەڭنىڭ كونسەرت بارىسىنداعى ساحناعا كيىپ شىققان، ءبىزدىڭ كوزىمىزگە قوراشتاۋ كورىنگەن فورماسى، مارقۇمنىڭ سول كەزدەگى اسكەري شەنى كىشى ليتەنانتتىڭ كيەتىن كيىمى ەكەنىن ءبىز بايقۇس وسىدان كەيىن بارىپ بىلدىك. سولداتتار ساحنادا ونەر كورسەتكەندە ءسوزسىز ءوزىنىڭ شەنىنە لايىقتى اسكەري فورماسىمەن عانا شىعاتىن، ەشكىم دە ونى وزگەرتە المايتىن ۇيىرمەنىڭ ءوز زاڭى بارىن قايدان بىلەيىك، بەكەرگە ءبىر ەلدىڭ ميزامىن جازعىرىپ جۇرىپتىك. ونىڭ ۇستىنە مينستر بۇل جولى ءبىزدىڭ ەرمۇراتتى اراداعى اسكەري ەكى شەننەن اتتاتىپ، توتە «كاپيتاندىققا» كوتەرىپ وتىرىپتى. بۇل دا سولداتتار ومىرىندە سيرەك كەزدەسەتىن باقىت ەكەن. سونىمەن ساحنا سىرتىنداعى بۇل دىر-دۋمان كىشكەنە ساباسىنا  تۇسكەندەي بولىپ، ورتامىزدا ەرمۇرات بار ۇشەۋىمىز ءبىر بۇرىشقا ۇيىسا قالعاندا:

- بەكە، ەرەكەڭنىڭ قالىڭ جولداس-جوبالارى بار، قاراپ تۇرامىز با؟! ەرتەڭگى پويىز بيلەتىنە جەتەتىندەي تەڭگە ساقتاپ قالساڭىز بولعانى، قالعانىن بۇگىنگى قۋانىشتىڭ شاشۋى رەتىندە ءوز قولىڭىزعا ۇستاتتىم،-دەپ، ءاميانىمداعى بار تيىن-تەبەندى ۋىستاپ بەكەڭنىڭ الاقانىنا سالدىم. قايىر تىلەۋگە شاق قالىپ جۇرگەن مەنىڭ قالتامدا، قايداعى شالقىپ شاشاتىنداي كوپ اقشا بولسىن. ايتەۋىر ەرەكەڭنىڭ جاتاعىنا ەرىپ بارىپ، بەكەڭ اكەلگەن بىردەمەلەرىمىزدى «تاتقان دا بىردەي، تويعان دا بىردەي» دەگىزىپ، مارقۇمنىڭ قالىڭ جولداستارىمەن بىرگە سول كۇنگى قۋانىشقا ىرىم جاساعانىمىز بار. سونداعى ۇيىرمە مۇشەلەرىنىڭ كوڭىلدەنىپ وتىرىپ ايتقان اڭگىمەسىنىڭ قىسقاشا مازمۇنىنا قۇلاق تۇرسەك: كونسەرتتى تاماشالاپ وتىرعان پرەزيدەنت نۇرسۇلتان نازاربايەۆ، قاسىنداعى قورعانىس مينيسترىنە: !؟.

- ساحناداعى جۇرگىزۋشى جىگىتتىڭ فورماسىن دۇرىستاپ شىعارساڭدار بولماي ما؟،-دەپ قالىپتى. مۇندايدا پاتشانىڭ «بولماي ما؟» دەگەن ءسوزىنىڭ ءوزى قول استىنداعىلارعا قامشىدان قاتتى تيەتىنى بار. مينيستر اتىنا ءمىنىپ، وسى كەزەكتى مەرەكەلىك ويىننىڭ جاۋاپتىسىن شاقىرتىپ جاۋاپ السا، ءبىزدىڭ ەرەكەڭ بۇگىنگى وسى ساحناداعى ەڭ تومەن شەندى «كىشى ليتەنانت» بولىپ شىعىپتى. سونىمەن بارلىق جاعدايعا قانىققان مينيستر مىرزا، ونەرىمەن ەل باسىنىڭ ءوزىن ەلەڭ ەتكىزىپ وتىرعان ەرمۇراتقا ەكى دارەجە اتتاتىپ «كاپيتان» شەنىن بەرۋ شەشىمىن سول مايداندا شىعارىپتى. ؟

   كەيىنگى كەزدەرى مارقۇم ماڭدايى قاسقالانىپ «مايور» اتاعىن دا الدى. ءتىرى بولعان دا دارەجەسى مۇنىمەن توقتاپ قالمايتىن ەدى، تالاي-تالاي كۇن سالىپ  قارايتىن كوپ قۇرمەتتىڭ ءتورى اسىل ازاماتىمىزعا ىعىسىپ ورىن بەرەتىنى مۇندا تۇر. ەرەكەڭ وسى ءبىر العان اسكەري شەنىمەن-اق، تۇڭعىش شىققان «مايور» ورالمان اتانىپ، اللا قالاسا كۇندەردىڭ كۇنىندە قازاقستان ەلىنىڭ اسكەري تاريحىنىڭ بەتتەرىنەن تابىلارى قاح! بۇل جاعىنان قاراساڭىز دا ەرمۇرات - «بولاشاقتىڭ ادامى» ...

     بىلىسبەك ءابدىرازاق

توتە جازۋدان اۋدارىپ دايىنداعان: ءقۋانالى الماسبەك ۇلى

ماقالانىڭ باسى: http://qamshy.kz/؟p=8021

http://qamshy.kz/؟p=8133

“قامشى” سىلتەيدى